Suspek sa MSU bombing, arestado

ni Eli San Miguel - Trainee @News | December 8, 2023

Ibinunyag ng Armed Forces of the Philippines (AFP) na nahuli ng mga puwersa ng pamahalaan ang isang suspek sa pambobomba sa Mindanao State University (MSU) sa Marawi City, ngayong Biyernes.

Sabay na nahuli ng pwersa ng Military Task Force Marawi at Marawi City Police si Jafar Gamo Sultan, kilala rin bilang "Jaf/Kurot," na tinukoy ng militar bilang kasabwat sa pagsabog noong Disyembre 3 sa Dimaporo Gymnasium ng MSU, na nagresulta sa apat na namatay at 72 na sugatan.

Sinabi ni Col. Xerxes Trinidad, hepe AFP public affairs office, na nahuli si Sultan sa isang operasyon sa Brgy. Dulay Proper, Marawi City noong Miyerkules, Disyembre 6.

"The suspect is a companion of a certain Omar, the person identified by witnesses to have placed the improvised explosive device at the Dimaporo Gymnaisum," sabi ni Trinidad ngayong Biyernes.

Naglabas ang AFP ng isang 1 minuto at 56 segundo na footage ng (CCTV) na nagpapakita ng isang kahina-hinalang lalaki na may suot na cap at itim na hoodie, inaakalang si Sultan, na pumasok sa Dimaporo Gymnasium ng 6:09 ng umaga noong araw ng pagsabog.

Makikita sa footage na alas-6:13 ng umaga lumabas ang lalaki sa gymnasium.

Pumasok sa gymansium ang isa pang kahina-hinalang lalaki na may suot na puting polo at cap, hinihinalang si alias Omar, na may hawak na bag alas-7:03 ng umaga. Pagkatapos, bumalik ang lalaki na may suot na itim na hoodie sa pintuan ng gymnasium.

Alas-7:11 naman ng umaga lumabas ang lalaki na may puting polo mula sa gymnasium nang hindi dala ang kanyang bag kasama ang lalaking may itim na hoodie. Isang minuto pagkatapos, naganap ang pagsabog.

Ipinalabas din ng CCTV footage na tila pumipindot ng isang triggering device ang lalaki na may puting polo.

Sinabi ni Trinidad na narekober din ng puwersa ang dalawang motorsiklo mula sa naarestong suspek.

Samantalang iba ang naarestong suspek sa dalawang lalaki na naunang kinilala ng Philippine National Police (PNP) bilang mga suspek sa pagsabog sa Marawi.

Itinuturing ng PNP na kanilang mga suspek sina Kadapi Mimbesa o kilala rin bilang "Engineer," at Arsani Mimbesa o kilala rin bilang "Katab/Papitos."

2 suspek sa pagbomba sa Marawi, tukoy na

ni Angela Fernando - Trainee @News | December 5, 2023

Natukoy ng Armed Forces of the Philippines (AFP) ang dalawang persons of interest sa pambobombang naganap nu'ng Disyembre 3 sa Mindanao State University sa Marawi.

Saad ni AFP spokesman Col Medel Aguilar, "Itong dalawang ito ay pinaghahanap at pinaniniwalaan na kasapi ng remnant ng isang local terrorist group na alam naman natin na nag-o-operate doon sa area na iyon."

Tumanggi siyang pangalanan ang dalawa ngunit ipinaalam na patuloy ang mga awtoridad sa paghahanap sa mga sinasabing suspek sa insidente.

Aniya, nagkaroon sila ng persons of interest dahil sa koordinasyon ng school at sa mga witnesses na makakapag-describe sa mga posibleng salarin ng nangyaring pagsabog.

Binigyang-diin din ni Aguilar na hindi tinanggap ng mga awtoridad ang pahayag ng teroristang grupo ng Islamic State na sila ang may pananagutan sa pagsabog, kahit na sa pahayag ng AFP ay wala nang dayuhang teroristang grupo na nasa bansa.

Bomb threat messages, kumalat bago ang pagpapasabog sa MSU — BARMM

ni Angela Fernando - Trainee @News | December 4, 2023

Kinumpirna ng pamahalaang Bangsamoro na may mga kumalat na mensaheng may banta ng pambobomba nu'ng gabi bago maganap ang mapaminsalang pagsabog sa Dimaporo Gymnasium ng Mindanao State University (MSU) sa Marawi City.

Ayon kay Bangsamoro Autonomous Region in Muslim Mindanao (BARMM) spokesperson Naguib Sinarimbo, may mga kumakalat nang mga mensahe nu'ng Sabado ngunit hindi nililinaw sa mensahe kung saan ito gagawin.

Aniya, kailangan talaga itong tingnan nang maigi para makita ang tunay na ugat ng pambobombang naganap.

Saad naman ni Sinarimbo, may mga ulat na nagsasabing ang Islamic State ang nasa likod ng pagsabog.

Agaran itong iniimbestigahan ng Armed Forces of the Philippines (AFP) kasabay ng pagtingin sa posibleng pagkakasangkot ng Dawlah Islamiyah-Maute Group sa atake na ikinasawi ng marami.

"Ang AFP ay nagba-validate ng mga pahayag ng ISIS sa mga kamakailang ulat pati na rin ang pagkakasangkot ng DI-Maute Group sa karumaldumal na gawang terorismo na ito," ani Colonel Xerxes Trinidad, pinuno ng tanggapan ng public affairs ng AFP.

Nagpahayag ang mga otoridad na nakilala na ang higit sa dalawang "persons of interest" sa likod ng pagsabog bukod sa dalawang grupong nabanggit.

“Meron kaming persons of interest and one of our persons of interest pointed on 'yung local terrorist,” ayon kay Bangsamoro Police Regional Office chief Police Brigadier General Allan Nobleza.

Dagdag ni Nobleza, kasalukuyan pang iniimbestigahan ang mga persons of interest at tumangging pangalanan ang mga ito upang hindi makaapekto sa imbestigasyon.