Jazz ni Fil-Am Clarkson, nanambak; Rockets, dinale ng Raptors

ni Anthony E. Servinio - @Sports | October 13, 2021

Bumalik sa aksyon ang mga All-Star ng Utah Jazz at ito ang naging susi sa kanilang 127-96 pagdurog sa bisitang New Orleans Pelicans sa NBA Preseason kahapon mula sa Vivint Arena. Bumalik din sa kanyang papel bilang numero unong reserba si Gilas Pilipinas Jordan Clarkson at malaki ang naitulong sa unang panalo ng Jazz matapos mabigo sa unang dalawang laro.

Lamang ng 30 ang Utah matapos ang tatlong quarter, 95-65, kaya nagpasya si Coach Quin Snyder na ipahinga na sina Rudy Gobert, Donovan Mitchell at Mike Conley. Bumalik sa laro si Clarkson at bumuhos ng walo ng kanyang kabuuang 17 puntos upang itulak ang Jazz sa 103-69 lamang at 10 minuto ang nalalabi bago paupuin sa huling walong minuto.

Namayani sa ilalim si sentro Gobert para sa 19 puntos at 19 rebound habang may 18 si Mitchell at 15 si Conley. Nag-ambag ng 15 puntos si Bojan Bogdanovic at 14 puntos si Eric Paschall. Hindi pinalad ang isa pang Fil-Am sa NBA na si rookie Jalen Green at natalo ang kanyang Houston Rockets sa pagdalaw nila sa Toronto Raptors, 107-92. Limang puntos lang ang nagawa ni Green sa 25 minuto. Bumida para sa Raptors sina OG Anunoby at Precious Achiuwa na parehong may 17 puntos. Sinundan sila ni Malachi Flynn na may 15 puntos buhat sa tatlong tres.

Wawakasan ng Jazz ang kanilang preseason sa pagbisita sa kanila ng World Champion Milwaukee Bucks sa Huwebes. May isa pang laro rin ang Houston sa Sabado kontra sa San Antonio Spurs sa AT&T Center.

Samantala, aabangan ng mga Pinoy sa Texas ang parating na “Filipino Heritage Night” na kasabay ng pagdalaw ng Jazz sa Rockets ngayong Oktubre 29 sa Toyota Center. Maliban sa pagkikita ng dalawang Fil-Am na sina Clarkson at Green, magkakaroon ng mga palabas na itatampok ang mayaman na kultura ng Pilipinas.

Maliban sa Rockets, naunang nagtanghal ng kanilang “Filipino Heritage Night” ang Golden State Warriors. Ang unang Fil-Am sa NBA na si Raymond Townsend ay naglaro ng dalawang taon para sa Warriors mula 1978 hanggang 1980.

Pistons at Delta, namitpit sa NBL; Animam, nileksiyunan ng Serbia

ni Anthony E. Servinio / VA - @Sports | October 11, 2021

Nagdiwang ang Laguna Pistons matapos maitala ang unang panalo sa Chooks To Go National Basketball League (NBL) Chairman’s Cup 2021 sa Mindoro Tamaraws Nex Gen, 106-87, Sabado ng gabi sa Bren Z. Guiao Convention Center sa City of San Fernando, Pampanga. Sa isa pang laro, tatlong sunod-sunod na ang panalo ng Pampanga Delta matapos tunawin ang bisitang Muntinlupa Water Warriors, 107-75.

Kinuha ng Pistons ang first quarter, 22-14, subalit bumuhos ng 11 diretsong puntos ang Tamaraws upang maagaw saglit ang lamang, 25-24. Iyan na ang huling ingay ng Mindoro at sinagot ito ng Laguna, 30-13, upang tuluyang lumayo sa halftime, 54-38.

Nanguna sa Pistons si kapitan Shinichi Manacsa na nagsabog ng 24 puntos at sinundan nina King Fadriquela na may 17 at Kim Galamiton na may 16 upang umakyat sa 1-4 panalo-talo. Nabitin ng isang puntos si Jeff Disquitado para sa triple double sa 9 na puntos, 16 rebound at 12 at pinaupo na siya sa huling 4:44 at komportable ang lamang, 97-76.

