Belen, mensahe ng pagmamahal, awa at kababaang-loob

ni Bong Revilla @Anak ng Teteng | Dec. 13, 2024

Labing-isang araw na lamang ay bisperas na ng Pasko, ang araw na pinakahihintay na mismong sentro ng pagdiriwang para salubungin ang Pasko kung saan ginugunita natin ang kapanganakan ng ating Panginoong Hesus.

Maraming kahulugan ang Pasko para sa ating mga kababayan, at sa buong mundo ay kilala ang ating bansa na may pinakamahabang pagsalubong sa araw na ito kasabay ng pagsigla ng ating mga pamilihan.

Kahit walang kaugnayan sa kautusan ng Simbahang Katoliko ay nagkukusa na ang marami nating kababayan na sa unang araw pa lamang ng buwan ng Setyembre ay marami na ang nagpapatugtog ng mga awitin patungkol sa Pasko.

Hindi dahil sa nilalabag natin ang aral ng simbahan ngunit pagpapakita lamang ito ng pagkasabik ng maraming Pilipino sa pagdating ng Pasko, at katunayan maging ang pamahalaan at mga negosyante ay nakikisabay sa pagbibigay ng maagang benepisyo para sa mga manggagawa.

Nitong nagdaang linggo matapos matanggap na ng ilan sa atin ang mga benepisyo tuwing panahon ng Kapaskuhan, partikular sa Metro Manila ay kitang-kita ang pagdagsa ng maraming tao sa mga shopping mall at mga restaurant.

Pero higit sa dinadayo ng ating mga kababayan ay ang mga pandekorasyon na maaaring gamitin para sa Pasko, at isa sa mga nangunguna ay ang iba’t ibang laki ng Christmas tree at magagandang disenyo ng Belen.

Ang Belen ay isa sa pinakamahalagang tampok na inilalagay sa mga simbahan ilang araw bago sumapit ang Pasko na binubuo ng isang nakahigang sanggol sa sabsaban kasama sina Maria at Jose na napapaligiran ng mga pastol at ng kanilang mga tupa.

Makikita rin ang tatlong Haring Mago at mga anghel na nagsisiawit sa itaas na bahagi ng Belen dahil sa pagsilang ng Mesiyas na nagbibigay ng napakalaking mensahe para sa kapayapaan hindi lang sa ating bansa kung hindi sa buong daigdig.

Sa ating bansa ay may ginaganap na Belenismo Festival sa Tarlac na taun-taong dinarayo ng marami na naging dahilan kaya sila tinawag na ‘Belen Capital of the Philippines’ dulot ito ng labis na pagbibigay importansya nila sa Belen.

Ang Belenismo, mula sa salitang Belen ay Spanish word na ang ibig sabihin ay artistikong paggawa ng Belen na hango noong taong 1223, nang si St. Francis of Assisi at ang ilang kasama ay gumawa ng kauna-unahang Belen.

Isa sa pinakaprominenteng simboliko sa pagdiriwang ng Pasko sa Pilipinas ay ang Belen o ang Nativity Scene na galing sa katagang Bethlehem kung saan isinilang si Hesu Kristo at mula noon ang Belen ay nagtataglay na ng mensahe ng pagmamahal, awa at kababaang-loob ng ating Panginoon.

Bukod sa parol na kasama sa Belen na sumisimbolo naman sa liwanag ng tala, na naging gabay ng tatlong Haring Mago para matunton ang kinaroroonan ng sanggol na si Hesus ay naging permanenteng disenyo na rin sa Belen.

Kabilang na nga ang mga simbahan, paaralan at mga establisimyento sa maraming lugar ay makikitaan ng Belen at may pagkakataong naglalakihan pa ang mga ito ng tulad sa sukat ng normal na tao.

Bago magtapos ang dekada 60 hanggang sa unang bahagi ng taong 2000 ay may napakalaking Belen na dinarayo ng marami nating kababayan sa COD building sa Araneta Center ngunit taong 2003 ay inilipat na ito sa Greenhills Shopping Center sa San Juan.

Noong pandemya ay pansamantalang lumamya ang Belen Festival sa Tarlac partikular noong nakaraang dalawang taon pero ngayon ay nagbabalik ang sigla ng pagandahan ng mga gawang Belen.

Hindi basta-basta ang mga lumalahok sa Belen Festival dahil halos lahat ng kumpanya, mga negosyo, pribadong indibidwal at kilalang grupo ay sumasali sa festival na ito sa Tarlac na dinarayo gaya ng sa Panagbenga Festival sa Baguio.

Isa pa sa kapansin-pansin sa mga nagdaang festival na ito ay ang kahusayan at katalinuhan ng ating mga kababayan sa paggawa ng Belen na mula sa iba’t ibang klase ng materyales na hindi mo aakalain. May mga gumagamit lamang ng sako ng bigas, may pinatuyong damo, sawali, kawayan ngunit kapag nalagyan na ng magagandang ilaw ay hindi mo mapipigilang mamangha sa sobrang gaganda.

Hindi lang mga Pilipino ang pinaghahandaan ang paggawa ng Belen dahil ngayon ay itinatampok din ito sa maraming bahagi ng mundo tulad sa gitna ng St. Peter’s Square sa  Vatican, mayroon din sa Metropolitan Museum of Art sa New York City at Carnegie Museum of Arts sa Pittsburgh.

Maging ang mga siyudad sa Australia, Canada, Germany, Italy, Poland at United Kingdom ay may kani-kanyang naglalakihang Belen at ang Nativity Scene sa Bethlehem mismo kung saan nagsimula ang lahat, sa Orthodox Church of the Nativity na siya ring plaza ng naturang lugar.

