Bagyong Hanna, next na hahataw

ni Mai Ancheta @Weather News | August 28, 2023

Isa na namang masamang panahon ang nagbabadyang maging bagyo sa susunod na mga araw.

Batay sa monitoring ng PAGASA, isa nang tropical depression ang namumuong sama ng panahon at tatawaging Hanna sa sandaling pumasok ito sa Philippine area of responsibility.

Batay sa pagtaya, posibleng makapasok sa bansa ang bagong bagyo sa Miyerkules o Huwebes.

Namataan ang sentro ng sama ng panahon sa silangang bahagi ng Central Luzon at may taglay na hangin na 45 km/hour, habang mabagal na umuusad patungong timog silangan.

Samantala patuloy sa paghagupit at pananalasa ang Bagyong Goring sa ilang lalawigan sa Northern Luzon at ilang lugar sa Ilocos Region.

Napanatili ng bagyo ang lakas nito bilang super typhoon habang kumikilos sa timog pa-kanluran ng Casiguran, Aurora.

Nagdulot ng matinding pagbaha ang Bagyong Goring sa ilang mga lugar sa Cagayan, Isabela, at ilang bayan sa Ilocos.

Batay sa mga kuhang larawan ng netizens, maraming mga bahay at kalsada ang apektado ng mataas na pagbaha habang isang konkretong bahay naman sa Narvacan, Ilocos Sur ang nilamon ng ilog dahil sa pagragasa ng malakas na tubig-baha.

Patuloy na makararanas ng ulan hanggang sa Lunes ng hapon sa bahagi ng Aurora , Isabela at Cagayan at inaasahang lalayas sa PAR ang bagyo sa September 1.

Super Typhoon Goring, ibinabala

ni Mai Ancheta @News | August 27, 2023

Itinaas sa Signal no. 3 ang ilang bahagi ng Cagayan gayundin sa Divilacan at Palanan sa Isabela dahil sa Bagyong Goring na patuloy na lumalakas habang palapit sa Babuyan islands.

Ayon sa inilabas na weather bulletin ng PAGASA, maaari pang lumakas ang Bagyong Goring at maging super typhoon sa Lunes.

Nakataas ang Signal no. 3 sa Sta. Ana, Cagayan dahil malapit ito sa dagat habang Signal no. 2 naman sa mga bayan ng Dinapigue, San Mariano, Ilagan City, Maconacon, Cabagan, Tumauini at San Pablo sa lalawigan ng Isabela.

Nakataas din ang Signal no. 2 sa mga bayan ng Peñablanca, Baggao, Gattaran, Lal-lo, Gonzaga, Sta. Teresita at Buguey sa probinsiya sa Cagayan, gayundin sa Dilasag at Casiguran sa Aurora province.

Signal no. 1 naman sa Batanes at ilang bahagi ng Cagayan pati na sa Babuyan Islands, Quirino, Apayao, Nueva Vizcaya, Ifugao, Kalinga at Mountain Province.

Makakaranas naman ng mga bahagyang pag-ulan sa Aurora, Bataan, Metro Manila, Calabarzon, Bicol region at Mimaropa dahil sa habagat.

Batay sa pagtaya ng PAGASA, inaasahang lalabas sa Philippine Area of Responsibility si Goring sa Huwebes.

Bagyong Falcon, hataw

ni BRT @News | July 30, 2023

Lalo pang lumakas ang Bagyong Falcon habang nananatili sa Philippine waters.

Huli itong namataan sa layong 1,205 km sa silangan ng Central Luzon.

Kumikilos ang bagyo nang pahilaga kaya hindi ito inaasahang tatama sa alinmang

bahagi ng bansa.

Taglay ni 'Falcon' ang lakas ng hangin na 75 km/h malapit sa gitna at may pagbugsong 90 km/h.

Ito na ang ikaanim na sama ng panahon na pumasok sa Philippine area of responsibility.