Abot-kamay na ng Bucks, ang kampeonato

ni Anthony E. Servinio - @Sports | July 19, 2021

Pinangunahan ni gwardiya Jrue Holiday ang malaking pag-arangkada ng bisitang Milwaukee Bucks sa second quarter at nagtira para sa nakakapanabik na pagtatapos upang tuluyang pabagsakin ang Phoenix Suns, 123-119, sa mahalagang Game Five ng 2021 NBA Finals kahapon sa Phoenix Suns Arena. Naagaw ng Bucks ang 3-2 lamang sa seryeng best of seven at maaaring wakasan na nila ito sa Game Six ngayong Miyerkules sa Fiserv Forum.

Pinatahimik ni Holiday ang Suns at kanyang mga kritiko at bumuhos ng 14 puntos sa second quarter at ibigay sa Bucks ang 64-61 na lamang sa halftime. Bago noon, tumalon ang Phoenix sa maagang 32-16 lamang sa first quarter na natapos sa 37-21 sa likod ng 11 puntos ni Devin Booker.

Hindi pa tapos doon si Holiday at itinayo ang 108-94 na lamang sa fourth quarter. Nagawang lumapit ang Phoenix ng isa matapos ang tres ni Booker at saksak ni Chris Paul, 119-120, subalit kumapit ng mabuti ang Milwaukee sa huling 56 segundo para sa kanilang ikatlong sunod na tagumpay sa serye at unang panalo para sa bisitang koponan.

Nagmintis ang pilit na tira ni Khris Middleton subalit tInuldukan ni Holiday ang kanyang pagiging bayani at inagaw ang bola kay Booker at pinasa kay Giannis para sa dunk sabay bigay ng foul ni Paul, 122-119. Hindi napasok ang bonus free throw subalit nakuha ni Middleton ang rebound at foul ni Booker para sa isa pang free throw at siyam na segundo sa orasan para masigurado ang panalo.

Namayani ang Big Three ng Bucks sa pangunguna ni Giannis na may 32 puntos. Malaki ang ambag nina Middleton na may 29 puntos at Holiday na may 27. Nasayang muli ang 40 puntos ni Booker pati na rin ang double-double ni Paul na 21 puntos at 11 assist. Nagdagdag ng 20 puntos at 10 rebound si Deandre Ayton.

Bago ang laro, nakatanggap ng masamang balita ang Bucks at si Giannis matapos ipasok sa COVID-19 protocol ang kanyang kuya at kakampi Thanasis Antetokounmpo. Tila hindi muna nagpa-apekto ang koponan at agad nagtrabaho para sa inaasam na tagumpay.

Beal at Grant, nagka-COVID, malabo na sa Tokyo Olympics

ni Anthony E. Servinio - @Sports | July 17, 2021

Mukhang may napipintong malaking pagbabago sa Team USA para sa 2020 Tokyo Olympics matapos ipasok sa COVID-19 protocol si Bradley Beal ng Washington Wizards at Jerami Grant ng Detroit Pistons. Dahil dito, malaki ang posibilidad na hindi sila tutuloy ng Japan, lalo na sa kaso ni Beal.

Hindi nakakapag-ensayo ng kumpleto ang mga Amerikano sa ilalim ni Coach Gregg Popovich ng San Antonio Spurs habang hinihintay nila sina Booker, Khris Middleton at Jrue Holiday na tapusin ang NBA Finals. Maaaring kumuha ng mga kapalit mula sa USA Select Team na kinabibilangan ng mga batang NBA player sa gabay ni Pinoy Coach Erik Spoelstra ng Miami Heat na sumasabay sa ensayo sa Las Vegas, Nevada.

Bunga ng bagong suliranin na ito, pinag-aaralan kung ipagpapaliban ang pangalawang paghaharap ng Team USA at Australia ngayong araw. Matatandaan na ginulat ng Boomers ang USA, 91-83 noong linggo sa likod ng mahusay na laro ng mga NBA player Patty Mills ng Spurs at Joe Ingles ng Utah Jazz.

Samantala, nakatanggap ng malaking tulong ang Basketball para sa kababaihan matapos sumuporta ang isang Senadora sa Women’s National Basketball League (WNBL). Dahil dito, tatawaging Cayetano WNBL Season 2021 ang makasaysayang torneo bilang unang ligang propesyonal para sa kababaihan sa bansa.

Pormal na magsisimula ang aksyon ngayong Sabado (Hulyo 17) sa Bulacan Capitol Gym sa Malolos City. Ang Glutagence Glow Boosters and Pacific Water Queens ang may karangalan na maghaharap sa una at nag-iisang laro simula 4:00 ng hapon.

Ang tatlong iba pang mga koponan ay ang Paranaque Lady Aces, Taguig Lady Generals at STAN Quezon Lady Spartan. Maglalaro ang bawat koponan ng walong beses sa double round robin at susunod agad ang playoffs.

Makatutulong aniya ng malaki ang WNBL sa adbokasiya ng “Women Empowerment”. Ang liga ay maglilikha at magbibigay ng trabaho at pagkakataon para sa mga atletang Filipina habang ang mga kabataang babae ay magkakaroon ng inspirasyon na tuparin ang kanilang mga pangarap.

Middleton, nag-init sa bucks, Suns, nabigo sa game four

ni Anthony E. Servinio - @Sports | July 16, 2021

Tabla na ang 2021 NBA Finals sa 2-2 matapos magwagi ang Milwaukee Bucks sa bisitang Phoenix Suns, 109-103, sa Game Four kahapon mula sa Fiserv Forum. Depensa at biglang init ni Khris Middleton sa huling 2:30 ang sumalba sa Bucks na dalawang sunod na ang tagumpay sa seryeng best of seven.

Mag-isang ipinasok ni Middleton ang walong sunod-sunod na puntos upang maagaw ang lamang at lumayo na may 20 segundo sa orasan, 105-99. Bago noon ay ibinigay ni Jae Crowder ang huling lamang ng Suns sa bisa ng kanyang dalawang free throw, 99-97, subalit napako sila doon hanggang nakahirit ng isang buslo sa Devin Booker na may 13 segundong nalalabi subalit komportable ang lamang at nakakatiyak na ng panalo ang Bucks, 105-101.

Nagtapos na may 40 puntos si Middleton, 10 sa huling 2:30 ng laban. Sinundan siya ni Giannis Antetokounmpo na may 26 puntos at 14 rebound habang may 14 puntos si Brook Lopez.

Nasayang ang 42 points ni Booker kung saan dominado ng Phoenix ang unang tatlong quarter at lumamang pa ng siyam sa unang minuto ng fourth quarter, 85-76. Sinundan siya ni Crowder na gumawa ng 15 subalit hinanap ng Suns ang puntos ng mga inaasahan tulad nina Chris Paul, Deandre Ayton at Mikal Bridges.

Humugot ng inspirasyon ang Bucks sa mga kasapi ng kanilang 1971 NBA World Champion team na sina Kareem Abdul-Jabbar, Oscar Robertson at Jon McGlocklin na nanuod sa Fiserv. Hindi nasayang ang pagpunta ng mga alamat at lalong umingay ang sigaw ng mga tagahanga na “Bucks In Six”.

Gaganapin ang napakahalagang Game Five ngayong Linggo (Hulyo 18) sa Phoenix Suns Arena. Babalik ang NBA Finals sa Fiserv para sa Game Six sa Miyerkules (Hulyo 21) at kung kailangan, ang Game Seven ay nakatakda sa susunod na Biyernes (Hulyo 23) sa Phoenix.