5 barangay nasa “red zone” dahil sa African swine fever sa Zamboanga City

ni Lolet Abania | May 30, 2022

Isinailalim ng mga awtoridad sa “red zone” ang limang barangay sa Zamboanga City dahil sa mga kumpirmadong kaso ng African swine fever (ASF) na tumama sa mga alagang baboy.

Ang limang barangay ay Mangusu, Curuan, Manicahan, Bunguiao at Pasonanca. Ayon kay Zamboanga City Veterinarian Dr. Mario Arriola nagsagawa na ng culling ng mga baboy sa loob ng 500-meter radius sa limang barangay.

Para madagdagan ang suplay ng mga karneng baboy sa siyudad, nagkaroon ng pagtuturo ang Zamboanga City Hog Raisers Association sa mga residente para sa tamang paraan ng hog raising habang nagsasagawa ng sanitation sa mga lugar.

Ang naturang association ay may programa, sa koordinasyon ng Department of Agriculture (DA), na nagbibigay ng 10 inahing baboy sa mga residente, alinsunod ito sa guidelines na itinakda ng asosasyon at ng Office of the City Veterinarian.

206 baboy na-culled dahil sa ASF — Bontoc gov’t

ni Lolet Abania | February 24, 2022

Ilang lugar sa bayan ng Bontoc sa Mountain Province ang tinamaan ng African swine fever (ASF), kung saan mahigit sa 200 baboy ang kanilang nai-culled nitong huling mga buwan ng nakalipas na taon para makontrol ang pagkalat pa ng naturang sakit.

Sa isang radio interview ngayong Miyerkules kay Bontoc Mayor Franklin Odsey, sinabi nitong nagsimula ang outbreak ng ASF noong Oktubre 2021, na umabot sa kabuuang 206 baboy ang kanilang pinatay hanggang ngayong buwan.

“Starting October hanggang ngayon, 206, mga backyard hograisers lang ang taong naapektuhan pero malaking bagay sa kanila po,” pahayag ni Odsey. “Our team conducted disinfection sa mga... hograisers naming,” ani mayor.

Gayunman, ayon kay Odsey plano nilang magbigay ng libre mga piglets para makatulong sa mga apektadong hograisers na buhayin muli ang kanilang mga negosyo.

Hindi naman humihinto ang ibang mga hog raisers na mag-operate ng mga kanilang mga pigpens, lalo na sa mga hindi nakakalabas sa kanilang lugar at mayroong mga malulusog na alagang baboy.

“‘Yung mga healthy pigs, kasi hindi naman lahat ng baboy affected ng ASF. Kaya ‘yung healthy pigs, pinapayagan namin... but it does not go out of the barangay... para hindi kumalat ‘yung ASF,” saad ni Odsey.

Una nang na-detect ang ASF sa 493 lungsod at munisipalidad sa 12 rehiyon, ayon ito kay Pangulong Rodrigo Duterte noong Mayo ng nakaraang taon, kung saan nagdeklara siya ng nationwide state of calamity dahil sa ASF.

Outbreak sa Cotabato... 1 dosenang baboy patay sa ASF

ni Lolet Abania | November 8, 2021

Tinamaan ng African swine fever (ASF) habang nagkaroon ng outbreak sa pitong lugar sa M’lang, Cotabato nito lamang weekend, ayon sa isang opisyal ng lokal na pamahalaan ng nabanggit na bayan.

Sinabi ni M’lang Vice Mayor Joselito Piñol, nasa tinatayang isang dosena ng mga baboy ang pinatay dahil sa ASF.

Aniya, unang nai-report ang ASF sa New Antique at New Lawaan habang kumalat na ito sa limang kalapit na lugar.

Sa ngayon, mahigpit na binabantayan ang mga apektadong villages, kung saan ang mga borders nito ay pansamantalang isinara para mapigilan ang pagpasok at paglabas ng mga buhay na baboy at maiwasan ang pagdami pa ng tatamaan ng ASF na ibang lugar.

“In Barangay New Antique alone, at least 8 pigs died last week and there are also reported deaths in nearby Baranggay New Lawaan,” ani Piñol sa isang radio interview.

Iniutos na ng bise alkalde ang pagkakatay muna ng lahat ng mga baboy na para sa commercial use o ibinibenta upang hindi na kumalat pa ang ASF.

Ayon kay Piñol, nasa 20 baboy ang nakaiskedyul na katayin sa double A slaughterhouse ng naturang bayan.

Hinala ng vice mayor, ang virus ay nanggaling sa processed meat na chorizo na binili mula sa isang ambulant vendor ng apektadong hog raisers sa Barangay New Antique.

“We conducted investigation and we found out that those raising hogs in these areas are using feeds in growing their hogs. However, a hog raiser that was severely affected with the ASF confessed that a leftover processed meat was fed to some of the pigs,” sabi ni Piñol.

Sinabi pa ni Piñol na imumungkahi na rin niya sa municipal council sa regular session nito sa Miyerkules na ang M’lang ay isailalim sa state of calamity. Sa ganitong paraan, mapapayagan ang nasabing bayan na gamitin ang 5% Quick Response Funds na nagkakahalaga ng humigit-kumulang na P20 milyon upang agad makatulong sa mga apektadong hog raisers.

Dagdag ng opisyal, nakatakda niyang isangguni ito sa Department of Agriculture Regional Office 12 at sa Cotabato provincial government para sa posibleng financial aid sa mga apektadong hog raisers.