NCR residents na hindi bakunado, bawal lumabas sa ilalim ng Alert Level 3 — Metro Manila Council

ni Jasmin Joy Evangelista | January 3, 2022

Ipinag-utos ng Metro Manila Council na dapat manatili sa bahay ang mga hindi pa bakunadong mga indibidwal, maliban na lamang kung bibili ng essential goods habang nasa ilalim ng Alert Level 3 ang Metro Manila, ayon kay MMDA chair Benhur Abalos.

“Yung mga walang bakuna or unvaccinated, number one, they shall remain in their residences at all times except for the procurement of essential goods and services,” pahayag ni Abalos sa isang press conference.

Ang karagdagang restriction na ito para sa mga hindi bakunado ay inaprubahan ng Metro Manila Council na binubuo ng 17 NCR mayors.

Nang tanungin kung kalian magiging epektibo ang naturang restriction sa mga unvaccinated, sinabi ni Abalos na mag-i-issue ng mga ordinansa ang bawat LGU hinggil sa pagpapatupad nito.

Ang mga hindi pa bakunado ay papayagan lang ding lumabas upang mag-exercise sa lugar na sakop lamang ng residence, village, o barangay, depende sa regulasyon ng LGU.

Samantala, sinabi ni Abalos na ang implementation ng stay-at-home order sa NCR ay ang “pilot case” sa buong bansa.

Mula Nob. 1-14... Alert Level 3 pa rin NCR, 10 lugar — Malacañang

ni Lolet Abania | October 29, 2021

Pinalawig pa ng gobyerno sa Alert Level 3 classification ang National Capital Region (NCR) ng hanggang unang dalawang linggo ng Nobyembre, ayon sa Malacañang ngayong Biyernes.

Sa isang press briefing, sinabi ni Presidential Spokesperson Harry Roque na ang NCR at 10 iba pang lugar ay isasailalim sa Alert Level 3 mula Nobyembre 1 hanggang 14, 2021.

Bukod sa NCR, nasa Alert Level 3 din ang Baguio City (isinama bilang isang lugar para sa special monitoring), Bataan, Cavite, Laguna, Rizal, Iloilo City, Siquijor, Lanao del Norte, Davao City, Davao del Norte.

“Inuunti-unti natin ang pagbaba ng alert system para hindi sumipa ang COVID-19 cases,” paliwanag ni Roque kung bakit ang NCR ay mananatili sa ilalim ng Alert Level 3.

Sa ilalim ng Alert Level 3, maraming establisimyento, kabilang na ang mga restaurants, gyms, cinemas at movie houses ang papayagan nang mag-operate ng 30% indoor venue capacity na para lamang sa mga indibidwal na fully vaccinated at 50% outdoor venue capacity, subalit lahat ng mga empleyado ay fully vaccinated na.

Gayunman, ayon kay Roque, inaprubahan na ngayon ng pamahalaan na madagdagan ang operational capacity para sa pampublikong transportasyon ng hanggang 70% simula sa Nobyembre 4.

“The DOTr (Department of Transportation) will issue a memo on this,” sabi Roque. Sa pareho ring briefing, inianunsiyo naman ni Roque na ang Aurora, Bacolod City, Negros Oriental at Davao Occidental ay isasailalim sa Alert Level 4.

Samantala, ang mga lugar na isasailalim sa Alert Level 2 ay ang mga sumusunod:

• Angeles City

• Bulacan

• Nueva Ecija

• Olongapo City

• Pampanga

• Tarlac

• Batangas

• Quezon

• Lucena City

• Aklan

• Antique

• Capiz

• Guimaras

• Iloilo

• Negros Occidental

• Bohol

• Cebu City

• Lapu-Lapu City

• Mandaue City

• Cebu

• Bukidnon

• Cagayan de Oro City

• Camiguin

• Iligan City

• Misamis Occidental

• Misamis Oriental

• Davao de Oro

• Davao del Sur

• Davao Oriental

Minors, puwede nang mamasyal sa QC Memorial Circle

ni Lolet Abania | October 21, 2021

Pinayagan na ng lokal na gobyerno ng Quezon City ang mga kabataan na nasa edad 17 at pababa na mamasyal sa Quezon City Memorial Circle.

Sa isang advisory na inilabas ng Quezon City government ngayong Miyerkules, maaari nang pumunta ang mga menor-de-edad sa Memorial Circle, subalit dapat na kasama ang kanilang mga magulang o guardian sa lahat ng oras.

Gayunman, ayon sa lokal na pamahalaan kaya lamang mag-accommodate o magpapasok sa loob ng parke ng hanggang 30% ng kapasidad nito.

Una nang inaprubahan ng Metro Manila Council (MMC) nitong Martes ang intrazonal at interzonal travel ng mga menor-de -edad, subalit dapat na may mga kasama ang mga itong adult guardians.

Ang intrazonal travel ay tungkol sa galaw ng mga tao, ng mga goods at serbisyo sa pagitan ng mga lokalidad na nasa ilalim ng parehong community quarantine classification, habang ang interzonal travel ay tungkol naman sa galaw ng mga tao, ng mga goods at serbisyo sa pagitan ng mga probinsiya o lalawigan, highly urbanized cities, at independent component cities sa ilalim ng magkaibang community quarantine classification.

Matatandaang inaprubahan ng gobyerno ang rekomendasyon na isailalim na ang National Capital Region (NCR) sa Alert Level 3 simula noong Oktubre 16 hanggang 31.

Sa ilalim ng Alert Level 3, maraming establisimyento ang pinayagang mag-operate ng 30% ng indoor venue capacity na para lamang sa mga fully vaccinated individuals at 50% ng outdoor venue capacity, subalit dapat na ang lahat ng mga empleyado nito ay fully vaccinated na.

Gayundin, pinag-igsi ang curfew hours sa Metro Manila ng 12 ng hatinggabi hanggang alas-4:00 ng madaling-araw simula noong Oktubre 13.