8,000 sa Bicol, inilikas dahil sa Bagyong Quinta

ni Thea Janica Teh | October 25, 2020

Umabot sa 8,000 katao sa Bicol Region ang puwersahang inilikas at dinala sa evacuation center ngayong Linggo dahil sa bagyong Quinta, ayon sa report ng Regional Disaster Risk Reduction and Management Operation Center (RDRRMC).

Sa datos ng RDRRMC, may kabuuang 1,461 pamilya at 5,518 indibidwal ang inilikas sa evacuation center bandang alas-5 ng hapon ngayong Linggo.

Lumakas pa ang bagyong Quinta matapos itong mag-landfall sa Tabaco City sa Albay kaninang 6:10 ng gabi.

Ayon sa huling inilabas na report ng PAGASA, nakita ang bagyong Quinta sa 130 kilometer per hour (kph) at may bugso ng hangin na 160 kph.

Inaasahan na bukas, Lunes nang hapon, ay papunta na sa southern Luzon ang bagyong Quinta at liliko ito papuntang west-northwestward ng West Philippine Sea.

Bagyong Quinta, lalong lumakas

ni Thea Janica Teh | October 25, 2020

Mas lalo pang lumakas ang bagyong Quinta matapos mag-landfall sa San Miguel Island sa Tabaco City, Albay ngayong Linggo, 6:10 ng gabi.

Ayon sa PAGASA, itinaas na sa Tropical Cyclone Wind Signal (TCWS) No. 3 ang Catanduanes, silangang bahagi ng Camarines Sur (Goa, Ocampo, Bula, Lagonoy, Garchitorena, Caramoan, Presentacion, San Jose, Tigaon, Sagnay, Buhi, Irigan City, Baao, Nabua, Bato, Balatan), Albay, Sorsogon, Burias Island at Ticao Island.

Samantala, nakararanas naman ng TCWS No. 2 ang Camarines Norte, natitirang bahagi ng Camarines Sur, Masbate, at gitna at bahaging timog ng Quezon (Mauban, Sampaloc, Lucban, Dolores, Candelaria, Tiaong, San Antonio, Sariaya, Tayabas City, Lucena City, Pagbilao, Atimonan, Perez, Alabat, Calauag, Quezon, Tagkawayan, Guinayangan, Lopez, Pitogo, Plaridel, Gumaca, Unisan, Agdangan, Padre Burgos, Macalelon, Catanauan, General Luna, Buenavista, San Narciso, Mulanay, San Andres, San Francisco).

Nakararanas din ng Signal No. 2 sa bahaging timog ng Laguna (Paete, Kalayaan, Lumban, Cavinti, Luisiana, Majayjay, Liliw, Rizal, Nagcarlan, San Pablo City, Alaminos, Magdalena, Pagsanjan), Batangas, Marinduque, Romblon, Oriental Mindoro, Occidental Mindoro kabilang ang Lubang Island at Northern Samar.

Nananatili namang nasa TCWS No. 1 ang natitirang bahagi ng Quezon, Laguna, Rizal, Cavite, Metro Manila, Bulacan, Pampanga, Bataan, at bahaging timog ng Zambales (San Marcelino, San Felipe, San Narciso, Castillejos, Subic, San Antonio, Olongapo City, Botolan, Cabangan), Calamian Island, hilagang bahagi ng Samar (Calbayog City, Matuguinao, Tagapul-An, Santo Nino, Almagro, Santa Margarita, Gandara, San Jose de Buan, Pagsanghan, Tarangnan, San Jorge, Catbalogan City, Jiabong, Motiong, Paranas).

Ganundin, nasa TCWS No. 1 ang hilagang bahagi ng Eastern Samar (Maslog, Jipapad, Arteche, San Policarpo, Oras, Dolores, Can-Avid, Taft), hilagang bahagi ng Capiz (Sapi-An, Ivisan, Roxas City, Panay, Pilar, Pontevedra, President Roxas), Aklan, hilagang bahagi ng Antique (Caluya, Libertad, Pandan, Sebaste, Culasi) at hilagang-silangan ng Iloilo (Batad, Balasan, Estancia, Carles).

Inaasahan na makalalabas na sa Philippine Area of Responsibility (PAR) ang bagyong Quinta sa Martes nang hapon.

Klase sa Sorsogon, suspended dahil sa Bagyong Quinta

ni Ronalyn Seminiano Reonico | October 25, 2020

Kanselado ang klase sa lahat ng antas sa Sorsogon simula ngayong Lunes hanggang Martes, October 26-27, dahil sa bagyong Quinta.

Sa inilabas na executive order ni Gov. Chiz Escudero, mababasang: “Ordering the suspension of classes in all levels in public and private schools in the province for October 26 and 27, 2020 and for other purposes.”

Ayon sa PAGASA, inaasahang magla-landfall si Quinta sa Catanduanes-Albay kaninang hapon o ngayong gabi.