Reddit, kailangang pondohan ang content moderation

ni Angela Fernando - Trainee @News | March 25, 2024

Kailangang maglaan ng social media platform na Reddit (RDDT.N) ng malaking halaga para sa pagsusuri ng nilalaman ng kanilang application, ayon sa mga analyst.

Maaaring harapin ng nasabing kumpanya ang mas malalim na pag-iimbestiga na banta sa matagal nang patakaran nitong umasa sa mga netizens o volunteers upang mapanatili ang kaayusan sa kanilang plataporma.

Sa kanilang unang alokasyon ng initial public offering (IPO), binalaan ang Reddit na ang kanilang natatanging paraan ng content moderation ay maaaring magdulot sa kanila ng mga pagsubok tulad nu'ng taong 2023, nang ilang moderator ang nagprotesta laban sa kanilang desisyon na singilin ang mga developer ng third-party app para sa access sa kanilang data.

Nagpahayag naman ang CEO ng alternative investment solutions firm Accelerate Financial Technologies na si Julian Klymochko na hindi pangmatagalan ang pagdepende sa mga netizens o volunteers lalo na't sa panahon ng pagsusuri ng regulasyon na haharapin ng kumpanya sa kasalukuyan.

Benta ng iPhone, bumaba

ni Angela Fernando - Trainee @News | March 22, 2024

Dumalaw si Tim Cook sa China kasabay ng pagbubukas ng isang Apple store sa Shanghai — ang pangalawa sa pinakamalaking branch nito sa buong mundo.

Bahagi ito ng pagsisikap ng kumpanya upang suriin at subukang baguhin ang pagbaba ng mga benta ng iPhone sa isa sa pinakamahalagang pandaigdigang merkado.

Ang nasabing Apple store ay nagkakahalaga ng umaabot sa P650-milyon — makikita ito sa sentral na distrito ng Jing'an sa Shanghai.

“Nonghao, Shanghai!” saad ng Apple CEO na si Cook sa isang Weibo post.

Dagdag niya, “I’m always so happy to be back in this remarkable city.”

Sa kanyang post, tila sinusubukan niyang maengganyo ang mga lokal na mamamayan ng China matapos ibida na kumain siya ng isang traditional na pagkain para sa breakfast.

Sa kasalukuyan, may 8 na Apple store ngayon sa Shanghai na pinakamarami kumpara sa kahit saang lungsod ng bansa.

TikTok, iba-ban sa U.S.

ni Eli San Miguel - Trainee @News | March 15, 2024

Ipinasa ng House of Representatives sa U.S. noong Miyerkules ang bill na naglalayong ipagbawal ang TikTok app sa bansa.

Umani ng malakas na suporta ang Protecting Americans from Foreign Adversary Controlled Applications Act, na nakakuha ng 352 pabor na boto at 65 lamang ang hindi pabor.

Nagbabala ang mga opisyal ng United States na may impluwensya ng gobyerno ng China ang TikTok. Bilang halimbawa, iniiwasan nilang magamit ng China ang app upang makialam sa 2024 U.S. elections, ayon kay Director of National Intelligence Avril Haines.

Kasalukuyang walang katiyakan ang susunod na hakbang na haharapin ng TikTok bill. May ilang mga senador na mas pinipili ang ibang paraan upang kontrolin ang mga foreign-owned apps na nagdudulot ng mga alalahanin sa seguridad.

Binanggit naman ni Senate Majority Leader Chuck Schumer na patuloy na susuriin ng Senado ang batas.