Minors, bawal pa rin sa malls.. Bakunadong senior, puwede nang lumabas

ni Lolet Abania | October 19, 2021

Maaari nang lumabas ng bahay at magpunta sa mga malls ang mga senior citizens na fully vaccinated na kontra-COVID-19 sa mga lugar na nasa ilalim ng Alert Level 3, ayon sa Malacañang ngayong Martes.

Una nang sinabi ng gobyerno na ang mga senior citizens sa mga lugar na nasa ilalim ng Alert Level 3 ay pinayagan nang lumabas ng kanilang bahay kahit pa ito ay non-essential activities bilang “insentibo” dahil sa pagpapabakuna ng mga ito kontra-COVID-19.

Ito ang naging tugon ni Presidential Spokesman Harry Roque, matapos ang mga reports na ilang mga establisimyento ang tinanggihang papasukin ang mga senior kahit bakunado na nang isailalim ang Metro Manila sa Alert Level 3 nitong weekend.

“Hindi po natin binabawi iyong incentive na binigay natin sa seniors,” ani Roque. “Kapag sila ay vaccinated, pupuwede po silang pumunta sa mga malls at pupuwede silang lumabas ng bahay, ganoon pa rin po iyon,” sabi ni Roque sa press briefing.

“Ang hindi natin ina-allow pa ngayon ay iyong mga menor-de-edad na magpunta sa mga malls kasi hindi sila bakunado po, unlike the senior citizens na posibleng bakunado na sila,” paliwanag pa ng kalihim.

Ani pa ni Roque, ang mga seniors ay kailangan lamang magdala ng proof of vaccination kung sila ay magtutungo sa mga malls.

Para ‘di tumaas ang COVID-19 cases... Sinehan, may weekly monitoring — DOH

ni Lolet Abania | October 14, 2021

Ipinahayag ng Department of Health (DOH) ngayong Huwebes na dapat na i-monitor nang husto kung ang muling pagbubukas ng mga sinehan sa Metro Manila ay magdudulot ng pagtaas ng mga kaso ng COVID-19.

Una nang pinayagan na magbukas simula Oktubre 16 ang mga sinehan sa Metro Manila matapos na ang Inter-Agency Task Force for the Management of Emerging Infectious Diseases (IATF) ay aprubahan nitong Miyerkules na ibaba sa Alert Level 3 ang National Capital Region (NCR).

“For as long as the minimum public health standards are followed, we can give it a try and then monitor. We’ll see if there’s going to be an unusual increase of cases if and when cinemas are opened,” ani DOH Secretary Francisco Duque III sa isang interview.

“But again this is controlled, regulated to about 30% [indoor venue capacity for fully vaccinated individuals]…it means there is spacing, then you have the face mask, and then the cinemas must have [or] they have filters similar to the ones being used inside an airplane. I think they upgraded their ventilation,” dagdag ng kalihim.

Ipapatupad ang Alert Level 3 sa buong Metro Manila mula Oktubre 16 hanggang 31.

Sa ilalim ng naturang alert level, ang mga establisimyento gaya ng cinemas at amusement parks, gayundin ang in-person religious gatherings at limited face-to-face classes para sa higher education at technical-vocational education and training ay pinapayagan nang magbukas sa maximum na 30% ng indoor venue capacity para sa indibidwal na fully vaccinated lamang habang 50% para sa outdoor venue capacity.

Sa gitna ng pangamba ng mga healthcare workers hinggil sa pag-downgrade ng alert level kung saan anila ay “masyado pang maaga”, tiniyak naman ni Duque na patuloy ang gobyerno na panatilihin ang kailangang flexibility pagdating sa COVID-19 response.

“Well, you use the system calls for weekly monitoring of the cases that are registered on a daily basis. So no worries because we are nimble. I mean, we can always escalate,” sabi ni Duque.

Business owners, umapelang taasan ang operating capacity sa Alert Level 3

ni Jasmin Joy Evangelista | October 14, 2021

Umaapela ang maraming business owners dahil malabo raw na makabangon ang maraming negosyo sa 30 percent capacity na pinapayagan sa Alert Level 3.

Hiling nila, taasan ito para makabawi naman bago mag-Pasko.

Giit ng Employers Confederation of the Philippines, walang negosyong makakabawi sa 30 percent na operational capacity kaya dapat itong itaas sa 70 percent.

"Sabi by Christmas sasaya, eh, paano ka sasaya kung ganyan-ganyan lang? Ngayon pa lang gawin nang 70 percent, talagang there is a risk in it, pero sagot sa risk pagbutihin natin ang hospital facilities natin," ani ECOP president Sergio Ortiz Luis.

Sang-ayon naman sa 70 percent capacity ang grupo ng restaurant owners.

"Many will not recover if we delay one more day. Sabi ko nga it’s just a matter of reducing the casualty sa restaurant industry," sabi ni Eric Teng ng Resto PH.

Samantala, ang Alert Level 3 sa Metro Manila ay tatafal hanggang katapusan ng Oktubre.