AKAP mas mainam kesa pork barrel funds na tiwaling politicians lang ang nakikinabang

ni Pablo Hernandez @Prangkahan | Dec. 17, 2024

MAS MAINAM ANG AKAP KAYSA PORK BARREL -- Hindi dapat binabatikos ang pondong inilaan sa Ayuda sa Kapos ang Kita Program (AKAP) ng Dept. of Social Welfare and Development (DSWD) kasi sa totoo lang, mas mainam iyang AKAP kaysa pork barrel funds.

Sa AKAP kasi ay tiniyak ni DSWD Sec. Rex Gatchalian na mga mamamayang minimum wage earners at mga mas mababa pa ang kinikita ang makikinabang dito (AKAP), kaysa naman sa nabulgar na pork barrel scam noong year 2013 na si pork barrel queen Janet Napoles at ilang tiwaling pork barrel politicians lang ang nakinabang, period!

XXX

LUMABAS NA MAS MARAMI ANG OVP CONFI FUNDS GHOST BENEFICIARIES KAYSA DEPED CONFI FUNDS GHOST BENEFICIARIES -- Inanunsyo ng Philippine Statistics Authority (PSA) na sa 1,992 pangalan na sinasabing nabiyayaan ng confidential funds ng Office of the Vice President (OVP), ang 1,332 dito ay wala ring birth records, samantalang ang 670 pangalan na binigyan din daw ng confi funds ay maraming mga kapangalan.

Iyan ang sinasabi natin na lalabas sa pagsusuri ng PSA na mas maraming “confi funds ghost beneficiaries” sa OVP kasya “confi funds ghost beneficiaries” sa pinamumunuan ni VP Sara noon na Dept. of Education (DepEd). Ayon nga rin sa inanunsyo ng PSA noon na sa 677 “benepisyaryo” ng DepEd confi funds ay 405 dito ang wala ring birth records, at marami rin kapangalan ang 272 pangalan na “nabigyan” din daw ng confidential funds, boom!

XXX

KAPAG SINUSPINDE NG SEC ANG HIGIT 11,699 KUMPANYA, TIYAK MILYUN-MILYONG MADADAGDAG NA JOBLESS SA ‘PINAS -- Sinabi ng Securities and Exchange Commission (SEC) na posibleng suspendihin daw nila ang operasyon ng higit 11,600 kumpanya sa buong bansa dahil sa kabiguan na magsumite sa kanilang tanggapan ng financial statements at general information sheets.

Bakit naman sususpendihin ang operasyon, gayong puwede namang pagmultahin na lang?

Kapag tinotoo ng SEC ang banta nilang iyan ay asahan nang madadagdagan ang milyun-milyong jobless sa ‘Pinas, tsk!

XXX

SIBAKIN SINA CUSTOMS COMM. RUBIO AT DA SEC. LAUREL KAPAG WALA PA SILANG NAHULING MGA SMUGGLER -- Noong July 2023 State of the Nation Address (SONA) ni Pres. Bongbong Marcos (PBBM) ay binalaan niya ang mga agri-smuggler na kesyo tapos na raw ang happy days ng mga ito, sabay utos sa Customs at Dept. of Agriculture (DA) na magsanib-puwersa sa pagtugis sa lahat ng mga smuggler sa Adwana, pero makalipas ang mahigit isang taon ay kahit isang smuggler ay wala pang nahuhuli ang mga otoridad.

Kamakalawa ay inatasan na naman ni PBBM ang Customs at DA na manghuli ng mga smuggler para raw masampahan na ng pinalakas na kasong Anti-Agricultural Sabotage Act of 2016.

Sakaling wala pa rin mahuling smuggler, ang dapat nang gawin ni PBBM ay sibakin sa puwesto sina Customs Comm. Bienvenido Rubio at DA Sec. Francisco Tiu Laurel, period!

