Pagbomba sa MSU, maaaring simula ng pagsalakay — AFP

ni Angela Fernando - Trainee @News | December 3, 2023

Nagpahayag ang namumuno sa Philippine military nitong Linggo, Disyembre 3, na maaaring simula ng pagsalakay ang pambobombang nangyari sa gitna ng misa sa gymnasium ng Mindanao State University sa Marawi City bilang ganti sa mga serye ng operasyong militar laban sa tatlong grupo ng mga terorista.

Ayon kay Armed Forces of the Philippines (AFP) Chief of Staff General Romeo Brawner Jr., ang naganap na insidente ay nangyari 2 araw matapos tapusin ng mga puwersang Western Mindanao Command ang 11 miyembro ng teroristang grupong Dawlah Islamiyah, kasama ang kinikilalang emir na si Abdullah Sapal, sa Datu Hoffer Ampatuan, Maguindanao del Sur.

Sa ikalawa at hiwalay na operasyong militar ng Joint Task Force Orion, kanilang napatay ang namumuno sa Abu Sayyaf na si Mundi Sawadjaan, ang sinasabing utak ng pagbombang nangyari nu'ng taong 2020 sa bandang Jolo.

Isang ikatlong operasyon naman ang isinagawa ng 103rd Infantry Brigade sa Piyagapo, Lanao del Sur nu'ng Linggo na nagresulta rin sa pagkakapatay sa isa pang lider ng teroristang grupo.

Saad ni Brawner, maaaring 'retaliatory attack' ang nangyari sa MSU resulta ng mga nasabing operasyon sa Western Mindanao dito sa Maguindanao, sa Lanao at sa Basilan.

Samantala, patuloy ang mga awtoridad sa pagiimbestiga sa insidente upang mabigyang hustisya ang mga naging biktima ng pagsabog.

Walang banta laban sa administrasyong Marcos — AFP

Filni Angela Fernando - Trainee @News | November 4, 2023

Ayon sa Armed Forces of the Philippines (AFP), wala silang nakikitang banta sa seguridad ng bansa sa kabila ng umano'y planong gulo at banta sa kapayapaan na idinidikit sa mga retiradong sundalo upang alisin sa puwesto si Pangulo Ferdinand "Bongbong" Marcos Jr., ngayong Sabado.

"Wala kaming nakikitang gano'n. There is no credible threat to our security," ani ng tagapagsalita ng AFP na si Col. Medel Aguilar.

Hinikayat naman ni AFP Chief General Romeo Brawner Jr. na umiwas ang mga kasalukuyang nasa serbisyo sa mga diskusyon ng gulo na sinasabing plano ng mga retiradong sundalo nang siya'y namuno sa seremonya ng pagpapalit ng komando at hepe ng tanggapan ng Western Mindanao Command (WestMinCom) at Inspector General (IG) sa Camp Navarro sa Zamboanga City nu'ng Biyernes, Nobyemre 3.

Ito ay matapos pumutok ang inilahad ni Brawner sa destabilisasyong pinaplano umano ng mga dating sundalo sa ilalim ng administrasyong Marcos.

Saad ni Aguilar, nagkamali lang ng pagkakasabi si Brawner sa kanyang pahayag.

Dagdag niya, pinaalalahanan din ni Brawner ang AFP na manatiling tapat sa kanilang paglilingkod sa bayan.

Seguridad para sa BSKE, kasado na

ni Eli San Miguel - Trainee @News | October 29, 2023

Naihanda na ang lahat ng mga hakbang sa seguridad upang tiyakin ang ligtas, malaya, at maayos na Barangay and Sangguniang Kabataan Elections (BSKE) sa Lunes, Oktubre 30.

Ayon sa Armed Forces of the Philippines (AFP) at Philippine Coast Guard (PCG), handa silang tumulong sa Philippine National Police (PNP) sa pag-aasikaso ng mga presinto ng botohan, mga tauhan ng halalan, at mga botante.

Kabuuang 117,000 military personnel at 20,000 coast guardians ang itinataguyod sa buong bansa, lalo na sa 361 na mga lugar ng halalan na tinukoy ng Joint Peace and Security Coordinating Council (JPSCC).

Nauna nang inihayag ng PNP na may kabuuang 187,600 pulis ang inatasan para sa mga responsibilidad sa halalan.

Samantala, sinabi ni PCG Commandant Admiral Ronnie Gil Gavan na bahagi ng kanilang pagkakatalaga ang mga intelligence operative, K9 units, mga tauhan ng PCG at PCG Auxiliary na may tungkulin na magpatupad ng mahigpit na seguridad sa mga pantalan at mag-asikaso ng mga helpdesk na itinayo ng Department of Transportation (DOTr).

Itinaas ng PCG ang kanilang status sa "full alert" mula Oktubre 25 hanggang Nobyembre 5 upang tiyakin ang maayos na operasyon ng mga pasilidad ng transportasyon sa dagat at ang maginhawang paglalakbay ng mga biyahero.

Mula alas-12 ng hatinggabi hanggang alas-6 ng umaga ng Linggo, mino-monitor ng PCG ang 27,530 na mga pasahero na palabas at 28,532 na mga pasahero na pabalik sa lahat ng mga pantalan sa buong bansa.