Samsung UV Sterilizer, panalo!

ni Ronalyn Seminiano Reonico | July 2, 2020

Naglabas ng bagong device ang Samsung na kayang mag-sterilize at pumatay ng 99% ng bacteria sa loob ng 10 minuto katulad ng Staphylococcus, E-coli, at Candida albicans. Ito ay walang iba kundi ang ITFIT UV Sterilizer.

Ayon sa Samsung, ito ay "tested and proven by 3rd party laboratories.”

Kaya nitong linisin ang smartphone, galaxy buds, watches, sunglasses at iba pang bagay na magkakasya rito.

Magagamit din ito bilang wireless charger at ayon sa Samsung, tuluy-tuloy ang pagcha-charge nito kahit tapos na ang pag-i-sterilize sa smartphone. Mayroon din itong LED indicator, power button at USB-C para mai-charge ang sterilizer.

Sa ngayon, available na ang Samsung UV Sterilizer sa Thailand at nagkakahalagang THB 1,590. Available na rin ito sa ilang Samsung Service Centers sa Argentina, Chile, Croatia, Denmark, Finland, Japan, Republic of Korea, Malaysia, New Zealand, Norway, Pakistan, Peru, Poland, Russia, Spain, Sweden, United States, Ukraine at Vietnam.

Ayon sa SamMobile.com, “Samsung will soon expand the service to Australia, Austria, Canada, Czechia, France, Greece, Hong Kong, Hungary, India, Indonesia, Israel, Italy, Jordan, Kazakhstan, Latvia, Mexico, the Netherlands, Panama, the Philippines, Romania, Singapore, Taiwan, Thailand, the United Arab Emirates and the United Kingdom.”

Technical launch ng 3rd telco, alanganin

ni Mylene Alfonso | July 2, 2020

Inaasahang hindi matutuloy ang technical launch ng DITO Telecommunity, ang third telco sa bansa, na nakatakda sa susunod na linggo.

Sa pagdinig ng Senado kahapon ay sinabi ni DITO chief administrative officer Adel Tamano na bago ang July 8 deadline nito para sa ’technical launch’, ang Dito ay kasalukuyang nagtatayo ng 1,300 cell towers, kung saan 300 dito ay gumagana na, subalit hindi ito sapat para matugunan ang ipinangakong bilis at network coverage.

Sa technical launch sinusuri ng regulators kung ang mga kasalukuyang pasilidad ng Dito ay sapat upang matugunan ang mga ipinangako na nakasaad sa ilalim ng government licenses na nakuha ng kumpanya.

Para sa 2020, ang target ay itinakda sa maximum internet speed na 27 Mbps sa 37% ng populasyon ng bansa.

Kapag sumablay ang telco sa kanilang deadline ay walang magagawa ang kumpanya kundi ang humingi ng grace period mula sa Department of Information and Communications Technology (DICT).

Ayon kay dating DICT Undersecretary Eliseo Rio Jr., isa sa resource person sa Senate hearing, nangangahulugan ito na naubos na ng kumpanya ang isa sa dalawang grace periods sa pagtugon sa rollout targets sa ilalim ng prangkisa nito.

Connection, palpak... Senate hearing sa ‘Internet’, itinigil

ni Lourdes Abenales | July 2, 2020

Napilitang ihinto ng Senate committee on public services ang kanilang pagdinig kaugnay ng internet accessibility, makaraang makaranas mismo sila ng palpak na connection.

Sa nasabing hearing, kabilang sana sa mga resource person ang mga kinatawan ng Department of Information and Communications Technology (DICT), telecommunication companies (Telco) at iba pang stakeholders.

Hindi naitago ni Senate committee on public services chairperson Sen. Grace Poe ang pagkadismaya, dahil tila nasasayang ang magagandang impormasyon na isinisiwalat ng mga bisita, bunsod ng mahinang internet connection.

Kasama sa mga nakatakdang talakayin ang kakayahan nating humarap sa “new normal”, kung saan ang karamihang mga estudyante ay mag-aaral na gamit ang internet, habang marami naman ang magtatrabaho sa bahay upang maiwasan ang palagiang pagbyahe.