This is it, Sarah! RICHARD AT BARBIE, TODO-HALIKAN SA BEACH SA DUBAI, VIDEO KALAT NA

ni Vinia Vivar @Frankly Speaking | August 4, 2024

Photo: Circulations / FB

May malaking teleserye umanong niluluto ang Star Creatives na pagsasamahan nina Richard Gutierrez, Daniel Padilla, Ian Veneracion, Baron Geisler, Barbie Imperial, Kaila Estrada, Anthony Jennings at Maris Racal.

Ipinost sa X (dating Twitter) ng Kapamilya Online World ang Teleserye Alert na may larawan ng mga artistang nabanggit.

“ABS-CBN Studios mula sa produksyon ng Star Creatives pinaghahandaan na ang epic seryeng pagbibidahan ng ilan sa pinakamalalaking artista ngayon!” ang nakasaad na caption.

Siyempre, kani-kanyang reaksiyon ang mga fans ng mga artistang nabanggit at karamihan sa kanila ay excited.

Sey ng isang fan nina Maris at Anthony (MaThon), “Taray ng #MaThon may bagong teleserye na ulit. Sana magkaroon sila ng teleserye na sila talaga ang lead.”

Nag-react din ang ilang mga netizens sa pagsasama nina Richard at Barbie na as we all know ay nali-link ngayon.

“Parang bet ko ang Daniel-Barbie and Richard-Kaila na possible pairing,” komento ng isang netizen.

“Luh, Richard and Barbie project talaga, ah, ang lakas sa ABS-CBN kahit ang init ng dalawang ‘yan ngayon sa tao,” sey naman ng isa pang X user.

“Kaya pala may sightings ang Richard-Barbie, may teleserye pala. Parang Janine and Echo lang,” sey pa ng isa.

Isa marahil sa mga sightings na tinutukoy ng netizen ay ang nag-viral sa TikTok na video clip at photos na sinasabing sina Richard Gutierrez at Barbie Imperial habang naghahalikan sa isang beach sa Dubai.

Pero kung kami ang tatanungin, hindi kami naniniwalang sina Barbie at Richard 'yun dahil nu'ng zinoom-in namin ang photo, nakita naming hindi si Barbie ang girl kundi kamukha lang. Nakatalikod naman ang guy na sinasabing si Richard kaya paano mapapatunayang sila nga ang nasa viral video?

Isa pa, wala namang balitang nagpunta sa Dubai sina Richard at Barbie nang magkasama.

---

Ganern, Julia? COCO, PAMILYA NA ANG TURING KAY IVANA

Photo: Coco Martin 0.2 / FB

Labis ang pasasalamat nina Coco Martin at Ivana Alawi sa patuloy na pagtangkilik ng mga Pinoy sa FPJ’s Batang Quiapo na kamakailan ay inanunsiyo ang pamamaalam ng karakter ni Ivana, kasabay ng sunud-sunod na gabi ng record-breaking online views.

Ikinuwento ni Coco na hindi niya inakalang papatok sa mga manonood ang nakakakilig na tambalan nila ni Bubbles (Ivana), kaya nagpasalamat din siya sa aktres dahil game na game ito sa mga eksena nila.

“Pamilya na ‘yung turing namin sa kanya. Hindi namin akalain na gaganda nang gaganda ‘yung kuwento namin. Sobrang laki ng naiambag ni Ivana sa serye, sana nag-enjoy siya,” sabi ni Coco sa interview sa TV Patrol.

Sa pamamaalam ni Bubbles, sinagot ni Coco ang tanong ng bayan kung may bagong karakter nga bang papasok sa buhay ni Tanggol (Coco).

“Nakaka-excite kasi na hindi ko pa rin alam. I’m sure matsa-challenge kami sa panibagong pagsubok na haharapin namin,” sey ng aktor/direktor.

Samantala, nagtala ng bagong online viewership record ang FPJ’s Batang Quiapo sa tatlong magkakasunod na gabi. Ang kasalukuyang all-time high ng serye sa Kapamilya Online Live ay 635,636 peak concurrent views para sa episode noong Hulyo 31.

'Wag daw matakot sa mga hinayupak na abusado…ARNOLD SA MGA BIKTIMA NG SEXUAL HARASSMENT: MAGSILABAS KAYO!

ni Vinia Vivar @Frankly Speaking | August 3, 2024

Photo: TonightWithArnoldClavio / IG

Naglabas ng saloobin ang isa sa mga pillars ng GMA News na si Arnold Clavio (Igan), hinggil sa sexual harassment na nagaganap sa showbiz.

