2 patay sa ambush sa QC

ni Ronalyn Seminiano Reonico | June 10, 2021

Patay ang isang babae at lalaki matapos pagbabarilin ng riding-in-tandem ang sasakyan ng dalawa sa Barangay Mariana, Quezon City noong Miyerkules nang gabi, bandang alas-siyete.

Ayon kay QC Police District Director Brig Gen. Antonio Yarra, hindi pa nakikilala ang mga biktima at aniya, hinila umano ng mga suspek ang babae palabas ng sasakyan saka ito binaril at iniwan sa kalsada. Sa loob naman umano ng sasakyan binaril ang kasama nitong lalaki.

Saad pa ni Yarra, "'Yung babae, according sa witness natin, pinaghihila siya at pinagbabaril. Tapos 'yung lalaki, habang umaatras, pinagbabaril din.

"'Yung lalaki, may tama ng bala sa right side ng kanyang body."

Ayon umano sa mga nakasaksi, bago tumakas ang mga suspek, nakakilos pa ang babae at nanghingi ng tulong ngunit kaagad ding binawian ng buhay.

Nagsasagawa na rin ng imbestigasyon ang Quezon City Police District sa insidente upang matukoy ang mga suspek.

3 pulis, patay; 10 sugatan sa ambush

ni Ronalyn Seminiano Reonico | May 29, 2021

Tatlong pulis ang patay at 10 pa ang sugatan sa naganap na pag-ambush ng mga hinihinalang miyembro ng New People’s Army (NPA) sa Magsaysay, Occidental Mindoro noong Biyernes nang umaga.

Ang mga naturang pulis ay miyembro umano ng Philippine National Police’s First Occidental Mindoro Provincial Mobile Force Company na nagtungo sa San Nicolas para sa outreach program na “Serbisyo Caravan” na inorganisa ng Provincial Task Force-Ending Local Communist Armed Conflict.

Base sa ulat ng awtoridad, alas-10:30 nang umaga naganap ang engkuwentro nang paulanan ng bala ng baril ang mga pulis na sakay ng open vehicle na nakaparada malapit sa highway.

Ayon kay Provincial Police Chief Col. Hordan Pacatiw, ang mga nasawing pulis ay sina Police Executive Master Sgt. Jonathan Alvarez at Police Cpl. Stan Gonggora. Ngayong Sabado naman binawian ng buhay si Police Staff Sergeant Nolito Develos Jr..

Dagdag pa ni Pacatiw, ang tinambangang sasakyan ng mga pulis ay bahagi ng security convoy ni Gov. Eduardo Gadiano. Naganap ang pananambang ng armadong grupo nang pauwi na umano sina Gadiano matapos ang “Serbisyo Caravan”.

Samantala, nagsasagawa na ng operasyon ang awtoridad upang matugis ang mga salarin sa insidente.

Kumandidatong mayor sa Cebu, in-ambush, patay

ni Thea Janica Teh | January 2, 2021

Patay ang isang kumandidatong mayor noong 2019 sa Barangay Apas, Cebu City nitong Biyernes nang gabi matapos tambangan ng limang armadong lalaki.

Ayon kay Police Captain Francis Renz Talosig ng Mabolo Police Station, kinilala ang biktima na si Ruben Feliciano.

Pauwi na sana si Feliciano kasama ang kanyang pamangkin galing sa trabaho nang bigla itong pagbabarilin bandang 6:30 pm sa Fulton Street. Nakasakay umano ang limang kalalakihan sa puting van na walang plate number kaya agad na nakatakas.

Dumating din agad ang rescue ngunit, hindi na nila naabutang buhay si Feliciano. Samantala, dinala naman sa isang pribadong ospital ang pamangkin nito at nasa mabuti nang kalagayan.

Nakuha sa pinangyarihan ng insidente ang 5 cartridge case ng hindi pa matukoy na caliber, 7 rounds ng live ammunition ng hindi pa rin matukoy na caliber, 3 deformed slug at 1 caliber Glock pistol na may 11 bala.

Sa ngayon ay patuloy pa rin ang imbestigasyon ng mga awtoridad sa kung ano ang motibo ng mga suspek at kung sino ang mga ito.