Tropical Depression Nika lumabas na ng bansa

ni Lolet Abania | October 12, 2020

Lumabas na ng Philippine area of responsibility (PAR) ang Tropical Depression Nika bandang alas-11 ng umaga ngayong Lunes, ayon sa PAGASA.

Sa 24-oras na forecast ng ahensiya, huling namataan ang TD Nika sa layong 520 km sa kanluran ng Sinait, Ilocos Sur dakong alas-4 ng hapon kanina.

Kumikilos ito sa bahaging kanluran pakanluran ng 20 km kada oras at may lakas na hangin na 65 kph malapit sa sentro at bugsong aabot hanggang 80 kph.

Gayundin, tinatayang magiging severe tropical storm ang TD Nika na magla-landfall sa Hainan Province sa Southern China bukas ng hapon o gabi.

2 LPA at Habagat, magpapaulan sa bansa

ni Lolet Abania | October 11, 2020

Dalawang low pressure areas (LPA) at Southwest Monsoon (Habagat) ang magpapaulan sa malaking bahagi ng bansa ngayong Linggo, ayon sa forecast ng PAGASA.

Makararanas ang Metro Manila, natitirang bahagi ng Luzon, Visayas, Zamboanga Peninsula, Northern Mindanao, Caraga at BARMM ng maulap na papawirin, kalat-kalat na pag-ulan at pagkulog at pagkidlat na may posibilidad ng pagbaha o landslides sa mga lugar na katamtaman hanggang sa malakas na buhos ng ulan.

Samantala, ang natitirang bahagi ng Mindanao ay bahagyang maulap hanggang sa maulap na papawirin na may manaka-nakang pag-ulan dahil sa habagat at localized thunderstorms. Pinapayuhan ang mga residente sa mga pagbaha o landslides sa matinding thunderstorms.

Namataan ang isang LPA sa bahagi ng Conner, Apayao, habang ang isa pang LPA ay tinatayang nasa layong 840km silangan ng Hinatuan, Surigao del Sur, dakong alas-3 ng madaling-araw kanina.

Makakaapekto ang habagat sa Central at Southern Luzon, Visayas at Mindanao.

Gayundin, minomonitor ng PAGASA ang Severe Tropical Storm Chan-Hom na matatagpuan sa labas ng Philippine Area of Responsibility (PAR). Matatagpuan ang sentro ng Chan-Hom 2,185 km hilagang-silangan ng Extreme Northern Luzon.

Magiging mapanganib sa katubigang baybayin ng Extreme Northern Luzon na aabot ang taas ng pag-alon sa 4.5 metro.

Para sa karagatan ng Visayas at ibang bahagi ng Luzon, katamtaman hanggang sa mataas na pag-alon na aabot sa 2.8 metro.

Gayunman, ang coastal waters ng Mindanao ay magiging bahagya hanggang sa katamtaman lamang.

Metro Manila at ilang kalapit-probinsiya magiging maulan dahil sa LPA

ni Thea Janica Teh | October 9, 2020

Inaasahan na magiging maulan ngayong Biyernes ayon sa PAGASA dahil sa Low Pressure Area (LPA) at habagat na nakita sa Palawan.

Ayon kay PAGASA weather specialist Loriedin dela Cruz, unang namataan ang LPA sa 310 kilometeres west-northwest ng Coron, Palawan.

Dadag pa ni dela Cruz, ang LPA ay magiging bagyo sa mga susunod na araw ngunit nakalabas na sa Philippine Area of Responsibility.

Kaya naman, asahan na magiging maulan ngayong araw sa Metro Manila, Central Luzon, Calabarzon, Mimaropa, Bicol Region, Visayas, Zamboanga Peninsula, Northern Mindanao at Caraga.

Samantala, naka-monitor ang PAGASA sa bagyong Chan-hon na huling namataan sa 1,585 kilometers northeast ng Basco, Batanes.