Parusa sa paglabag sa ‘Phil. HIV and AIDS Policy Act’

ni Atty. Persida Rueda-Acosta @Magtanong Kay Attorney | Dec. 17, 2024

Dear Chief Acosta,

Bago lamang ako sa aking trabaho sa isang ospital. Bahagi ng tungkulin ko ang tumanggap at magtala ng mga impormasyon ng mga pasyente. Kamakailan ay napag-alaman ko na ang isang malapit sa buhay ng nobyo ko ay sumailalim sa pagsusuri kaugnay sa sakit na AIDS at alam ko rin ang naging resulta. Nahahati ang loob ko kung sasabihin ko ba ito sa nobyo ko o hindi. Sa isang banda, iniisip ko na mahalaga na malaman ito ng nobyo ko dahil nga ang taong ito ay malapit sa kanyang buhay, ngunit sa kabilang banda ay iniisip ko na baka ikapahamak ko iyon. Mayroon kasi na nakapagsabi sa akin na maaaring maparusahan ang nagsisiwalat ng mga kumpidensyal na impormasyon ukol sa naturang sakit. Ano ba ang sinasabi ng ating batas ukol dito? Sana ay malinawan ninyo ako. — Nancy

---

Dear Nancy,

Sa ilalim ng Republic Act (R.A.) No. 11166, o mas kilala bilang “Philippine HIV and AIDS Policy Act”, pinalawig at pinagtibay ang mga polisiya na nagbibigay proteksyon sa mga indibidwal na apektado ng Human Immunodeficiency Virus (HIV) at Acquired Immune Deficiency Syndrome (AIDS). Ang isa sa mga garantiya na nakasaad sa ilalim ng nasabing batas ay ang pagpapanatili ng mga kumpidensyal na impormasyon ukol sa mga indibidwal na nasuri, na-expose, mayroon, nagamot, o ginagamot sa sakit na HIV at AIDS. Malinaw na nakasaad sa Sections 44 at 45 ng R.A. No. 11166:

“Section 44. Confidentiality. - The confidentiality and privacy of any individual who has been tested for HIV, has been exposed to HIV, has HIV infection or HIV- and AIDS-related illnesses, or was treated for HIV-related illnesses shall be guaranteed. The following acts violate confidentiality and privacy:

1. Disclosure of Confidential HIV and AIDS Information. - Unless otherwise provided in Section 45 of this Act, it shall be unlawful to disclose, without written consent, information that a person has AIDS, has undergone HIV-related test, has HIV infection or HIV-related illnesses, or has been exposed to HIV.

The prohibition shall apply to any person, natural or juridical, whose work or function involves the implementation of this Act, or the delivery of HIV-related services, including those who handle or have access to personal data or information in the workplace, and who, pursuant to the receipt of the required written consent from the subject of confidential HIV and AIDS information, have subsequently been granted access to the same confidential information.

x x x

Section 45. Exceptions. - Confidential HIV and AIDS information may be released by HIV testing facilities without consent in the following instances:

1. When complying with reportorial requirements of the national active passive surveillance system of the DOH: Provided, That the information related to a person’s identify shall remain confidential;

2. When informing other health workers directly involved in the treatment or care of a PLHIV: Provided, That such worker shall be required to perform the duty of shared medical confidentiality; and

3. When responding to a subpoena duces tecum and subpoena ad testificandum issued by a court with jurisdiction over a legal proceeding where the main issue is the HIV status of an individual: Provided, That the confidential medical record, after having been verified for accuracy by the head of the office or department, shall remain anonymous and unlinked and shall be properly sealed by its lawful custodian, hand delivered to the court, and personally opened by the judge: Provided, further, That the judicial proceedings be held in executive session.”

Sa inilapit mo na sitwasyon, maaari mo lamang ipagbigay-alam sa iyong nobyo ang impormasyon na napag-alaman mo ukol sa kanyang mahal sa buhay kung ang naturang tao ay magbibigay sa iyo ng nasusulat na pahintulot o written consent. Kung wala nito ay hindi mo maaaring isiwalat o ibahagi ang anumang kumpidensyal na impormasyon ukol sa kanya.

