Heat, sinunog ang Rockets, Fil-Am Green, pursigido

ni Anthony E. Servinio - @Sports | October 09, 2021

Binigyan ng bisitang Miami Heat ng matinding aral ang Houston Rockets, 113-106, sa NBA Preseason kahapon mula sa Toyota Center. Kahit bigo, maganda muli ang ipinakita ni Fil-Am rookie Jalen Green na napipisil na bagong bituin ng koponan.

Dominado ng Heat ang buong laban at umabot ng 21 ang lamang matapos ang tatlong quarter, 91-70. Pumalag ang Rockets at lumapit na may 1:11 sa orasan, 104-109, subalit ipinasok ni Dru Smith ang apat na free throw para mauwi ang tagumpay.

Pumukol ng apat na tres si Tyler Herro para pangunahan ang Heat sa kanyang 24 puntos bilang reserba. Limang tres ang idinagdag ni Duncan Robinson para sa 20 puntos at 15 puntos si Tokyo Olympics gold medalist Bam Adebayo.

Kahit hindi siya pumuntos sa fourth quarter, namuno pa rin si Green sa 20 puntos sa loob ng 28 minuto. Sumunod sina Christian Wood na may 13 puntos at Kevin Porter Jr. at Josh Christopher na parehong may 12 puntos.

Ang patuloy ng pag-usbong ng laro ni Green ay mahalaga sa kinabukasan ng Rockets na pinakakulelat sa buong NBA noong nakaraang taon sa kartadang 17-55. Muling hindi naglaro si All-Star John Wall at nakakasigurado na bilang na ang kanyang mga araw sa Houston at lilipat ito sa ibang koponan.

3X3 President's Cup humahanap ng hahamon sa mga Beterano

ni Anthony E. Servinio - @Sports | October 08, 2021

Magsisimula ngayong Oktubre 19 ang 2021 Chooks To Go Pilipinas 3X3 President’s Cup, hudyat ng pagbabalik ng aksyon sa orihinal at pinakaunang ligang propesyonal ng 3X3 sa bansa sa LausGroup Events Center sa City of San Fernando, Pampanga. Mahigit P2,500,000 ang nakahanda para sa mga magwawagi sa apat na yugto at Grand Finals.

Ngayong taon, bibigyan ng pagkakataon ang publiko na magbuo ng sariling koponan at hamunin ang mga beterano ng 3X3 bilang isa sa 12 kalahok. Maaaring magpadala ng email sa chookspilipinas@gmail.com ang lahat ng mga interesadong maglaro.

Pagkatapos ng torneo sa Oktubre 19 ay susunod agad ang pangalawang yugto sa Oktubre 20. Magpapahinga saglit ang liga at babalik para sa ikatlo at ika-apat na yugto sa Nobyembre 17 at 18.

Ang Grand Finals ay nakatatakda para sa Nobyembre 20 kung saan ay may naghihintay na P1,000,000 para sa pangkalahatang kampeon. Hindi malayo ang P500,000 sa pangalawa at P200,000 sa pangatlong koponan.

Maliban sa gantimpalang salapi, bibigyan ng pagkakataon ang mga kampeon na katawanin ang Pilipinas sa FIBA 3X3 World Tour Abu Dhabi Masters ngayong Oktubre 29 sa United Arab Emirates. Kinatawan ng Manila Chooks TM nina Mark Jayven Tallo, Zachary Huang, Dennis Santos, Mark Yee and Chico Lanete ang Pilipinas sa mga naunong yugto ng World Tour ngayong taon sa Doha, Qatar at Montreal, Canada.

Noong 2020, matagumpay na isinagawa ang President’s Cup sa loob ng Inspire Sports Academy sa Calamba City, Laguna. Tinanghal na kampeon ang Zamboanga City na binubuo nina Joshua Munzon, Alvin Pasaol, Leonard Santillan at Troy Rike.

Doncic, nagpasiklab kontra Clarkson; Suns nanaig din

ni Anthony E. Servinio - @Sports | October 08, 2021

Sinimulan ng Dallas Mavericks ang kanilang 2021 NBA Preseason sa isang 111-101 panalo sa bisitang Utah Jazz kahapon sa American Airlines Center. Nagpasiklab agad si Luka Doncic upang ipatikim kay Jordan Clarkson at Jazz ang kanilang ikalawang sunod na pagkatalo.

Sa bihirang pagkakataon, naging bahagi si Sixth Man Clarkson ng starting five ng Utah at sabay hindi ginamit ang mga All-Star na sina Donovan Mitchell, Rudy Gobert at Mike Conley. Naglaro lang siya ng 17 minuto at nagtapos na may siyam na puntos buhat sa dalawang tres noong first quarter at isang three-point play sa second quarter upang ibigay sa Jazz ang kanilang huling lamang, 47-46.

Ipinasilip ni Doncic ang kahandaan para sa parating na NBA sa 19 puntos, anim na rebound at limang assist sa loob lang ng 16 minuto sa sahig. Hindi pinaporma ng Mavs ang Jazz at dominado nila ang second half kung saan umabot ng 20 ang pinakamalaking lamang, 99-79. Nanguna sa Jazz si rookie Jared Butler na may 22 puntos habang may 13 puntos ang dating Golden State Warrior na si Eric Paschall na pinasok bilang sentro sa starting five sa kanyang taas na 6’6”.

Sa ibang mga laro, kahit wala pa rin ang mga bituin ay nanaig ang Phoenix Suns sa bisitang Los Angeles Lakers, 117-105, sa Footprint Center o ang dating Phoenix Suns Arena.

Samantala, nagtala ng panalo ang isa pang Fil-Am na si Jalen Green ng Houston Rockets sa bisitang Washington Wizards, 125-119, sa Toyota Center noong Miyerkules. Ipinasok ng rookie ang 10 ng kanyang 12 puntos sa first half subalit kinailangan ang mga beterano na tapusin ang laro.