Scholarships para sa mga child development worker, popondohan ng 2025 budget

ni Kuya Win Gatchalian @Win Tayong Lahat | Dec. 24, 2024

Upang matulungan ang ating mga child development workers (CDWs) na maging mas epektibo sa kanilang tungkuling tutukan ang pangangailangan ng mga batang wala pang limang taong gulang, popondohan ng ating budget para sa taong 2025 ang scholarship ng mga kasalukuyang CDWs na hanggang high school lamang ang tinapos. 

Sa ilalim ng 2025 national budget, P80 milyon ang inilaan sa pondo ng Technical Education and Skills Development Authority o TESDA para sa naturang scholarships. Isinulong natin ang paglalaan ng pondong ito dahil hangga’t maaari, gusto nating iangat ang kakayahan ng ating mga CDWs. 

Sa 68,080 CDWs sa bansa, may 11,414 ang hanggang high school lamang ang tinapos. Inaasahan natin na may matutulungan tayong humigit-kumulang 2,854 CDWs gamit ang pondong inilaan sa 2025 national budget. Bagama’t hindi pa natin mabibigyan ng scholarships ang lahat ng 11,414 na mga CDWs na hanggang high school lamang ang tinapos, mahalagang simulan ang paglalaan natin ng pondo sa ilalim ng 2025 national budget.

Kamakailan ay inaprubahan na rin ng Senado ang ating panukalang Early Childhood Care and Development Act (Senate Bill No. 2575), kung saan isinusulong natin ang universal access sa early childhood education. Sa ilalim ng panukalang batas na ito, oobligahin ang mga kasalukuyang CDWs na sumailalim sa upskilling at reskilling training programs sa early childhood education o early childhood care and development (ECCD). Kailangan ding makapasa ang mga CDWs na ito sa certification mula sa TESDA. Magiging libre naman para sa mga CDWs ang naturang assessment.

Kung ganap na maisabatas ang Early Childhood Care and Development Act, mabibigyan natin ng tulong ang lahat ng mga CDWs pagdating sa kanilang upskilling at reskilling. Tinataya naman ng ating tanggapan na kakailanganin ng bansa ang karagdagang 161,143 CDWs upang suportahan ang 4.6 milyong batang tatlo hanggang apat na taong gulang. 

Sa ating mga kasalukuyang CDWs, sana ay huwag ninyong palagpasin ang pagkakataong ito upang mapaigting at mabigyan ng pormal na pagkilala ang inyong mga kakayahan. Kaisa ko ang bawat magulang at ang buong bansang nagpapasalamat sa inyong serbisyo upang itaguyod ang kapakanan ng mga batang Pilipino. 

Sa ating mga kababayan, Maligayang Pasko sa ating lahat!

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Early childhood care and development bill, aprub na sa Senado

ni Kuya Win Gatchalian @Win Tayong Lahat | Dec. 19, 2024

Pasado na sa huli at ikatlong pagbasa sa Senado ang panukalang batas na nagsusulong sa paghahatid at pagpapaigting ng kalidad ng early childhood care and development (ECCD) services sa buong bansa. 

Mahalagang reporma ang pagpapatatag sa ECCD dahil dito nakasalalay ang pagkakaroon ng matibay na pundasyon ng ating mga kabataan. Kailangang maabot natin ang bawat batang wala pang limang taong gulang, tugunan ang kanilang mga pangangailangang pangkalusugan, at tiyakin ang kanilang kahandaang pumasok sa sistema ng edukasyon.

Sa ilalim ng Early Childhood Care and Development Act (Senate Bill No. 2575) na isinulong ng inyong lingkod, palalakihin natin ang sakop ng universal ECCD access sa lahat ng mga batang wala pang limang taong gulang. Gagawin natin ito sa pamamagitan ng pagpapalawak sa National ECCD System sa mga probinsya, lungsod, munisipalidad, at barangay. Sasaklawin ng ECCD System ang kabuuan ng mga programang may kinalaman sa kalusugan, nutrisyon, early childhood education, at social services na tutugon sa pangangailangan ng mga batang wala pang limang taong gulang. 

