BlackBerry, may ‘surprise profit’ dahil sa demand sa cybersecurity

ni Angela Fernando - Trainee @News | April 5, 2024

Nag-ulat ang BlackBerry ng Canada ng kanilang ‘surprise profit’ sa ika-apat na quarter dahil sa mas mataas na demand para sa kanilang serbisyong cybersecurity sa gitna ng lumalaking krimen online.

Umakyat na sa 6.4% ang mga bahagi ng kumpanya na nakatala sa United States matapos ang sesyon.

Iniulat din ng kumpanya ang isang nababagong net profit na 3 sentimo bawat share para sa quarter na natapos nu'ng Pebrero 29, kumpara sa average na pagtaya ng mga analyst na pagkalugi na 3 sentimo, ayon sa datos ng LSEG.

Google, inaayos ang demanda sa ‘Incognito’

ni Angela Fernando - Trainee @News | April 2, 2024

Magbubura ang Google ng bilyun-bilyong talaan ng data bilang bahagi ng pag-aayos para sa isang demanda sa ‘Incognito’ feature kung saan inakusahan ang tech giant ng hindi wastong pagsubaybay sa pag-browse sa web ng mga user na dapat sana'y pribado.

Ang kaso ay orihinal na isinampa nu'ng 2020 na kumaladkad sa kumpanya dahil sa maling pagpapakita ng kinokolekta nitong data mula sa mga user na nag-browse sa internet sa pamamagitan ng private browsing mode sa Chrome.

Sumang-ayon ang Google na ayusin ang kaso nu'ng 2023, ngunit ang mga tuntunin ng pag-aayos ay unang ibinulgar sa isang pagsusumite nu'ng Abril 1.

Ang mga aksyon ng kanilang pagsasaayos ay nakapaloob sa dokumento ng Korte na isinumite nu'ng Lunes sa pederal na Korte ng San Francisco.

Papalitan din ng Google ang kanilang pahayag upang ipaalam sa mga user kung anong data ang kinokolekta nito sa bawat pagpasok ng isang user sa isang pribadong sesyon ng pag-browse.

Samantala, sa susunod na limang taon, papayagan ng Google ang mga user ng Incognito na i-block ang third-party cookies bilang bahagi ng pag-aayos.

PhilHealth Member Portal, nasa eGovPH Super App na!

Ipinabatid kamakailan ng Philippine Health Insurance Corporation (PhilHealth)  na bahagi na ng eGovPH Super App ang sarili nitong Member Portal. Ito ay upang lalong mapadali ang access sa mga PhilHealth information ng mga miyembro alinsunod na rin sa panawagan ni Pangulong Ferdinand “Bongbong” Marcos Jr. na padaliin ang mga transaksyon sa gobyerno sa pamamagitan ng digitalization.

Ang eGovPH Super App ay isang one-stop-shop platform kung saan mabilis nang makakapag-transaksyon ang publiko sa iba’t-ibang ahensya ng gobyerno tulad ng PhilHealth, SSS, GSIS, PAG-IBIG, at mga lokal na pamahalaan.

“Ang digitalization ay isa sa ating mga prayoridad bilang tugon sa pagnanais nating mas mapabuti ang serbisyo ng PhilHealth sa mga miyembro” pahayag ni PhilHealth President at CEO Emannuel R. Ledesma Jr.

Para ma-access ang impormasyon tungkol sa inyong PhilHealth sa eGovPH App, i-download ang eGovPH App sa Google Play Store o Apple App store, mag- sign up gamit ang personal na detalye tulad ng pangalan, petsa ng kapanganakan, address, contact number, at email address. Magpapadala ng One Time Password o (OTP) sa contact number na inilagay para sa beripikasyon. Panghuli ay ang verification ng account.

Madaling gamitin ang eGovPH Super App dahil sa user-friendly interface at automated button nito na nag-uugnay sa mga government site gaya ng PhilHealth kung saan maaaring ma-access ng miyembro ang kanyang membership record, contribution history at registration sa Konsulta Package Provider.

Aabangan din ang iba pang mga serbisyo ng PhilHealth na nakatakdang isama sa eGovPH Super App tulad ng online registration at amendment, registration sa Konsulta Package Provider at paggamit ng QR code para mapadali ang beripikasyon.

PR 2024-0005 (Filipino version)