Nets, tinalo ang Lakers sa NBA preseason game

ni Anthony E. Servinio - @Sports | October 05, 2021

Natalo ang Los Angeles Lakers sa kanilang preseason games kontra sa Brooklyn Nets kahit pa naglaro ang kanilang pambatong sentro at forward na si Anthony Davis.

Hindi naglaro sina LeBron James at Russel Westbrook para sa Lakers habang naupo lang din ang Big-3 ng Nets na sina Kevin Durant, James Harden at Kyrie Irving sa naging panalo ng Nets. Sinimulan ng Brooklyn at Lakers ang preseason na wala ang kanilang mga pambato kung saan nanaig ang Nets sa iskor na 123-97.

Samantala, mapapanood na ang mga Pinoy Pride na sina Sixth Man Jordan Clarkson ng Utah Jazz at rookie Jalen Green ng Houston Rockets. Sasabak ang Jazz ngayong araw sa AT&T Center upang harapin ang San Antonio Spurs sa una ng kanilang nakatakdang laro.

Susunod para kay Clarkson at ang Jazz ang pagdalaw sa Dallas Mavericks sa Huwebes. Uuwi sila sa Vivint Arena para sa huling dalawang laro kontra New Orleans Pelicans sa Oktubre 12 at 2021 NBA World Champion Milwaukee Bucks sa Oktubre 14.

Nagtapos ang Utah na may pinakamataas na kartada sa nakaraang NBA na 52-20 panalo-talo. Sa kasamaang palad, nadisgrasya sila sa playoffs at natalo sa Western Conference Semifinals laban sa Los Angeles Clippers, 4-2.

Malaki ang inaasahan kay Green na pinili ng Rockets na pangalawa sa nakalipas na NBA Rookie Draft. Mapapanood agad ang binata ng kanyang mga tagahanga sa pagbisita ng Washington Wizards sa Oktubre 5 at at Miami Heat sa Oktubre 8 sa Toyota Center at susundan ito ng lakbay ng Rockets sa Toronto Raptors sa Oktubre 12 at Spurs sa Oktubre 16.

Magsisimula ang makasaysayang ika-75 taon ng NBA sa Oktubre 20 na agad may dalawang malaking laro. Sisimulan ng Bucks ang pormal na depensa ng kanilang korona sa pagdalaw sa Nets habang pupunta ang Golden State Warriors sa Lakers.

Samantala, nagbago ang isip ni Golden State Warriors swingman Andrew Wiggins at nagpabakuna na ito kontra sa COVID-19 kaya pwede na itong maglaro sa NBA home games ngayon season, ani coach Steve Kerr kahapon.

Barons at Delta mainit ang laro sa NBL

ni Anthony E. Servinio - @Sports | October 04, 2021

Kinailangan ng Quezon Barons ang dalawang overtime upang masugpo ang hamon ng Taguig Generals, 119-108, sa umiinit na Chooks To Go National Basketball League (NBL) Chairman’s Cup 2021 Sabado ng gabi sa Bren Z. Guiao Convention Center ng San Fernando City, Pampanga. Hindi rin nagpahuli ang Pampanga Delta at inilampaso ang STAN District 4 Spartan, 136-69, sa isa pang laro.

Pinatunayan ng Barons na may mas marami silang itinagong lakas para sa pangmatagalan at ang huling talaan ay siya ring pinakamalaking lamang nila. Nagtulungan sina Jervin Deduyo, Domenick Vera, Christopher Lagrama at Alex Ramos na tuluyang tapusin ang laban at makamit ang kanilang ikatlong sunod na tagumpay at pumantay sa nagpapahingang La Union PAOwer para sa liderato ng liga.

Ipinasok ni Ramos ang dalawang free throw upang itabla ang iskor sa 87-87 sa katapusan ng fourth quarter. Ibinaon ni Jessmar Villahermosa ng Taguig ang bola na may siyam na segundo sa overtime para pumantay muli, 97-97, subalit hindi naipasok ni Lagrama ang kanyang minadaling tres sabay tunog ng busina.

