Mula 49.10 naging 52.16Mbps... Internet sa ‘Pinas, mabilis na!

ni Zel Fernandez | April 25, 2022

Malugod na ibinalita ng pamahalaan ang naging pagbilis umano ng internet speed sa Pilipinas sa isinagawang pag-aanalisa nitong nakaraang Marso.

Ayon sa ulat ng Ookla Speedtest Global Index, naitala na mula sa 49.10Mbps noong Pebrero ay umakyat sa 52.16Mbps ang fixed broadband median speed sa bansa nitong nakaraang Marso.

Sang-ayon ng gobyerno, indikasyon ito na bumubuti na ang internet speed sa ‘Pinas.

Paliwanag pa sa detalye ng naturang report, ang latest download speed ay kumakatawan sa 6.23% month-to-month na pagtaas ng speed para sa fixed broadband, habang ang average download speed para sa fixed broadband ay naitala sa 83.37Mbps.

Dagdag pa rito, bumilis din umano ang mobile median speed sa download speed na 19.38Mbps mula sa 18.79Mbps noong Pebrero.

Batay sa report, ang latest median download speed ay kumakatawan sa 3.14% month-to-month na pagtaas ng speed para sa mobile, habang ang average download speed ay naitala sa 45.48Mbps.

Matatandaang nauna nang nagbigay ng mahigpit na direktiba si Pangulong Rodrigo Duterte sa mga local government units na pabilisin ang pag-iisyu ng permit sa mga telecommunications companies (telcos) upang agarang maitayo ang mga cellular towers at fiber optic network na kinakailangan sa pagpapalakas ng kanilang serbisyo at koneksiyon sa mga kliyente nito sa bansa.

Konektado sa Clark Freeport Zone, Pampanga... South Korea, magtatayo ng ‘smart city’ sa ‘Pinas!

ni Zel Fernandez | April 23, 2022

Ibinalita ng Department of Foreign Affairs (DFA) nitong Abril 22, kahapon, na isang smart city ang itatayo ng Korea Land & Housing Corporation (LH) sa Clark Freeport Zone sa Pampanga.

Pirmado na ng government-owned Clark Development Corporation (CDC) at Korea Land & Housing Corporation (LH) ang smart city memorandum of understanding (MOU), sa pangunguna ni CDC President Manuel Gaerlan sa Philippine delegation sa signing ceremony na sinaksihan nina Philippine Embassy Economic Officer and Third Secretary Reisha Olavario at Commercial Counselor Jose Ma. Dinsay noong Abril 15, sa Songdo International Business District sa Incheon province, 30 kilometers southwest ng Seoul, South Korea.

Batay sa pinirmahang MOU, ipinahayag na ang LH ay magtatayo ng smart city na konektado sa Clark International Airport, na kalaunan ay magiging isang logistics hub na mayroong imprastruktura para sa tourism, recreation, at aviation maintenance.

Ani Gaerlan, inaasahan niya ang “technology sharing” sa pamamagitan ng MOU, partikular ang Korea communications network na gagamitin ng LH Urban Development para sa K-Smart City Development.

Hiwalay ding nakaharap ni Philippine Ambassador to South Korea, Ma. Theresa de Vega, ang mga CDC officials upang talakayin ang planong Manila-Seoul cooperation projects at investment promotion sa Clark Freeport Zone, sa hinaharap.

Ayon sa DFA, ang makabagong smart city ay gagamit umano ng artificial intelligence at malaking data para maproseso nang real-time ang mga impormasyon na kokolektahin sa pamamagitan ng mga sensors, at gagamitin naman ng mga city operators para mag-analyze ng mga datos para sa mga plano sa hinaharap.

"The Smart City MOU is a leap forward in the Philippines' shift to the 4th Industrial Revolution and a testament to the Philippines and Korea's shared ideas on prosperity in the Asia Pacific and our increased economic cooperation," pahayag ng DFA.

Handang gumastos ng 7 bilyong dolyar… Volkswagen, magre-release ng mga electric cars

ni Zel Fernandez | April 21, 2022

Pursigido ang German vehicle manufacturer Volkswagen na angkinin ang top spot ng global electric car market sa automotive industry.

Plano ng Volkswagen na tuluyan nang magpaalam sa tipikal na internal combustion engine at i-phase out ang lahat ng kanilang mga gasoline powered vehicles sa loob ng susunod na dekada at mula rito ay nais na lamang ng kumpanya na magbenta ng mga electric cars.

Ayon pa sa German vehicle manufacturer, willing silang gumastos ng mahigit 7 billion dollars sa susunod na limang taon upang ma-boost ang kanilang “research and development, and manufacturing capabilities”, para ma-achieve ang goal nitong mag-focus na lamang sa pagbebenta ng mga sasakyang may electrical powered engine.

Ang Volkswagen na isang German motor vehicle manufacturer ay located sa Wolfsburg, Lower Saxony, Germany. Itinatag noong 1937 ng German Labour Front, na sikat sa kanilang iconic Beetle, ito ang kinilalang flagship brand ng Volkswagen Group at tinaguriang “largest car maker by worldwide sales” taong 2016 at 2017.