Prangkisa ng 3rd telco, posibleng bawiin ng gobyerno

ni Mylene Alfonso | July 3, 2020

Nanganganib na kumpiskahin ng pamahalaan ang P25.7 billion performance bond ng third telco player na Dito Telecommunity Corp. at bawiin ang radio frequencies na nakatalaga rito. Ito ay makaraang sabihin ng kumpanya sa pagdinig sa Senado noong Miyerkules na posibleng hindi sila makasunod sa July 8 deadline para sa kanilang technical launch, na nauna nilang ipinangako sa gobyerno bilang third telecommunications player ng bansa.

Ayon kay Dito chief administrative officer Adel Tamano, ang rollout ng kumpanya ay hindi pa sapat dahil sa lockdown upang mapigilan ang pagkalat ng coronavirus.

Sa pahayag ni dating Department of Information and Communications Technology (DICT) Undersecretary Eliseo Rio. Jr., isa sa resource person sa hearing, ang hindi pagtupad sa July technical rollout ay magbibigay sa Dito ng anim pang buwan upang matugunan ang kanilang commitments.

Sa ilalim ng terms of reference, ang kumpanya ay maaari lamang maka-miss ng targets ng dalawang beses. Kung hihigit pa rito ay makukumpiska ang kanilang performance bond at babawiin ang itinalagang radio frequencies sa kanila.

Sa technical launch sinusuri ng regulators kung ang mga kasalukuyang pasilidad ng kumpanya ay sapat upang matugunan ang mga ipinangako na nakasaad sa ilalim ng government licenses na nakuha nito.

COVID-19 vaccine ng BioNTech at Pfizer, dumaan na sa human trial

ni Thea Janica Teh | July 3, 2020

Nagkaroon ng positibong resulta ang BioNTech ng Germany at Pfizer, isang pharmaceutical sa US sa paggawa nito ng coronavirus vaccine.

Ayon kay BioNTech CEO Ugur Sahin, ito ay kinilala bilang BNT162b1. Ito ay nagbibigay ng antibody o mataas na level na makikita sa convalescent serum- dugo ng taong gumaling na sa virus- na may mababang dose.

Nakapaloob sa preliminary data ang phase 1/2 trial kung saan makikita na hindi toxic ang vaccine at hindi makasasama sa immune system para paghandaan sa paglaban sa virus.

Sa 45 katao na may edad 18-55 na sumailalim sa trial, karamihan ay nakatanggap ng 2 dose, 21 araw ang pagitan. Matapos ang pangalawang dose, nilagnat ang karamihan ayon sa study na uploaded sa pre-publication website medrxiv.org.

Ang vaccine ay nagre-rely sa messenger RNA, isang genetic code na dumadaloy sa human cells para ma-generate ang antibodies na kayang patayin ang coronavirus.

Sa ngayon, mayroon ng 23 COVID-19 vaccine projects ang sumasailalim sa trial sa tao, ayon sa London School og Hygiene & Tropical Medicine.

Facebook App, may alert na sa pagsuot ng face mask

ni Thea Janica Teh | July 3, 2020

Ibinahagi ng Facebook noong Huwebes na magkakaroon na ng reminders para sa mga user na magsuot ng protective mask para makatulong sa pagpapalaganap ng health protocols.

Makikita sa taas ng feed ang isang alert sa Facebook at Instagram sa US at planong palawakin pa ito hanggang ibang bansa.

“With the rise in COVID-19 cases in US, we’re putting an alert at the top of Facebook and Instagram to remind everyone to wear face coverings,” sabi ng kompanya.

Bukod pa rito, magdaragdag din ang Facebook ng additional prevention tips at links sa public health agencies para sa COVID-19 information center.