Sa kabila ng mga krisis na tumama sa agrikultura... Produksiyon ng palay at mais, lumago – PSA

ni Zel Fernandez | May 14, 2022

Batay sa tala ng Philippine Statistics Authority (PSA), bahagya umanong lumago ang produksiyon ng palay at mais sa bansa sa unang quarter ngayong 2022.

Ayon sa datos ng PSA, bagaman hindi nagkaroon ng paglago sa sektor ng agrikultura sa unang quarter ng taon, pagtuntong ng Pebrero 1, 2022 ay tumaas sa 4.64 na milyong metriko tonelada ang produksiyon ng palay na mas mataas nang 0.2 porsiyento kumpara sa produksiyon nito noong unang quarter ng taong 2021.

Bukod pa rito, naitala rin ang pagtaas ng produksiyon ng mais sa bansa nang 2.46 na milyong metriko tonelada na sinasabing mas mataas naman umano nang 0.7 porsiyento kumpara sa produksiyon nito noong unang quarter ng nakaraang taon.

Sa kabila nito, pinangangambahan naman ng Department of Agriculture ang pagbaba ng produksiyon sa mga pangunahing pananim sa mga susunod na buwan dahil anila sa patuloy na pagtaas ng produktong petrolyo, kasabay ng iba pang hamon sa sektor ng agrikultura.

Samantala, nananatiling positibo si Agriculture Secretary William Dar dahil bagaman may mga hamon sa sektor ng agrikultura tulad ng krisis dulot ng alitan ng Ukraine at Russia, at pananalasa ng Bagyong Odette ay maayos pa rin umano ang takbo ng produksiyon sa nasabing sektor.

Bawal din ang laging late at absent... Next senate president, dapat mahigpit pero may puso – Sotto

ni Zel Fernandez | May 14, 2022

Inilarawan ng kasalukuyang lider ng Senado na si Vicente Sotto III ang mga katangiang taglay dapat umano ng magiging susunod na Senate President of the Philippines.

Ayon kay Sotto, tukoy niya ang karakter ng nararapat na lider ng Mataas na Kapulungan, batay na rin sa siyam (9) na senate president na kanyang napagsilbihan, kung saan ang iba sa mga ito ang humubog umano sa kanya. Dahil dito, kaya umano niyang sabihin kung ano ang dapat na katangian ng magiging bagong pinuno sa Senado.

Paglalarawan ni Tito, isa sa mga katangiang dapat mayroon ang susunod na senate president ay ang mastery sa mga parliamentary rules at procedures ng Senado.

Gayundin, marapat umano na ito ay maituturing na consensus builder o tagapagtaguyod ng pagkakaisa sa kapulungan, independent minded, at mahigpit ngunit may puso.

Hindi rin dapat aniya laging late o absent ang susunod na lider na Mataas na Kapulungan para masabing ito ay karapat-dapat sa kanyang posisyon.

Samantala, kabilang umano sa mga nagpahiwatig ng kanilang interes na maging susunod na senate president ng 19th Congress sina Sen. Cynthia Villar, re-electionists Sen. Juan Miguel Zubiri at Sen. Sherwin Gatchalian, at ang nagbabalik sa Senado na si Sen. Chiz Escudero.

Gayunman, wala pa umanong pinal na desisyon kung sino na ang susunod na mauupong pangulo sa Senado.

Para sa OFWs at gov't employees... Housing program, alok ng NHA

ni Zel Fernandez | May 14, 2022

Hinikayat ng National Housing Authority (NHA)-Region 11 na mag-apply sa Government Employees Housing Program ang mga overseas Filipino workers (OFWs) at government employees sa bansa.

Makapagbigay ng disente at murang bahay, ito ang layunin ng nasabing programa para sa mga uniformed personnel ng gobyerno na kinabibilangan ng Armed Forces of the Philippines (AFP), Philippine National Police (PNP), Bureau of Jail Management and Penology (BJMP), Bureau of Fire Protection (BFP), Bureau of Corrections (BOC), at iba pang mga empleyado ng pamahalaan.

Ayon sa pahayag ng NHA, kabilang umano sa mga bahay na iniaalok sa naturang housing program ay mga two-storey duplex units na mayroon anilang sukat na 60 square meters ang floor area at 80 square meters ang lot size.

Pagbabahagi pa ng asosasyon, para sa mga kuwalipikadong aplikante ng kanilang programa ay nasa ₱5,000 ang pinakamababang monthly amortization at wala na umanong down payment.

Habang nasa ₱20,000 naman ang reservation fee kung saan ang unit ay handa na rin anilang tirahan.

Samantala, maaaring bisitahin ang NHA Facebook page upang malaman ang iba pang mga detalye ukol sa Government Employees Housing Program.