Ngunit, higit sa kagandahang dala ng Belen ay ang tunay na diwa nito bilang paggunita sa kapanganakan ng ating Panginoong Hesus na simbulo ng pagbibigayan at pagpapatawad sa bawat isa bago sumapit ang araw ng Pasko.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pagsampa ng kaso sa kumpanyang peke ang rehistro

ni Atty. Persida Rueda-Acosta @Magtanong Kay Attorney | Dec. 13, 2024

Dear Chief Acosta,

Kami ng mga kaibigan ko ay naanyayahan na mag-invest sa isang kumpanya. Sa kasamaang-palad ay nalaman namin na peke pala ang nasabing kumpanya at ang aming pera ay itinakbo. Nais sana naming maghabla na lamang ng kasong sibil upang mabawi ang aming pera. Subalit nalaman namin na hindi totoo ang nasabing kumpanya at peke ang mga rehistro na pinakita nila sa amin. Maaari ba naming gamitin ang pinirmahan naming kontrata na nakapangalan sa kumpanya kahit na peke pala ang rehistro nito? — Ceej

---

Dear Ceej,

Ang sagot sa iyong katanungan ay matatagpuan sa Section 15, Rule 3 ng A.M. No. 19-10-20-SC, o mas kilala bilang 2019 Amendments to the 1997 Rules of Civil Procedure. Sang-ayon sa nasabing probisyon:

“Sec, 15. Entity without juridical personality as defendant. – When two or more persons not organized as an entity with juridical personality enter into a transaction, they may be sued under the name by which they are generally or commonly known.

In the answer of such defendant, the names and addresses of the persons composing said entity must all be revealed.”

Sang-ayon sa nasabing probisyon, maaaring kasuhan sa pangalan ng pinapakilalang kumpanya ang isang partido kahit na ito ay walang lehitimong rehistro. Gaya sa iyong kaso, sila ay gumawa ng kontrata sa pangalan ng kanilang ipinakilalang kumpanya, kaya maaari mo silang ihabla gamit ang pangalan ng nasabing pekeng kumpanya.  

Ito ay proteksyon na ipinagkakaloob ng batas para sa mga nakikipagtransaksyon sa mga nasabing entity. Ang isang indibidwal o grupo ng mga indibidwal, na nakikipagtranskasyon sa mga nagpapakilalang kumpanya ay pinapaboran ng batas. Hindi maaaring gawing dahilan na hindi lehitimo o rehistrado ang nasabing negosyo upang masabi ng mga nasa likod nito na hindi sila maaaring kasuhan. Ang mga biktima ay maaaring maghabla gamit ang nasabing pangalan na kanilang kilala o ka-transaksyon at ang mga ito ang may responsibilidad na ilahad kung sino ang mga taong nasa likod nito.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Mga paslit, iwasang regaluhan ng collectible toys

ni Ryan Sison @Boses | Dec. 13, 2024

Ilang araw na lamang ay ipagdiriwang na natin ang Pasko, na panahon ng pagbibigay natin ng mga aginaldo para sa ating pamilya, kamag-anak at mga inaanak.

Kaya naman pinaalalahanan ng Food and Drug Administration (FDA) ang mga mamamayan hinggil sa mga collectible toy o laruan na nagdudulot ng panganib, partikular na sa mga maliliit pang bata.

Ayon sa FDA, habang nagiging popular ang ganitong items lalo na sa panahon ng bigayan ng mga regalo, dapat suriin ang mga laruan na bibilhin.

Sinabi ng kagawaran na target ng mga naturang produkto ay mga nasa hustong gulang, subalit ang mga makukulay na miniature replicas ng mga iconic character, sasakyan, at object ay nakakaakit sa mga maliliit na bata.

Paliwanag ng FDA, kadalasang ginagawa ng maraming paslit ang tinatawag na hand-to-mouth activity, kung saan ang mga naturang laruan ay may maliliit na sukat at mga small parts na maaaring humantong sa hindi nila sinasadyang paglunok ng mga bagay na ito. 

Payo ng FDA sa mga magulang, guardians at iba pa na iwasan ang magbigay ng collectible toys na may maliliit na detachable parts o natatanggal na bahagi ng laruan sa mga batang wala pang 3-taong gulang.

Gayundin anang kagawaran, dapat suriin ang label ng mga collectible toys sa inirerekomendang age group at mga instruction sa paggamit kung hindi angkop ang mga ito para sa maliliit na bata. 

Dapat ding alamin kung gawa ang mga ito mula sa non-toxic, lead-free, at phthalate-free na mga materials.

Mas makabubuti sigurong huwag na tayong magbigay ng mga ganitong klase ng regalong laruan sa mga maliliit na bata upang hindi tayo magkaroon ng problema o kaya naman ay may madisgrasya. 

Puwede kasing malunok nila ang mga maliliit na bagay at ma-choke sila na tiyak ospital ang ating kahahantungan.

May mga laruan din na may lead na sadyang nakakalason, at ang pagkakalantad sa mas maraming lead ay maaaring makapinsala sa ating utak, atay, kidney at buto. Ang mga plastic na laruan ay may mga synthetic chemical compound na mapanganib din sa ating kalusugan.

Marahil, iregalo na lamang natin sa ating mga inaanak na maliliit pa ay damit, sapatos, medyas o kaya ay pagkain na may pakinabang pa sa kanila.

Isipin natin na hindi lang sila magiging masaya sa aginaldo na ating ibibigay, safe din sila habang kasama natin na nagdiriwang ng Kapaskuhan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com