Ito ay sa gitna ng mainit na usap-usapan ngayon tungkol sa diumano’y panghahalay sa Sparkle artist at panganay na anak ni Niño Muhlach na si Sandro Muhlach ng dalawang Kapuso ‘independent contractors.’

Sa kanyang mahabang Instagram (IG) post ay ine-encourage ni Igan ang iba pang biktima ng sexual harassment na magsalita.

“Sa Industriya ng Showbiz sa Pilipinas, marami na ang nababalitaan ng ‘sexual harassment’ lalo na sa mga nagnanais maging artista.

“Ang pagpayag sa pabor o gusto ng isang may kapangyarihan para sa isang baguhan ang pinakamadaling paraan na makamit ang kanyang pangarap. Kalimitan dito ay seksuwal na pang-aabuso, sa babae man o sa lalaki.

“Tali ang kamay ng mga biktima na tumanggi, sa paniniwalang ‘di sila magtatagumpay sa piniling career. Kaya karamihan, masakit man sa kalooban ay maituturing na willing victim o sumasang-ayon na lang.

“Pero may isa pang problema sa tila pagtanggap sa maling kalakarang ito. Pinipili ng ilan na manahimik dahil ayaw na mapahiya sa kanilang pamilya o sa publiko,” pahayag ng batikang GMA-7 broadcaster.

Kaya naman nanawagan si Igan na magkaisa at bigyang-suporta ang mga artistang naging biktima ng pananamantala.

“Ipakita dapat ng buong industriya ang suporta kung saan ipinapahayag ng mga biktima ang kanilang mga karanasan sa seksuwal na pang-aabuso.

“Ang suportang ito ang magbibigay ng kapangyarihan sa mga nakaranas ng seksuwal na pag-atake, sa pamamagitan ng pakikiramay at pagkakaisa para makita na ito ay isang malalang problema at hindi paisa-isang kaso lamang,” aniya.

“Kung ang lahat ng biktima ay nagkakaisa, tiyak na kikilos ang buong industriya para ito ay wakasan.

“Para sa mga naging biktima, ‘di ka nag-iisa at ‘di ka dapat mahiya.

“Para sa mga nakakaranas ng ganitong mapait na sitwasyon, may karapatan kang tumanggi o takot sa ‘yong magiging kinabukasan,” payo ni Igan.

Bilang pagwawakas ay pinayuhan ni Igan ang mga biktima na huwag matakot na lumantad at magsalita.

“At tayong lahat ay may responsibilidad para ito ay matigil na. Lumantad, lumabas, mag-ingay ang sinuman sa ‘tin na nakasaksi o may nalalaman na naganap na seksuwal na pang-aabuso o panggigipit.

“Sapat ang batas at kailangan lang ay pagkakaisa ng lahat, ‘di lang sa industriya ng showbiz kundi sa lahat ng lugar ng ‘yong trabaho.

“Isang malakas na sigaw ng “AYOKO!” ang iparating natin sa mga hinayupak na mapagsamantala sa kahinaan ng iba,” ang payo ng Kapuso TV and radio newscaster na si Arnold Clavio. 

---

Pasabog ang mga plot twist sa Kapamilya teleserye na Pamilya Sagrado matapos itong magtala ng record-breaking online views sa dalawang magkasunod na gabi. Kasabay nito ang matinding rebelasyon sa serye na si Moises (Kyle Echarri) ang anak ni Rafael (Piolo Pascual).

Kapana-panabik ang episode noong Hulyo 31 na nakapagtala ng all-time high na 619,889 peak concurrent views sa Kapamilya Online Live sa YouTube (YT). Ito ang unang beses na lumagpas ito sa 600,000 views, para sa mga sabay-sabay na nanonood.

Kapit na kapit ang mga manonood sa kuwento dahil nakatakdang magbago ang kapalaran ni Moises dahil kumpirmado nang siya ang anak ng bise-presidente na si Rafael. Ngunit hindi pa ito natuklasan ng mag-ama at gagawin ni Mercedes (Mylene Dizon), ang asawa ni Rafael, ang lahat upang hindi ito mabunyag sa taumbayan.

Inuulan din ng papuri ang tumitinding komprontasyon sa pagitan nina Moises at Justin (Grae Fernandez), na anak din ni Rafael. Ang dami pang dapat abangan sa pasabog na salpukan ng dalawang aktor dahil desidido na si Moises na kalabanin at ilantad ang mga krimen ni Justin at ng pamilya nito, para makamit ang hustisya sa pagkamatay ni Roland.