Nahanap muli ng Delta ang talas ng kanilang opensa matapos maitakas ang 69-55 tagumpay sa Paranaque Aces noong nakaraang Linggo. Minsan lang nakatikim ng lamang ang Muntinlupa, 3-0, at mula doon ay bumanat ng todo ang Pampanga sa pangunguna ni Levi Hernandez na nagtala agad ng 10 puntos sa first quarter pa lang para sa 29-22 na kalamangan.

Samantala, nakatikim ng 66-104 na kabiguan sa kamay ng 4-time reigning Women’s Basketball League of Serbia champion ZKK Crvena zvezda si Jack Animam at ang kanyang koponang ZKK Radnicki Kragujevac, sa Jazero Hall sa Kragujevac, Serbia kahapon ng umaga (Oktubre 10-Manila time).

Ngunit sa gitna ng malaking pagkatalo,hindi maikakailang impresibo ang ipinakitang laro ng Filipina star center sa kanyang ikalawang laban bilang professional makaraang magposte ng panibagong double-double - 29 puntos at 12 rebounds bukod pa sa 6 assists at tig-isang steal at block.Tatangkain ni Animam at mga teammates nito sa Radnicki na makabawi sa pagsagupa nila sa koponan ng Kraljevo sa Sabado-Oktubre 16.

Pacific Water, nanggulat; Men's team sa AVC, bigo uli

ni Anthony E. Servinio / MC - @Sports | October 10, 2021

Ginulat ng walang panalong Pacific Water Queens ang walang talong Glutagence Glow Boosters, 71-61, sa tapatan ng dalawang koponan sa magkabilaang dulo ng Pia Cayetano Women’s National Basketball League (WNBL) 2021 mula sa Bren Z. Guiao Convention Center ng San Fernando City, Pampanga kahapon. Uminit ang shooting ni Jollina Go upang maputol sa apat ang sunod-sunod na talo ng Water Queens at manatiling buhay ang pag-asa na mapabilang sa semifinals.

Pinakamainit si Go noong second quarter kung saan ikinalat niya ang 11 puntos upang lumamang ang Pacific Water, 34-25. Pumukol si Go ng anim na tres para sa 27 puntos at sinundan nina Snow Penaranda na may 13 puntos, 16 rebound, siyam na assist at pitong agaw at Cara Buendia na may 13 puntos at 15 rebound.

Nanguna sa Glutagence si Raiza Palmera-Dy na may 28 puntos at siyam na rebound habang siyam na puntos lang ang na-ambag ni April Lualhati at walong puntos si Julie Pearl Gula. Ang 28 puntos ni Palmera-Dy ay pumantay sa 28 na ginawa ni Penaranda para sa pinakamaraming nagawang puntos sa isang laro noong unang laban ng dalawang koponan noong Hulyo 18 kung saan nanaig ang Glow Boosters, 72-55.

Samantala, kinapos sa ikalawang sunod na pagkakataon ang PHL Men's team Rebisco sa 2021 Asian Club Men's Volleyball Tournament na idinaraos sa Terminal 21, Nakhon Ratchasima, Thailand kahapon.

Kinulang pa rin ang Rebisco para tapatan sa opening-set at malaglag ang momentum kontra Uzbekistan AGMK. Nagtatag ang AGMK come-from-behind win sa four sets, 24-26, 25-23, 25-18, 25-19 upang biguin muli ang PHL team preliminary round ng men's tournament. Nasayang ang pamumuno ni Jao Umandal para sa Pilipinas sa game-high na 19 points na galing sa attacks, habang may 14 puntos na iniambag si Nico Almendras.

Umiskor ng tig-18 puntos sina Bunyod Egamkulov at Bunyodbek Khosinov para sa AGMK para sumalo sa liderato ng Pool B. Nanatili sa 4th place ang PHL team dahil hindi lumahok sa torneo ang Al-Arabi ng Qatar.