AFP, magha-hire ng “cyber warriors”

ni Eli San Miguel - Trainee @News | October 20, 2023

Kinonsidera ng Armed Forces of the Philippines ang pagre-recruit ng “cyber warriors" upang protektahan ang kanilang mga online network mula sa mga cyber attack.

Ayon kay Armed Forces of the Philippines (AFP) Chief General Romeo Brawner Jr., ang 200,000 hukbo ng Pilipinas, kasama na ang kanyang reserve force, ay handa para sa mga karaniwang kalaban ngunit kinakailangan din ang suporta mula sa mga propesyonal na kayang matiyak ang kaligtasan ng AFP mula sa kapahamakan sa pag-atake sa online websites nito.

Kasabay nito, plano rin ng militar na i-upgrade ang kanilang Cyber Security Group tungo sa Cyber Security Command, ayon kay Chief Brawner, Jr..

Hinggil sa pagkuha ng cyber warriors, sinabi ni Brawner sa isang panayam matapos ang isang Foreign Correspondents Association of the Philippines (FOCAP) forum noong Huwebes na hindi maskuladong indibidwal ang kailangan nila kundi mga talentadong empleyado para sa kanilang proyekto.

"This time, we will recruit cyber warriors," wika ni Brawner. "We will be looking for talented, skilled individuals.. They might not be competent to pass the regular recruitment procedures and requirement, so we are relaxing them (requirements) a bit just like in other countries."

Sa kanyang pakikipag-ugnayan sa mga kapwa niya opisyal sa ibang bansa, sinabi ni Brawner na ito ay tila uso sa iba pang mga military organization.

"There is that general realization that these new breed of warriors do not necessarily have to be muscled, strong. What we need are individuals who are intelligent, very skillful in the cyber domain," ani Brawner.

BRP Sierra Madre sa Ayungin Shoal, 'di isusuko

ni Mylene Alfonso @News | August 14, 2023

Mahigpit ang pagtutol ni Senador Bong Go sa anumang potensiyal na kasunduan na alisin ang BRP Sierra Madre mula sa Ayungin Shoal.

Inihayag ito ng mambabatas sa isang panayam noong Biyernes matapos ang monitoring visit sa Malasakit Center sa Catbalogan City, Samar.

Sinegundahan pa ni Sen. Go ang paglilinaw ni Pangulong Ferdinand Marcos, Jr. na walang anumang kasunduan hinggil sa isyu, at kung mayroon man ay binabawi o kinakansela na niya ito.

"Unang-una, hindi po ako aware kung meron man agreement o wala na dapat nang i-withdraw ang BRP Sierra Madre sa Ayungin Shoal," pahayag pa ni Go, nang matanong hinggil sa naturang pahayag ni P-BBM, kaugnay ng umano'y kasunduan sa pagitan ng pamahalaan at ng China upang alisin ang BRP Sierra Madre mula sa Ayungin Shoal.

"Kung ano po ang atin ay atin. What is ours is ours po. At bilang Pangulo, si Pangulong Bongbong Marcos bilang chief architect ng ating foreign policy, ay alam niya po kung ano po ang mas makakabuti sa atin considering all things,” dagdag pa ng senador.

“Katulad ng sinabi ko noon not a single square inch ang isu-surrender natin d’yan. What is ours, is ours po,” giit pa ng mambabatas.

Matatandaang kamakailan ay binomba ng tubig ng Chinese Coast Guard ang Filipino vessels sa West Philippine Sea.

Anang China, pumayag umano ang Pilipinas na i-withdraw ang BRP Sierra Madre ngunit hindi tinukoy kung sinong lider ng gobyerno o ahensiya ang nangako nito sa kanila.

Kapwa naman itinanggi ng Malacañang at ng Department of Foreign Affairs (DFA) ang pahayag ng China.

Barkong nakaangkla sa WPS kapag inalis.. 'Pinas, papalag na sa China — AFP

ni Mai Ancheta @News | August 13, 2023

Ilalaban ng Armed Forces of the Philippines (AFP) ang BRP Sierra Madre sakaling puwersahang alisin ito ng China sa Ayungin Shoal.

Ito ang mariing inihayag ni AFP Spokesman Colonel Medel Aguilar sa isang forum sa harap ng mainit na isyu sa BRP Sierra Madre na nakaangkla sa Ayungin Shoal na bahagi ng teritoryo ng Pilipinas.

Ayon kay Aguilar, bagama't ang scenario ay "speculative" o haka-haka, hindi hahayaan ng militar na galawin ang kinakalawang na barko ng Pilipinas sa Ayungin Shoal.

Nagsalita na aniya si Pangulong Ferdinand Marcos, Jr. na hindi aabandonahin ang Ayungin Shoal, kaya ito ang ipatutupad ng militar.

Matatandaang nagsalita ang Presidente na walang ano mang kasunduan sa China para alisin ang barko ng Pilipinas sa pinag-aagawang teritoryo kaya mananatili ang BRP Sierra Madre sa isla.

Tiniyak din ng AFP Spokesman na magpapatuloy ang resupply mission sa kanilang tropa na nakadestino sa Ayungin Shoal kaya dapat na kumilos nang naaayon ang China Coast Guard sa halip na gumawa ng mga aksyon na labag sa international law at magdulot ng panganib sa buhay ng mga tao.

Sinabi ni Aguilar na lalatay sa China Coast Guard ang kanilang ano mang magiging aksiyon at sila ang sisisihin sakaling magkaroon ng disgrasya sa karagatan.

Matatandaang umani ng batikos at pagkondena mula sa iba't ibang bansa ang paggamit ng water cannon ng China Coast Guard sa barko ng Philippine Coast Guard (PCG) matapos harangin ang resupply mission sa BRP Sierra Madre noong nakalipas na linggo.