Cellphone sa mga kulungan, dapat lang ipagbawal

ni Ryan Sison @Boses | Nov. 21, 2024

Bilang bahagi ng pinaigting na security protocols, bawal na ang mga cellphone sa mga bilangguan sa bansa. 

Ito ang ipinag-utos ni Bureau of Corrections (BuCor) Director General Gregorio Catapang Jr., ang pagpapatupad ng “no cellphone policy” sa lahat ng operating prisons at penal farms (OPPFs) sa buong bansa, dahil na rin aniya sa mga report na nananatiling source ng drug trade ay galing sa New Bilibid Prison (NBP).

Ayon kay Catapang, sakop ng naturang polisiya ang mga bisita, commissioned officer, non-commissioned officer, civilian personnel at iba pang indibidwal na pumapasok sa bisinidad ng mga opisina ng BuCor, NBP camps at lahat ng kulungan.

Binigyang-diin din ng opisyal na anumang mga cellphone o kaugnay na device na matuklasan ay kukumpiskahin nila para sa wastong dokumentasyon at disposisyon.

Habang maaari namang mapatawan ng administrative at criminal sanctions ang sinumang personnel na sangkot sa hindi awtorisadong pagpasok o paggamit ng mga cellphone.

Sinabi ni Catapang na alam niyang maraming magrereklamo na mga personnel sa bagong polisiya pero kailangang gawin ito para talagang wala ng makagamit ng cellphone sa loob ng bilangguan. 

Inatasan na rin niya ang lahat ng superintendents hinggil sa pagpapaigting ng security screening at mahigpit na inspeksyon sa lahat ng entry at exit points para maiwasan ang pagpupuslit ng cellphones. 

Iniutos na rin niya ang pagbili ng mga two-way radios bilang alternatibong paraan ng komunikasyon para sa mga tauhan.

Aniya pa, magkakaroon naman ng random inspections sa mga prison dormitory at work areas ng BuCor personnel para sa naturang devices.

Mas makabubuti na ngang ipagbawal ang mga cellphone sa mga kulungan dahil madalas na pinagmumulan at humahantong ang mga ito sa masamang gawain.

Sa halip kasi na gamitin bilang komunikasyon sa pagitan ng mga preso at pamilya, mga opisyal, kawani at iba pa, ay nagiging tulay pa ang mga cellphone sa mga ilegal na transaksyon, halimbawa na rito ang matinding kalakalan ng droga.

Hindi rin naman siguro kalabisan para sa mga personnel at opisyal ng mga prison at penal farms na wala muna silang cellphone habang nasa loob ng mga bilangguan at nagtatrabaho, at nang sa gayon ay gawin din silang ehemplo mismo ng mga preso, bisita, at kanilang mga tauhan.

Marahil sa ganitong paraan, magiging mas maayos at kahit paano ay makakaiwas sila sa mga ilegal na aktibidad sa ating mga bilangguan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Taas-presyo nagbabadya dahil sa mga bagyo, kapit lang

by Info @Editorial | Nov. 21, 2024

Pinangangambahan ng Department of Agriculture (DA) na muling sumipa ang presyo ng gulay at mga pangunahing bilihin sa bansa.

Ito ay dahil na rin sa magkakasunod na pagtama at pananalasa ng mga bagyo.

Malabo rin umanong makabalik agad ang maayos na suplay dahil sa mga mapaminsalang bagyo. Kung saan, naapektuhan ng sama ng panahon ang major producers ng lowland vegetables. Kinabibilangan ito ng Cagayan Valley, Central Luzon, at maging ang Southern Luzon.

Siniguro naman ng ahensya na ang mataas na presyo ng gulay ay hindi aabot sa Pasko.

Ang ganitong problema ay hindi madali, kailangan ng gobyerno na maglatag ng mga hakbang upang matulungan ang mga magsasaka na makabangon mula sa mga pinsala dulot ng bagyo. 

Mahalaga rin ang pagpapalawak ng mga disaster relief programs at incentives upang mapabilis ang rehabilitasyon ng mga taniman. 

Hindi rin sapat na magbigay lamang ng pansamantalang ayuda — kailangan ng long-term solutions upang maiwasan ang paulit-ulit na epekto ng mga kalamidad sa ating agrikultura.

Sa huli, ang pagtataas ng presyo ng gulay ay isang paalala na ang ating mga magsasaka at ang sektor ng agrikultura ay may malalim na epekto sa ating pang-araw-araw na buhay. 

