Romualdez, mauuna pa yatang matanggal sa puwesto kesa pinai-impeach na si VP Sara

ni Pablo Hernandez @Prangkahan | Feb. 20, 2025

TILA UNA PANG MAMALASING MATANGGAL SA PUWESTO SI SPEAKER ROMUALDEZ KESA PINATATANGGAL NILANG SI VP SARA -- Hiniling ng grupo ni Davao del Norte Rep., former Speaker Pantaleon Alvarez sa Ombudsman na patawan ng suspensyon at tanggalin muna sa puwesto si Speaker Martin Romualdez para hindi nito maimpluwensyahan ang isinampa nila ritong graft and criminal complaints.

Tila yata una pang mamalasing matanggal sa puwesto si Speaker Romualdez kesa pinai-impeach o pinatatanggal nila sa posisyon na si Vice Pres. Sara Duterte-Carpio, period!

XXX

VP SARA, NA-BASH NG NETIZENS, HIRIT NA TRO SA SC SELF-SERVING DAW ITO DAHIL TAKOT SIYA NA MA-IMPEACH -- Matapos magsampa ng petisyon sa Supreme Court (SC) ang mga Davao lawyer na humihiling na ibasura ang impeachment complaints kay VP Sara ay sinegundahan ito ng mga abogado ng bise presidente na kumukuwestiyon sa legalidad ng pang-apat na impeachment complaint sa kanya, at kasabay ng paghirit sa SC na magpalabas na agad ng TRO upang hindi na matuloy ang pagpapatalsik sa kanya sa puwesto.

Sana hinayaan na lang ni VP Sara sa mga Davao lawyer ang pagpa-file ng petisyon sa SC kasi dahil sa hirit niyang magpalabas na ng TRO ang SC, ay naba-bash siya ngayon sa social media, na kesyo “self-serving” ang hiling niya at kesyo “ngarag” na raw siya sa takot sa napipintong impeachment trial ng Senado laban sa kanya, boom!

XXX

‘PAYONG HUDAS’ NI GADON KAY VP SARA -- Nanawagan si Presidential Adviser on Poverty Alleviation (PAPA) Sec. Larry Gadon sa kanyang itinuturing na kaibigan noon na si VP Sara na mag-resign na lang ito sa puwesto para maiwasan na ang pagpapatalsik sa kanya sa puwesto.

Iyang payo ni Gadon sa kaibigan niyang si VP Sara ay masasabing “payong hudas” kasi sa totoo lang sa rami ng mga senador na nagsabing tutol sila sa impeachment, ibig sabihin niyan ay hindi mai-impeach ang bise presidente, tapos hinihimok siya nito (Gadon) na mag-resign, period!

XXX

DAHIL DAMING KURAKOT AT POLITICAL DYNASTY KAYA FOREIGN INVESTMENTS SA ‘PINAS LUMAGAPAK -- Lumagapak sa 38.87% ang foreign investments sa Pilipinas last year 2024, ayon mismo sa Philippine Statistics Authority (PSA).

Batay sa PSA, noong 2023 ay higit P889 billion ang pumasok na negosyo sa bansa, pero last year ay lumagapak ito sa P543.6 billion.

Isa lang naman nakikita nating dahilan kaya lumagapak ang foreign investments sa ‘Pinas, kasi bukod sa rami ng kurakot, dami pang political dynasty na ang feeling ay family corporation nila ang mga puwesto sa pamahalaan, boom!

Pagkansela sa sertipiko ng kapanganakan ng hindi lehitimong anak

ni Atty. Persida Rueda-Acosta @Magtanong Kay Attorney | Feb. 20, 2025

Dear Chief Acosta,

May katanungan ako tungkol sa pagrehistro ng sertipiko ng kapanganakan ng pamangkin ko.  Ang kapatid kong si Ate Marriane ay nagkaroon ng anak sa kanyang kinakasama. Hindi sila kasal sapagkat ang lalaking kinakasama niya ay kasal na sa iba, bago pa man sila nagsama. Ang ginawa ng kanyang kinakasama ay inirehistro niya ang kanilang anak nang hindi alam at walang lagda ng aking ate. Maaari bang magsumite si Ate Marianne ng petisyon para makansela ang nasabing sertipiko ng kapanganakan ng aking pamangkin?

— Sheryn

---

Dear Sheryn,

Ayon sa Act No. 3753, o mas kilala bilang “Civil Registry Law,” kung ang anak ay hindi lehitimo, ang sertipiko ng kapanganakan nito ay kinakailangang may lagda at sinumpaan ng kanyang parehas na ina at ama, o kaya naman ng kanyang ina lamang kung ayaw ng ama. Ito ay alinsunod sa Seksyon 5 ng Act No. 3753:

“Section 5. Registration and Certification of Birth. -- The declaration of the physician or midwife in attendance at the birth or, in default thereof, the declaration of either parent of the newborn child, shall be sufficient for the registration of a birth in the civil register. Such declaration shall be exempt from the documentary stamp tax and shall be sent to the local civil registrar not later than thirty days after the birth, by the physician, or midwife in attendance at the birth or by either parent of the newly born child.

In such declaration, the persons above mentioned shall certify to the following facts: (a) date and hour of birth; (b) sex and nationality of infant; (c) names, citizenship, and religion of parents or, in case the father is not known, of the mother alone; (d) civil status of parents; (e) place where the infant was born; (f) and such other data may be required in the regulation to be issued.

In the case of an exposed child, the person who found the same shall report to the local civil registrar the place, date and hour of finding and other attendant circumstances.

