ni Vinia Vivar @Frankly Speaking | September 26, 2024
Inamin ni Dr. Willie Ong na binigyan na siya ng kanyang doktor ng 50-50 chance to live.
“It's 50-50, eh, 50 percent to live a few more months, a year, 50 percent, anytime baka hindi na huminga,” aniya sa panayam ni Jessica Soho.
Matatandaang kamakailan ay ipinaalam ni Doc Willie sa kanyang YouTube (YT) vlog na mayroon siyang sarcoma o abdominal cancer.
Aniya ay may nakitang sarcoma tumor ang kanyang mga doktor sa kanyang abdomen na may sukat (malaki) na 16x13x12cm. Hindi raw niya natuklasan ang tumor dahil nakatago ito sa likod ng kanyang puso at sa harap ng kanyang T10 spine.
Sa kasalukuyan ay nasa Singapore siya para magpagamot, subalit tanggap niya na walang kasiguraduhan ang kanyang paggaling.
“Parang walang kasiguraduhan na, eh, everyday is a blessing. I just live every day, I don’t think of next month, next year, I don’t think about owning money, doing this, or getting into a high position. I got the worst pain, it’s 10 out of 10, Jessica,” pahayag ng tinaguriang Doktor ng Bayan.
Ibinahagi niyang hindi sila nakatulog noong nakaraang gabi ng kanyang asawa na si Doc. Anna Liza Ramoso-Ong dahil sa kanyang pagsigaw sa sobrang sakit ng kanyang bukol.
Sa sobrang sakit nga raw ay naiisip na niyang mamatay na ngayon para hindi na siya mahirapan.
“If somebody told me he will give me Dormicum and let me sleep it off and die, okey na sa ‘kin. I would’ve taken it. Kaya siguro 'pag iisipin natin ‘yung mga euthanasia, kung talagang hirap na hirap na, eh, minsan sobra rin tayong mag-prolong ng life, baka ‘di naman talaga ‘yun ang mission,” aniya.
Ikinuwento rin niyang napapanaginipan na niya ang kanyang ina na pumanaw two years ago at tila kinukuha na siya.
“'Yung mommy ko sa dream ko, kinukuha na n’ya ako. She called me, ‘Willie boy, come to me!’ Parang sabi ng nanay ko, ‘You’ve done your job on Earth, ginawa mo ng 60 years,’” kuwento niya.
Aniya pa, kung anuman ang sasabihin ng doktor ngayon ay tatanggapin niya nang walang galit o takot.
“Kapag sinabing walang pag-asa, eh, di tapos, that’s it, pansit,” saad ni Doc Willie Ong.
EXCITED and super happy ang Sparkle artist na si John Clifford na napasama siya sa cast ng bagong youth-oriented series ng GMA-7 na MAKA.
Aksidenteng na-meet nga namin kamakailan ang 18-year-old tsinito boy from Cebu at hindi na kami nagtaka kung bakit siya napasama sa cast, he deserves the break dahil cute ang bagets at mukhang Korean idol.
At ang pinakabongga sa lahat, he’s a triple threat and a total package because he can sing, dance and act.
Actually, una siyang nabigyan ng pagkakataon sa Pepito Manaloto (PM) pero biggest break niya talaga ang MAKA since isa rin siya sa mga lead stars nito.
Magta-tatlong taon pa lang siya sa Sparkle at happy siya na sa dinami-dami nilang nag-audition sa show ay isa siya sa masusuwerteng napili.
“Sobrang saya po talaga ako na ngayon may bagong show, kami nga po ‘yung MAKA, sobrang blessed po ako kasi talagang pinaghirapan po namin itong project na ‘to at super excited po kami,” sey ni Clifford.
Dagdag pa niya, “Itong MAKA, ito talaga ‘yung dream role ko, eh. Nu’ng ini-launch kami, sinabi ko talaga na gusto ko ‘yung show na parang musical. And then, nu’ng nalaman ko na ‘yung MAKA is a youth-oriented musical show, talagang sinabi ko na ‘Parang gusto ko ‘tong project na ‘to. Sana, mabigyan ako ng chance na maging parte nito.’”
Napapanood ang MAKA every Saturday at 4:45 PM. Kasama rin ni Clifford dito si Romnick Sarmenta at iba pang young Sparkle artists.
Samantala, medyo nakaka-recover na ang pamilya ni Clifford sa malaking pagsubok na nangyari sa kanila nang matupok ang isang bahay nila sa Cebu kamakailan.
Natupok lahat ng apoy at wala talagang natira. Dahil dito ay back to zero raw sila at parang nagsisimula ulit.
Ipinagpapasalamat na lang ni Clifford na hindi raw sila natutulog sa bahay na ‘yun, kaya walang napahamak sa kanyang pamilya. Pero ito raw ang kinalakhan nilang tahanan noong mga bata pa sila.
“Mahirap tanggapin kasi ‘yung bahay na ‘yun, minahal talaga namin ‘yun ever since bata kami. Lagi kaming nagpupunta du’n as in 3x a week. Sobrang meaningful sa ‘min ng bahay na ‘yun,” saad ni John Clifford.