Bagaman mayroong mga pagbubukod sa panuntunan na partikular na nakasaad sa Section 45 ng R.A. No. 11166, tila hindi saklaw ng alinman sa mga nabanggit na kinikilalang exceptions ng batas ang gagawin mong pagsisiwalat. Mainam na bigyang-diin na kung ikaw ay lalabag sa panuntunan ng confidentiality, maaari kang mapatawan ng parusa na pagkakakulong at/o fine.  Nakasaad sa Section 50 ng R.A. No. 11166:

“Section 50. Penalties. –

x x x

(f) Any person who violates the provisions of Section 44 of this Act on confidentiality shall, upon conviction, suffer the following penalties:

(1) Six months to two (2) years of imprisonment for any person who breaches confidentiality, and/or a fine of not less than Fifty thousand pesos (P50,000.00), but not more than One hundred fifty thousand pesos (P150,000.00), at the discretion of the court;

(2) Two years and one (1) day to five (5) years of imprisonment for any person who causes the mass dissemination of the HIV status of a person, including spreading the information online or making statements to the media, and/or a fine of not less than One hundred fifty thousand pesos (P150,000.00), but not more than Three hundred fifty thousand pesos (P350,000.00), at the discretion of the court; and

(3) Five years and one (1) day to seven (7) years of imprisonment for any health professional, medical instructor, worker, employer, recruitment agency, insurance company, data encoder, and other custodian of any medical record, file, data, or test result who breaches confidentiality, and/or a fine of not less than Three hundred fifty thousand pesos (P350,000.00), but not more than Five hundred thousand pesos (P500,000.00), at the discretion of the court.

These penalties are without prejudice to any administrative sanction or civil suit that may be bought against persons who violate confidentiality under this Act.” 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Good news para sa mga tutor ng ARAL Program

ni Kuya Win Gatchalian @Win Tayong Lahat | Dec. 17, 2024

Magandang balita para sa ating mga kababayan, pirmado na ang implementing rules and regulations ng Academic Recovery and Accessible Learning (ARAL) Program Act na isinulong ng inyong lingkod. 

Ngayong inaasahan natin ang pagpapatupad ng ARAL Program, inaanyayahan din natin ang ating mga guro, para-teachers, at ang ating mga pre-service teacher na maging mga tutor. Mahalaga ang pakikilahok ng ating mga guro, para-teachers, at mga pre-service teacher upang mapatupad natin ang ARAL Program na tutugon sa learning loss ng ating mga mag-aaral. Kaya naman noong binabalangkas natin ang batas, tiniyak nating makakatanggap sila ng umento o benepisyo bilang pagkilala sa kanilang mahalagang papel sa tagumpay ng programa.

Para sa kaalaman ng ating mga kababayan, ang mga para-teacher ay kumuha ng Licensure Examination for Teachers (LET) ngunit hindi naging kuwalipikado. Sa kabila nito, meron silang special permit mula sa Board for Professional Teachers, kung saan nakasaad ang lugar kung saan sila nakatalaga. Ang mga pre-service teacher naman ay mga mag-aaral na naka-enroll sa teacher education degree programs o mga kursong may kinalaman sa edukasyon.

Para sa ating mga gurong magsisilbing tutor ng ARAL Program, mabibigyan sila ng umento alinsunod sa mga angkop na probisyon ng Magna Carta for Public School Teachers at sa mga pamantayan ng Department of Education (DepEd) at Department of Budget and Management (DBM). 

Ipagkakaloob ang karagdagang bayad na ito sa mga guro kung nagampanan na nila ang kanilang tungkuling magturo sa classroom sa loob ng anim na oras. Ang dagdag na bayad sa mga guro ay hindi naman lalagpas sa halagang katumbas na bayad sa dalawang oras batay sa Prime Hourly Teaching Rate. Ang mga para-teacher na magsisilbing mga tutor ay babayaran mula sa pondo ng DepEd o sa Special Education Fund (SEF) ng local school board.

Para naman sa ating mga pre-service teacher na may balak mag-apply sa mga plantilla position sa DepEd, mabibilang na relevant teaching experience ang pagiging tutor sa ilalim ng ARAL Program.

Malaking hamon para sa ating bansa na tugunan ang learning loss ng ating mga mag-aaral. Ngunit tiwala ako na sa ating pagtutulungan, maibabangon natin ang sektor ng edukasyon at mawawakasan natin ang krisis na kinakaharap nito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com