In case of an illegitimate child, the birth certificate shall be signed and sworn to jointly by the parents of the infant or only the mother if the father refuses.”

Para sa iyong kaalaman, mayroong kasong napagdesisyunan ang ating Korte Suprema na nakasasaklaw sa iyong katanungan. Ayon sa In the Matter of Petition for Cancellation of Certificates of Live Birth of Yuhares Jan Barcelote Tinitigan and Avee Kynna Noelle Barcelote Tinitigan Joanna Karla Baguio Barcelote vs. Republic of the Philippines, et. al., G.R. No. 222095, 7 August 2017, na isinulat ni Kagalang-galang na Kasamang Mahistrado Antonio T. Carpio:

“Thus, it is mandatory that the mother of an illegitimate child signs the birth certificate of her child in all cases, irrespective of whether the father recognizes the child as his or not.  The only legally known parent of an illegitimate child, by the fact of illegitimacy, is the mother of the child who conclusively carries the blood of the mother.  Thus, this provision ensures that individuals are not falsely named as parents.

The mother must sign and agree to the information entered in the birth certificate because she has the parental authority and custody of the illegitimate child.”

Ibig sabihin, ang ina ng hindi lehitimo (nonmarital) na anak ay dapat pumirma sa sertipiko ng kapanganakan nito, kinikilala man o hindi ng ama ang bata. Ang tanging siguradong legal na magulang ng isang hindi lehitimong anak, sa mata ng ating batas, ay ang kanyang ina. Kung kaya’t mahalaga na may lagda ang ina ng nasabing bata sa sertipiko ng kapanganakan nito.  Mahalaga rin na siya ay sumasang-ayon sa mga impormasyong nasasaad sa nasabing sertipiko.

Sa sitwasyon ng iyong kapatid, maaari siyang magsumite ng petisyon para kanselahin ang sertipiko ng kapanganakan ng kanyang anak na inirehistro noon ng kanyang kinakasama nang wala siyang kaalaman at lagda. Malinaw na ang sertipiko ng kapanganakan ng iyong pamangkin ay hindi naisagawa alinsunod sa probisyon ng batas na nagtatakda ng tamang paraan ng pagpaparehistro ng isang hindi lehitimong anak.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.

Mag-aaral ng ALS, ‘wag sayangin ang pagkakataon, tapusin ang programa

ni Kuya Win Gatchalian @Win Tayong Lahat | Feb. 20, 2025

Nakakabahala ang lumabas na datos ng Year Two Report ng Second Congressional Commission on Education (EDCOM II) pagdating sa bilang ng mga nagtatapos sa Alternative Learning System (ALS).

Nitong School Year 2023-2024, halimbawa, lumalabas na wala pang kalahati o 302,807 (46.2%) lamang sa 655,517 na mga mag-aaral ang nakatapos sa programa.Para sa mga hindi nakapagtapos ng kanilang pag-aaral, ang ALS ay nagbibigay ng pangalawang pagkakataon sa edukasyon.

Noong maisabatas ang Alternative Learning System Act (Republic Act No. 11510) na isinulong ng inyong lingkod, ginawa nating institutionalized ang ALS, pinatatag natin ito, at pinalawak ang saklaw para matulungan natin ang mga out-of-school children in special cases at mga nakatatandang mag-aaral, kabilang ang mga indigenous people na hindi nakapagtapos. 

Kasama sa mga out-of-school children in special cases ang mga mag-aaral na may kapansanan, children in conflict with the law, at mga kabataang nasa gitna ng mga sakuna.

Ayon sa isang pag-aaral ng UNICEF noong 2021, ilan sa mga dahilan ng mataas na dropout rate ang kakulangan ng suportang pinansyal, ang pangangailangan sa trabaho, at ang kawalan ng interes.

Ngunit kung wala pang kalahati ng mga mag-aaral ng ALS ang hindi nakakatapos, lumalabas na nasasayang ang pangalawang pagkakataong ibinibigay natin sa kanila.

Kaya naman nanawagan tayo sa Department of Education (DepEd) na tugunan ang kakulangan sa pagpapatupad ng batas sa ALS upang mapataas ang bilang ng mga nagtatapos sa programa.Isa sa mga mungkahi natin ang pagkakaroon ng guidance and counseling program upang mahikayat ang mga mag-aaral ng ALS na manatili sa programa.

Mahalagang maunawaan din ng ating mga mag-aaral sa ALS ang mga oportunidad na maaari nilang matanggap sa ilalim ng programa.Pinuna rin ng EDCOM na bagama’t nilagdaan ang batas sa ALS noong 2020, hindi pa rin lumalabas ang ilan sa mga pamantayan para sa pagpapatupad nito.

Kabilang dito ang mga pamantayan para tulungan ang local government units (LGUs) na magamit ang Special Education Fund (SEF). Hindi rin lumalabas ang revenue regulations na magbibigay sana ng mga tax incentives para sa pribadong sektor sa kanilang kontribusyon sa ALS. Hindi pa rin lumalabas ang mga pamantayan para sa pagkilala sa mga pribadong ALS providers.

Ang ALS ay nagbibigay ng pangalawang pagkakataon sa ating mga kababayan at hindi natin ito dapat sayangin. Tiwala ako na sa pagtutulungan ng iba’t ibang ahensya ng gobyerno at ng mga komunidad, maaabot natin ang bawat isa sa ating mga kababayang nangangailangan ng pangalawang pagkakataon sa edukasyon. Matitiyak nating hindi sila mapag-iiwanan at masusuportahan natin silang magkaroon ng magandang kinabukasan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com