Biyahe ng mga barko sa Calabarzon, MIMAROPA, kanselado dahil sa Bagyong Quinta

ni Lolet Abania | October 25, 2020

Suspendido ang serbisyo ng lahat ng mga sasakyang pandagat sa Calabarzon dahil sa panganib na dala ng Tropical Storm Quinta na may international name na Molave, kung saan nagtala rin ng Tropical Cyclone Wind Signals (TCWS) No. 2 sa 12 lugar sa Bicol region.

“Kanselado ang lahat ng biyaheng pandagat sa mga pantalan sa rehiyon dala ng pagtataas ng Tropical Cyclone Wind Signal sa mga lalawigan ng CALABARZON dulot ng Bagyong #QuintaPH,” pahayag ng Calabarzon Regional Disaster Risk Reduction Management Council (RDRRMC) ngayong Linggo.

Nag-abiso na rin ang Calabarzon RDRRMC sa mga biyahero na i-postpone ang lahat ng kanilang nakaiskedyul na trips para maiwasan na sila ay ma-stranded sa mga pantalan.

“Pinapayuhan ang mga maglalakbay na pansamantalang itigil ang pagbiyahe upang maiwasan ang pagdami ng stranded sa mga pantalan. Manatiling nakatutok sa mga ulat- panahon,” dagdag na sabi ng Calabarzon RDRRMC.

Ayon sa Calabarzon RDRRMC, umabot sa 532 pamilya o 1,789 indibidwal sa Guinobatan, Albay at Canaman, Camarines Sur ang dinala na sa evacuation center, subali’t may kabuuang 662 katao pa ang stranded sa rehiyon.

Samantala, ayon sa report ng Philippine Ports Authority-Batangas kaninang ala-una nang madaling-araw, may 183 indibidwal ang stranded sa port ng Batangas.

Gayundin, may 60 rolling cargoes ang nananatili sa nasabing pantalan.

Sa MIMAROPA, ayon sa RDRRMC, isinuspinde na ang mga shipping vessel trips sa mga lugar na nasa ilalim ng TCWS maliban sa Palawan.

Luzon, pinaghahanda sa baha at landslide dahil sa Bagyong Pepito

ni Thea Janica Teh | October 20, 2020

Itinaas na sa Tropical Cyclone Wind Signal (TCWS) No. 2 ang 13 lugar sa Luzon dahil napapanatili ng bagyong Pepito ang kanyang lakas papunta sa Aurora at Isabela province, ayon sa PAGASA ngayong Martes.

Kabilang sa 13 lugar na nakapailalim sa TCWS No. 2 ay ang La Union, Pangasinan, Ifugao, Benguet, Nueva Vizcaya, Quirino, Nueva Ecija, Tarlac, Aurora, bahaging Timog ng Isabela (Palanan, San Mariano, Benito Soliven, Naguilian, Gamu, Burgos, San Manuel, Aurora, Cabatuan, Luna, Reina Mercedes, Cauayan City, Dinapigue, San Guillermo at Angadanan.

Kasama rin diyan ang Alicia, San Mateo, Ramon, San Isidro, Echague, San Agustin, Jones, Santiago City, Cordon), bahaging Timog ng Ilocos Sur (Sugpon, Alilem, Tagudin), hilagang bahagi ng Zambales (Iba, Palauig, Masinloc, Candelaria, Santa Cruz, Botolan, Cabangan) at hilagang bahagi ng Quezon (General Nakar).

Samantala, 12 lugar naman sa Luzon ang nakapailalim sa TCWS No. 1 kabilang ang Abra, Kalinga, Mountain Province, Bulacan, Pampanga, Bataan, Metro Manila, Rizal, hilagang bahagi ng Camarines Norte (Paracale, Jose Panganiban, Capalonga, Vinzons), Catanduanes at ilan pang natitirang bayan sa Quezon at Zambales.

Huling namataan ng PAGASA ang sentro ng bagyong Pepito sa 195 kilometrong silangang bahagi ng Baler, Aurora nitong ala-una nang hapon. Ito ay may maximum sustained wind na 65 km per hour at may bugso ng hangin na nasa 80 kph.

Maaari rin umanong mag-land fall ang bagyo sa pagitan ng 7pm at 11pm ngayong Martes sa Aurora-Isabela area.

Bukod pa rito, maaari pa itong lumakas at maging tropical storm sa darating na Huwebes kung kailan din inaasahan na lalabas na ito ng bansa.

Pinaalalahanan ng PAGASA ang lahat ng residente na mag-ingat dahil posibleng bumaha at magkaroon ng landslide dahil sa malakas na pag-ulan.

Isabela, Aurora, Bicol, Quezon, tatamaan ng Bagyong Pepito

ni Thea Janica Teh | October 19, 2020

Tuluyan nang naging bagyo ang low pressure area na namataan noong Linggo nang hapon at pinangalanan bilang Pepito. Itinaas na ngayong Lunes sa signal no. 1 ang ilang bayan sa Isabela at Aurora.

Ayon sa PAGASA, namataan ang bagyong Pepito sa 475 kilometrong silangang bahagi ng Virac, Catanduanes kaninang alas-10 ng umaga at may maximum wind na 45 kph.

Dagdag pa ng PAGASA, maaari umano itong maging tropical storm bago pa ito mag-landfall sa eastern coast ng Northern Luzon-Central Luzon area sa pagitan ng Martes nang gabi hanggang Miyerkules nang umaga.

Magdadala rin ng pag-ulan ang bagyong Pepito ngayong Lunes sa ilang lugar tulad ng Quezon, Bicol region, Eastern Visayas, Zamboanga Peninsula, Bangsamoro, Caraga, Davao Oriental, Davao Occidental, Sultan Kudarat, South Cotabato at Sarangani.