Itataya pa rin ni Moises ang kanyang buhay kahit alam niyang patuloy na mamanipulahin ng mga Sagrado ang katotohanan para protektahan ang kanilang reputasyon.

Mapapanood ang Pamilya Sagrado gabi-gabi ng 8:45 PM sa Kapamilya Channel, A2Z, TV5, Kapamilya Online Live, at TFC.

Wala na raw magagawa… IVANA, NAGSALITA NA SA PAGKAKATSUGI SA SERYE NI COCO

ni Vinia Vivar @Frankly Speaking | August 2, 2024

Photo: Ivana Alawi / IG

Nagsalita na si Ivana Alawi tungkol sa isyung may attitude problem siya kaya siya tsinugi sa FPJ’s Batang Quiapo (BQ).

“‘Yung sinasabi na umaalis ako na hindi pa tapos ‘yung taping, I’ve never done that. Unang-una, alam ko na malaki ang cost ng production so kahit lumagpas ako ng oras, wala akong commercial the next day, walang problema,” paglilinaw ni Ivana sa panayam ni MJ Felipe.

“Hindi ako nagsasabi na ‘O, tapos na tayo, aalis na ‘ko.’ Hindi ako ganu’n kasi may production cost. Everyone’s working, hindi lang ako, so bakit magdedepende ako sa sarili ko na ayoko na, eh, tapos na oras ko, so I respect everyone,” dagdag niya.

“‘Yung attitude problem, ‘di ko alam, eh. Alam mo kasi, isa sa mga problems ‘yung face ko,” natatawa pa niyang sey.

Biro pa niya, siguro nga raw ay ipinanganak siyang may attitude face.

“Ito ‘yung normal, ha, kapag hindi ako naka-smile. I was born with an attitude face siguro, ‘di ko alam,” aniyang natatawa.

Samantala, winasak ng FPJ’s Batang Quiapo ang sarili nitong online viewership record sa pamamaalam ng karakter ni Ivana last Tuesday. Nakakuha rin ito ng iba’t ibang trending topics sa social media. 

Nakapagtala ang naturang episode ng all-time high na 610,927 peak concurrent views sa Kapamilya Online Live sa YouTube (YT). Nakamit ng serye ang panibagong online record sa dalawang magkakasunod na gabi at ito rin ang kauna-unahang beses na lumagpas ito sa 600,000 views, para sa mga sabay-sabay na nanonood.

Tinutukan ng mga manonood ang emosyonal na episode kung saan nadurog ang puso ni Tanggol (Coco), matapos makitang duguan at wala nang buhay si Bubbles (Ivana).

Hindi na kasi naabutan ni Tanggol nang pagbabarilin ni David si Bubbles hanggang sa hindi na nito kayang makipaglaban. 

---

Kinokondena ni Andrea Brillantes ang mga pet owners na pinabayaan ang kanilang alagang hayop na malunod na lang sa baha sa kasagsagan ng bagyong ‘Carina’.

Sa latest Instagram (IG) post ni Blythe ay ipinakita niya ang mga larawan ng nakahahambal na sinapit ng mga asong nalunod sa baha nang walang kalaban-laban dahil nakakulong ang mga ito. 

Ang isang litrato ay makikita naman ang bangkay ng isang aso na nahukay sa putikan. 

Nag-upload din si Andrea ng larawan ng kanyang mga pinakamamahal na fur babies.

“Rain or shine, I can never leave my pets behind. They are more than just pets; they are companions, partners, and friends. They are family,” simula ng aktres.

Kasunod nito ay sinabi niyang labis niyang ikinalulungkot ang mga namatay na fur babies sa bagyo dahil sa kairesponsablehan ng mga pet owners na ikinulong ang mga ito or ‘di kaya ay itinali at inabandona.

“Sorry, I know I am a bit late for this. I am saddened by the fur babies whose lives were taken away by this typhoon due to irresponsibility. People caged them, tied them up, and abandoned them,” aniya.

Kaya naman tinalakan niya ang mga iresponsableng pet owners.

“If you cannot take responsibility for the lives of your pets, then please don’t let them suffer like this,” aniya.

“My heart also goes out to everyone who was affected by the typhoon, both humans and pets,” saad pa ni Blythe.

Nanawagan din ang aktres ng tulong para sa mga naapektuhan ng bagyo, tao man o hayop.

“At the end of this slide, there are donation links where we can all help those who suffered from this typhoon. May we all have accountability and help one another,” panawagan ni Andrea.