Booster shots, marami pa… 40 bilyon, halaga ng mae-expire na bakuna

ni Zel Fernandez | April 20, 2022

Posible umanong umabot sa 40 bilyong piso ang halagang masasayang sa oras na mag-expire ang mga bakuna sa bansa.

Kasabay ng pangambang malapit nang mag-expire ang ilan sa mga bakuna, muling nanawagan ang pamahalaan sa mga mamamayan na magpa-booster shot na bilang pag-iingat mula sa babala ng Department of Health na posible umanong tumaas na naman ang kaso ng COVID-19 sa bansa pagsapit ng Mayo.

Ani Sec. Joey Concepcion, presidential advisor for entrepreneurship, sa kasalukuyan ay mayroong 80 milyong bakuna sa bansa at tinatayang 27 milyon sa mga ito ang mae-expire na pagsapit nang Hunyo at Hulyo ngayong taon.

Giit ni Sec. Concepcion, bagaman ang donated vaccines ng Covax sa ‘Pinas na aabot sa halos 30 milyong piso at maging ang kanilang donasyong bakuna na tinatayang aabot sa 2.5 bilyong piso ay hindi gastos ng gobyerno, posible umanong umabot sa 40 bilyong piso ang masasayang kung hindi magagamit ang mga ito, partikular ang mga booster shots na kakaunti pa rin ang nagpapaturok sa kasalukuyan.

Dagdag pa rito, sakali umanong biglang makapagpasya ang marami na magpabakuna, maaaring maging mahirap na ang pagkuha nito kapag nawalan ng supply dahil nag-expire na ang mga bakunang naka-stock.

Gayundin, dahil aniya sa kasalukuyang sitwasyon sa bansa na halos kakaunti lamang ang nais magpabakuna, posible umanong mag-alinlangan ang susunod na administrasyon na bumili ng mga bakuna sa panghihinayang na baka maulit lamang ang senaryo ng pagka-expire ng mga ito.

Bilang paalala, muli umanong pinapayuhan ang mga hindi pa nakapagpapabakuna na magpaturok na hangga’t mayroon pang supplies at hindi pa expired ang mga bakuna na makatutulong sa paglaban sa nakamamatay na sakit.

PBA Finals Game 6, suspendido dahil sa sunog

ni Zel Fernandez | April 20, 2022

Sinuspinde ng Philippine Basketball Association ang Finals Game 6 sa pagitan ng koponan ng Meralco Bolts at Brgy. Ginebra San Miguel dahil sa naganap na sunog sa Smart Araneta Coliseum.

Laylay-balikat na uuwi ang mga nag-aabang na PBA fans ng Meralco at Ginebra, matapos ianunsiyo ng PBA na suspendido ang laro ng dalawang koponan sa Cubao Araneta Coliseum, mamayang gabi.

Sa opisyal na pahayag ng PBA sa kanilang Facebook page, pasado alas-3 nitong hapon, inilabas ang Finals Game 6 Advisory para ipabatid sa mga fans na bumili ng ticket na postponed ang pinakaaabangang basketball game ngayong gabi.

Ayon sa naturang post, “Earlier today, a fire broke out at the Smart Araneta Coliseum. With the safety of all in mind, the PBA has decided to postpone the 46th Season Governor’s Cup Finals Game 6 between Barangay Ginebra San Miguel and Meralco Bolts tonight.

All Smart Araneta Coliseum Game 6 ticket holders can refund their ticket purchases at the Big Dome’s ticketing office.”

Bagaman, naapula ng mga bumbero ang sunog may ilang oras bago ang inaantabayanang 6 p.m. tipoff, ani PBA Commissioner Willie Marcial, "ayaw nating ipagsapalaran ang kaligtasan ng mga fans, ng mga players at mga game staff. Better safe than sorry”.

Inaasahan namang matutuloy ang Game 6 sa Biyernes sa Mall of Asia Arena, Pasay City.

BOC, DA at DTI, joint force… Smuggled carrots, nasabat sa Divisoria

ni Zel Fernandez | April 20, 2022

Sampung kahon ng smuggled na carrots ang nasabat sa pag-iinspeksiyon ng mga operatiba sa Divisoria, kagabi.

Tinatayang aabot sa halagang ₱8,000 ang mga smuggled carrots na nakumpiska ng Bureau of Customs, kasunod ng isinagawa nitong joint operations kasama ang Department of Agriculture at Department of Trade and Industry sa mga natitinda ng agricultural products sa Divisoria.

Sa mas pinaigting pang kampanya laban sa smuggling, ipinaliwanag ng DA na matagal na nilang tinututukan ang mga nagpupuslit ng mga imported agricultural products upang matulungan ang mga lokal na magsasakang nahihirapang makapagbenta ng kanilang mga aning gulay dahil sa matinding kumpetensiya sa merkado dulot ng mga imported goods.

“Marami na kaming nahuli sa pantalan hanggang dito sa second border. ‘Pag sinabi nating second border, du’n na sa mga cold storage mismo, sinusuyod natin ang mga cold storage,” pahayag ni Serapio Garabiles, Jr., inspection officer ng Department of Agriculture.

Ayon sa BOC, ipinupuslit umano ang mga imported na gulay kasama ng mga aprubadong produkto kaya minsan ay nakalulusot ito sa inspeksiyon sa mga pantalan.

Babala pa ng DA at BOC, hindi sila titigil sa pagsawata sa mga iligal na nagpupuslit ng mga gulay sa bansa upang higit pang maprotektahan ang mga lokal na magsasaka at mga mamimili, “tandaan ninyo ‘yan pati ang mga smuggler inaalam na namin. Dalawang beses na kaming nag-operate sa palengke, pagbibigay ‘to ng warning na hindi kami titigil. Ang pangatlong operation namin may kulong na”, ani Garabiles.

Dagdag naman ni Chief Alvin Enciso, MICP Customs Intelligence and Investigation Service, “pwede ho kayong tumakbo pero hahabulin at hahabulin po namin kayo. Sayang lang ho ‘yung gagastusin n’yo para mailabas. Pagdating mo sa mga palengke, sa mga warehouses, hahabulin pa rin ho namin ‘yon”.

Sasampahan sana ng kaso ang mga mahuhuling may-ari ng mga kumpiskadong produkto ngunit wala nang umangkin sa mga ito.