Sa naturang panukala, magiging mandato sa bawat lungsod at munisipalidad na lumikha ng ECCD office na sasailalim sa administrative supervision ng alkalde. Pamumunuan ng tanggapang ito ang pagpapatupad ng mga ECCD programs, kabilang ang pangangasiwa ng mga child development teachers (CDTs) at child development workers (CDWs). 

Isinusulong din ng Early Childhood Care and Development Act ang professionalization ng mga CDTs at ang reskilling at upskilling ng mga kasalukuyang CDWs. 

Para sa mga CDWs, magiging mandato sa kanilang sumailalim sa mga reskilling at upskilling training programs sa ECCD. Kailangan din nilang sumailalim sa libreng assessment at certification mula sa Technical Education and Skills Development Authority (TESDA). Ang ECCD Council ang magiging responsable pagdating sa mga naturang programang ito. 

Patatatagin din ng panukalang batas ang ECCD Council upang matiyak ang pagpapatibay ng pundasyon ng mga kabataang wala pang limang taong gulang. Ang ECCD Council ay itatalaga sa ilalim ng Department of the Interior and Local Government (DILG). Ang mga kalihim ng Department of Education (DepEd) at DILG ang magsisilbing mga co-chairperson ng governing board ng council, habang magsisilbi namang vice-chairperson ang ECCD Council executive director.

Kung tuluyang maisabatas ang ating panukala, matutulungan natin ang bawat bata na magkaroon ng mas magandang oportunidad pagdating sa edukasyon tungo sa magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Good news para sa mga tutor ng ARAL Program

ni Kuya Win Gatchalian @Win Tayong Lahat | Dec. 17, 2024

Magandang balita para sa ating mga kababayan, pirmado na ang implementing rules and regulations ng Academic Recovery and Accessible Learning (ARAL) Program Act na isinulong ng inyong lingkod. 

Ngayong inaasahan natin ang pagpapatupad ng ARAL Program, inaanyayahan din natin ang ating mga guro, para-teachers, at ang ating mga pre-service teacher na maging mga tutor. Mahalaga ang pakikilahok ng ating mga guro, para-teachers, at mga pre-service teacher upang mapatupad natin ang ARAL Program na tutugon sa learning loss ng ating mga mag-aaral. Kaya naman noong binabalangkas natin ang batas, tiniyak nating makakatanggap sila ng umento o benepisyo bilang pagkilala sa kanilang mahalagang papel sa tagumpay ng programa.

Para sa kaalaman ng ating mga kababayan, ang mga para-teacher ay kumuha ng Licensure Examination for Teachers (LET) ngunit hindi naging kuwalipikado. Sa kabila nito, meron silang special permit mula sa Board for Professional Teachers, kung saan nakasaad ang lugar kung saan sila nakatalaga. Ang mga pre-service teacher naman ay mga mag-aaral na naka-enroll sa teacher education degree programs o mga kursong may kinalaman sa edukasyon.

Para sa ating mga gurong magsisilbing tutor ng ARAL Program, mabibigyan sila ng umento alinsunod sa mga angkop na probisyon ng Magna Carta for Public School Teachers at sa mga pamantayan ng Department of Education (DepEd) at Department of Budget and Management (DBM). 

Ipagkakaloob ang karagdagang bayad na ito sa mga guro kung nagampanan na nila ang kanilang tungkuling magturo sa classroom sa loob ng anim na oras. Ang dagdag na bayad sa mga guro ay hindi naman lalagpas sa halagang katumbas na bayad sa dalawang oras batay sa Prime Hourly Teaching Rate. Ang mga para-teacher na magsisilbing mga tutor ay babayaran mula sa pondo ng DepEd o sa Special Education Fund (SEF) ng local school board.

Para naman sa ating mga pre-service teacher na may balak mag-apply sa mga plantilla position sa DepEd, mabibilang na relevant teaching experience ang pagiging tutor sa ilalim ng ARAL Program.

Malaking hamon para sa ating bansa na tugunan ang learning loss ng ating mga mag-aaral. Ngunit tiwala ako na sa ating pagtutulungan, maibabangon natin ang sektor ng edukasyon at mawawakasan natin ang krisis na kinakaharap nito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com