Nagtrabaho ng husto si Lagrama sa kanyang 26 puntos, 12 assist at limang agaw sa loob ng 51 minuto. Sinuportahan siya ni Ramos na may 24 puntos at 16 rebounds habang may 22 puntos si Vera.

Matapos gulatin ng DF Bulacan Republicans noong nakaraang linggo, 91-93, ibinuhos ng Delta ang kanilang sama ng loob sa Spartan para umakyat sa 3-1 panalo-talo. Dalawang beses lang nakatikim ng lamang ang Spartan, 5-4 at 7-6, at mula roon ay hindi na sila nakaporma sa ipinamalas na husay nina Florencio Serrano, Rhanzelle Yong, Jayson David at MJ Garcia.

Maliban sa kanilang umaapoy na opensa, hinigpitan din ng Pampanga ang depensa at walong puntos lang ang ginawa ng Spartan sa second quarter para lumayo ng todo pagsapit ng halftime, 61-27. Naglaro sa unang pagkakataon si Ronald Pascual at pumukol ng limang tres na ang huli ay nagbalik sa Delta ng kanilang 70 puntos na lamang, 134-64, at isang minuto ang nalalabi.

Republicans at Lady Generals, bumida sa NBL/ WNBL

ni Anthony E. Servinio - @Sports | October 03, 2021

Mga laro ngayong Linggo – Bren Z. Guiao Convention Center

11:15 AM Pacific Water vs. STAN (WNBL)

1:15 PM Quezon vs. Bulacan

4:00 PM Muntinlupa vs. Taguig

6:00 PM Paranaque vs. Pampanga

BUMALIK sa panalo ang DF Bulacan Republicans matapos talunin ang Paranaque Aces, 100-81, sa Chooks To Go National Basketball League (NBL) Chairman’s Cup 2021 kahapon sa Bren Z. Guiao Convention Center sa San Fernando City, Pampanga. Kinailangan gisingin ng mga reserba ng Republicans ang mga kakampi upang makamit ang kanilang ika-apat na panalo sa limang laro habang bumaba sa 0-2 ang Aces.

Hawak ng Bulacan ang 10-9 na lamang subalit biglang umarangkada oras na ipinasok sina Ron Camua at Jerick Sumampong na nagsama para sa 15 puntos at ibigay sa Republicans ang first quarter, 29-19. Bumagal ang dating ng puntos sa third quarter ngunit binuhay muli ito nina Sumampong at Dominick Fajardo sa fourth quarter hanggang umabot ng 28 ang lamang, 100-72, at 2:37 ang nalalabi.

Lamang ang Republicans sa buong 48 minuto at namuno si Fajardo 19 puntos at sinuportahan siya nina Sumampong na may 13 at Ryan Spencer Operio na may 12 puntos. Nabawasan ang pait ng talo ng Bulacan noong nakaraang linggo sa Muntinlupa Water Waters, 85-103, na binahiran ang kanilang dating perpektong 3-0 kartada.

Susubukan ng Bulacan na walisin ang kanilang dalawang laro sa pagharap sa hamon ng Quezon Barons ngayong araw simula ng 1:15 p.m. habang pagbawi ang nasa isip ng Paranaque sa laro nila kontra sa Pampanga Delta sa 6:00 ng gabi. Sa gitna ng dalawang laro ay magkikita ang Taguig Generals at Muntinlupa Water Warriors sa 4:00 ng hapon.

Sa pinagsabay na Women’s National Basketball League (WNBL) 2021, naitala ng Taguig Lady Generals ang kanilang ikalawang tagumpay matapos pabagsakin ang walang panalong STAN Quezon Lady Spartan, 58-50. Patuloy pa rin hahanapin ng Lady Spartan ang kanilang unang panalo ngayong araw laban sa wala din panalong Pacific Water Queens simula 11:15 ng umaga.

Bumida muli si Tin Capilit sa kanyang dalawang mahalagang buslo papasok sa huling dalawang minuto upang ibalik sa Taguig ang siyam na puntos na lamang, 56-47.