- BULGAR
- 12 hours ago
ni Atty. Persida Rueda-Acosta @Magtanong Kay Attorney | Apr. 16, 2025
Dear Chief Acosta,
Ang kaibigan ko at ako ay inaalok ng trabaho bilang seafarers. Nagtataka ako dahil mas mababa ang alok sa akin kumpara sa alok sa kanya kahit pareho kaming nag-apply para sa parehong posisyon sa ilalim ng parehong kumpanya. Nabalitaan kong kaya diumano ganoon ay dahil babae ako at ang kaibigan ko ay lalaki. Tama ba ito? Nais ko sanang maliwanagan. Maraming salamat. — Joya
Dear Joya,
Isa sa mga progresibong inisyatibo ng gobyerno ay ang pagpapatupad ng mga bagong batas na nagtataguyod ng pangkalahatang kapakanan at mga karapatan ng mga seafarer. Ito ay kaakibat ng layunin ng Estado na protektahan ang mga karapatan ng mga seafarer at tiyakin ang pantay-pantay na oportunidad sa maritime industry.
Sinisiguro ng Republic Act (R.A.) No. 12021, o mas kilala bilang Magna Carta of Filipino Seafarers, ang pantay na pagkilala sa mga karapatan at benepisyo ng mga babaeng seafarers. Ayon sa Seksyon 24 ng nasabing batas:
“CHAPTER IV
WOMEN IN THE MARITIME INDUSTRY
SEC. 24. Discrimination Against Women Seafarers. -- Women seafarers shall be protected from gender-based discriminatory practices, which include, but are not limited to, the following:
(a) Undue regard for the distinctive needs of women and failure to promote their health, security, dignity, and general welfare;
(b) Payment of a lesser compensation, including other forms of remuneration and fringe benefits, to female seafarers as against male seafarers for work of equal value; and
(c) Undue advantage given to male over female seafarers with respect to promotion, training opportunities, and study and scholarship grants, solely on account of their gender.”
Malinaw sa nasabing probisyon na hindi pinapayagan ng batas ang pagbabayad ng mas mababang sahod at iba pang mga benepisyo sa mga babaeng seafarers dahil lamang sa kanilang kasarian.
Kaya naman, kung ang tanging batayan ng mas mababang alok na kompensasyon sa iyo ay dahil sa iyong kasarian, malinaw na nilalabag ng kumpanya ang Magna Carta for Filipino Seafarers dahil ang hindi pantay na pagtrato sa mga babaeng seafarers ay labag sa batas.
Maaaring maharap sa kaukulang kaso at mapatawan ng pagbabayad ng danyos ang kumpanyang nag-alok sa iyo ng mas mababang sahod kung mapatunayan na ito ay lumabag sa nasasaad na probisyon ng batas. Ayon sa Seksyon 90:
“SEC. 90. Penalties. - Upon finding of the DMW or the DOLE that a person or entity, whether public or private, has violated any provision of this Act or its IRR, the sanctions under administrative, civil, criminal, or other relevant laws shall be recommended to the appropriate government agency exercising quasi-judicial or judicial functions. If the violation is committed by a private entity or individual, the person directly responsible for the violation shall be liable to pay damages.”
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
