Utos ni P-Du30, sinunod... 9 na aktibista, patay, 6 arestado sa raid sa Calabarzon

ni Mary Gutierrez Almirañez | March 7, 2021

Siyam na aktibista ang namatay habang 6 ang arestado sa isinagawang raid ng Philippine National Police (PNP) at Armed Forces of the Philippines (AFP) sa Calabarzon kaninang umaga, Marso 7, ayon sa Police Regional Office 4A.

Batay kay PRO4A PIO Chief Police Lieutenant Colonel Chitadel Gaoiran, may dalang warrant of arrest mula sa Manila Regional Trial Court Branch 4 ang mga awtoridad nang isagawa ang operasyon kung saan nakuha ang mga pampasabog mula sa bahay ng ilang aktibista at umano’y nanlaban sila sa pulisya.

Kabilang sa mga namatay ang mag-asawang sina Chai at Ariel Evangelista na miyembro ng Ugnayan ng Mamamayan Laban sa Pagwawasak ng Kalikasan at Kalupaan, sina Makmak Bacasno at Michael "Greg" Dasigao ng SIKKAD-K3 Kdmay Montalban, at si Emmanuel "Manny" Asuncion, ang Secretary General ng Bagong Alyansang Makabayan-Cavite. Samantala, inaalam pa ang pagkakakilanlan ng iba.

Sa tala ng pulisya, isa ang namatay sa Cavite, 2 sa Batangas at 6 sa Rizal, habang tatlo ang arestado mula sa Laguna, gayundin sa Rizal.

Kaugnay nito, ang nangyaring operasyon ay alinsunod lamang sa ipinahayag ni Pangulong Duterte noong ika-5 ng Marso, "I've told the military and the police, that if they find themselves in an armed encounter with the communist rebels, kill them, make sure you really kill them, and finish them off if they are alive."

Intelligence Major General Luna, sinibak sa palpak na listahan ng mga napatay na NPA

ni Lolet Abania | January 28, 2021

Sinibak na sa puwesto ni Department of National Defense (DND) Secretary Delfin Lorenzana si Deputy Chief of Staff for Intelligence Major General Alex Luna dahil sa lumabas na maling listahan ng mga NPA na napatay ng militar.

Epektibo ngayong araw, Enero 28, 2021, ang pagtanggal sa posisyon kay Luna.

Sinabi ni Lorenzana na sa opisina ni Luna sa J2 nanggaling ang maling listahan ng mga rebeldeng napatay ng militar. Ipinaliwanag ng kalihim na isa itong kapabayaan sa trabaho na hindi maaaring palagpasin kaya nararapat lamang na siya ay managot sa napakalaking pagkakamali.

Matatandaang umani ng matinding batikos ang AFP matapos lumabas ang mali-maling listahan ng mga NPA na napatay ng militar kung saan mali ang pangalan na nakalagay habang ang iba naman ay buhay pa talaga.

"I am relieving MGen Alex Luna from his post as Deputy Chief of Staff for Intelligence, J2, effective today (28 Jan 2021). The publication of an erroneous list, originating from his office OJ2, of alleged NPA killed by the military is an unforgivable lapse. His negligence only shows a lackadaisical attitude towards his job resulting to confusion and damage to reputation. We do not take these offenses lightly and I want to hold the people involved accountable,” ayon kay Lorenzana.

18 Top Universities, pugad ng recruitment ng NPA – Parlade

ni Lolet Abania | January 23, 2021

Pinangalanan na ng isang opisyal ng Armed Forces of the Philippines (AFP) ang mga kilalang unibersidad at kolehiyo sa bansa na kabilang sa 18 institusyon na sinasabing ‘kanlungan’ ng communist recruitment.

Sa isang interview ngayong Sabado kay Lieutenant General Antonio Parlade Jr., spokesman ng National Task Force to End Local Communist Armed Conflict (NTF-ELCAC), sinabi niyang mayroon nang listahan ang militar ng tinatayang 18 colleges at universities, karamihan dito ay nasa National Capital Region, kung saan nagaganap umano ang communist recruitment activities.

Ayon kay Parlade, bukod sa University of the Philippines (UP), ang mga learning institutions na ginagawa ring recruitment haven umano para sa mga komunista ay ang The Polytechnic University of the Philippines (PUP), Far Eastern University (FEU), Ateneo de Manila University (ADMU), University of Santo Tomas (UST), Pamantasan ng Lungsod ng Maynila (PLM), De La Salle University (DLSU), University of Makati.

Sinabi pa ni Parlade na dahil sa DND-UP accord, nagkaroon ng balakid sa pagkumpirma ng militar sa nangyayaring communist recruitment, subalit aniya, tama lang na tinapos na ang naturang kasunduan.

"Mas mapag-aaralan ang nangyayaring recruitment ng CPP-NPA (Communist Party of the Philippines-New People's Army) sa UP matapos maibasura ang UP-DND Accord," ani Parlade.

Sa hiwalay na interview kay Dr. Elena Pernia, vice-president ng Public Affairs ng UP, sinabi niyang bukas ang administrasyon ng paaralan para sa isang dayalogo sa Department of National Defense (DND) upang pag-usapan ang ginawang termination accord ng DND.

Gayunman, nais ni Pernia na maglatag sila ng tamang impormasyon tungkol sa mga estudyante umano nila na nire-recruit para sa communist insurgency.

“Gaya ng sinabi na namin, ang UP naman, laging open sa dayalogo, lalo na sa mga bagay na pareho nito,” sabi ni Pernia.

Matatandaang si UP president Danilo Concepcion ay nagpadala ng isang liham kay DND Secretary Delfin Lorezana, kung saan hinimok nito ang DND na muling isaalang-alang ang revocation ng 1989 pact sa unibersidad. Iminungkahi rin ni Concepcion kasama ang mga opisyal ng eskuwelahan at ng Defense chief na pag-usapan ang tungkol dito sa mapayapa, makatarungan at mahusay na pagpapasya.