Dapat tayong magtulungan upang mapabuti ang kalagayan ng ating agrikultura at matulungan ang ating mga kababayan na higit na nangangailangan ng suporta sa panahon ng krisis.

Horoscope | November 21, 2024 (Huwebes)

ni Maestro Honorio Ong @Horoscope | Nov. 21, 2024

Sa may kaarawan ngayong Nobyembre 21, 2024 (Huwebes): Panatilihin mong nakasayad ang mga paa mo sa lupa. Huwag mong kalimutan ang mga taong nakatulong sa iyong pag-angat.

ARIES (Mar. 21-Apr. 19) - Itataas ka pa ng iyong kapalaran. Higit na mas mataas kesa sa iyong mga pangarap. Ito ay dahil na rin hindi ka huminto sa pagsisikap upang ikaw ay umunlad. Masuwerteng kulay-burgundy. Tips sa lotto-9-20-25-27-37-43.

TAURUS (Apr. 20-May 20) - Hindi ka dapat matulad sa mga taong naghahangad na mabigyan ng suwerte na sa huli ay puro lamang pagsisisi. Tandaan mo, walang masama sa unti-unting pagpupundar ng kabuhayan. Masuwerteng kulay-white. Tips sa lotto-4-11-14-18-21-30.

GEMINI (May 21-June 20) - Pakinggan mo ang payo ng mga kaibigan mo. Higit ka nilang kilala kesa sa iyong sarili at sila ang lubos na nakakaalam kung ano ang iyong kahinaan. Masuwerteng kulay-green. Tips sa lotto-5-19-25-28-31-42.

CANCER (June 21-July 22) - Ididikit ka ng iyong kapalaran sa mga taong angat sa buhay. Kung sakaling magpasya ka na  magkaroon ng malalim na relasyon, agad kang sasang-ayunan ng langit. Masuwerteng kulay-yellow. Tips sa lotto-8-14-16-26-28-33.

LEO (July 23-Aug. 22) - Nakaabang sa landas ng buhay mo ang maraming suwerte na kung makikita kang mapagmahal sa mahihirap at mga kapuspalad, agad na magsisidapo sa iyo ang mga suwerteng may kaugnayan sa materyal na bagay. Masuwerteng kulay-purple. Tips sa lotto-2-10-15-17-20-25.

VIRGO (Aug. 23-Sept. 22) - Ito ang araw na dapat ay mapag-obserba ka dahil ang mga oportunidad ay lalagay sa harapan mo ngayon. Sunggaban mo agad at huwag kang mag-alinlangan. Masuwerteng kulay-pink. Tips sa lotto-5-14-23-27-34-42.

LIBRA (Sept. 23-Oct. 22) - Kung ibababa mo ang mataas mong personalidad, agad na dadapo sa iyong kapalaran ang isang taong panggagalingan ng iyong mga buwenas. Siya mismo ang pampasuwerte mo ngayon. Masuwerteng kulay-beige. Tips sa lotto-6-15-18-22-29-33.

SCORPIO (Oct. 23-Nov. 21) - Huwag mong layuan ang mga taong nilalapit sa iyo ng iyong kapalaran. At huwag mong ipagpilitan na lumapit sa mga taong wala namang interes sa iyo. Itongayon ang gawin mong gabay sa buhay mo. Masuwerteng kulay-blue. Tips sa lotto-3-14-19-24-27-35.

SAGITTARIUS (Nov. 22-Dec. 21) - Iyung-iyo ang araw na ito. Sinuman ang magtangka na bigyan ka ng kalungkutan, ay agad magiging malungkot. Masuwerteng kulay-black. Tips sa lotto-5-11-20-28-31-45.

CAPRICORN (Dec. 22-Jan. 19) - Sakyan mo lang ang agos ng iyong kapalaran at tiyak na sa huli ay mamamangha at hindi ka makakapaniwala na yakap-yakap mo na pala ang talagang para sa iyo. Masuwerteng kulay-violet. Tips sa lotto-1-9-15-27-41-44.

AQUARIUS (Jan. 20-Feb. 18) - Kasing bilis ng hangin ang mga suwerte mo ngayon. Kunsabagay, noon pa man ay naranasan mo na ang ganito. Masuwerteng kulay-peach. Tips sa lotto-17-21-26-30-38-45.

PISCES (Feb. 19-Mar. 20) - Ito ang araw na inaanyayahan ka ng nasa itaas na ilista ang mga gusto mong gawin at mangyari sa iyong buhay. Masuwerteng kulay-red. Tips sa lotto-4-11-18-27-32-37.