Pagiging palatanong ng bata, iba’t iba ang resulta sa kanilang pagtanda

ni Sr. Socrates Magnus II - @Karunungang Lihim| August 19, 2020

Bigyang-daan natin ang pagpapatuloy sa pagtalakay ng mga bagay na kailangang gawin ng tao, may COVID-19 pandemic man o wala.

“Do not be afraid to ask questions,” tulad ng nasabi sa nakaraang isyu, ito ang naging gabay ni Albert Einstein sa kanyang buhay, kaya siya ay kinilala bilang may pinakamalakas na impluwensiya sa larangan ng siyensiya at sa buong mundo kung ang pag-uusapan ang mas pinaniwalaan ng maraming pinuno ng mga bansa.

Ayon sa kasaysayan, hinihimok si Einstein na mamuno sa United Nations pero tinanggihan niya ito. Naitala rin sa kasaysayan na siya ay pinipilit na maging presidente sa Israel, pero ito ay mahigpit niya ring inayawan. Kung sa iba in-offer ang once in a lifetime opportunity na ito, tiyak na kanila itong susunggaban.

Pero si Einstein ay hindi. Wala siyang balak mamuno sa kahit anong bansa. Marahil, ang gusto lang niya ay magtanong nang magtanong tulad ng kanyang sinabi na “Do not be afraid to ask questions.” Nakakatuwa at nakakamangha na mayroon palang mas gusto ang magtanong kaysa sa iba pang bagay sa mundo.

Pero ang hindi nakakatuwa na masasabing side effect, kumbaga, sa pag-inom ng mga gamot, ang sinabi niyang ito ay ginagamit ng mga misis at girlfriend kapag nagseselos na may nararamdamang may masamang ginawa ang kanilang mahal.

Tanong nang tanong at parang nag-iimbestiga, tapos tanong pa rin nang tanong kahit sinasagot sila nang tama pero naiirita lang. Tapos, ‘pag nagtanong at sinagot ulit, ganu’n na naman ang nangyayari kahit alam niyang mahal na mahal naman siya ng kanyang kasintahan o asawa.

May makikita rin tayong mga bata na habang lumalaki ay tanong nang tanong sa kanilang mga magulang at kapamilya. Kahit nasagot na, hindi sila nauubusan ng tanong, kung saan ang ganitong musmos na bata ay larawan ni Einstein noong siya ay bata pa.

May anak ka bang tanong nang tanong? Huwag kang maiirita, sa halip ay matuwa ka dahil ayon sa mga sikolohista, ang ganitong bata ay aani ng karangalan at pagkilala sa kanyang pagtanda.

Samantala, may mga tanong nang tanong pero alam naman ang sagot sa kanyang katanungan. Ayon sa mga eksperto, ito naman ay ang mga taong walang mararating sa buhay dahil inuuna ang pagyayabang at kahambugan.

Gayundin, may mga tanong nang tanong pero ayaw namang ilantad ang kanilang mga tanong, kumbaga, sinasarili lang at hindi mo malaman kung mahiyain o ano. Ayon sa mga sikolohista, darating ang sandali sa kanilang buhay na siya ay kikilalanin na may natuklasang bago at kakaibang paniniwala na huhubog sa kaisipan ng tao sa buong mundo.

Mayroon ding tanong nang tanong pero ayaw sabihin o ipaalam kung ano ang kanyang mga tanong. Sa kanyang pagtanda, ayon din sa mga sikolohista, siya ay magtatayo ng sarili niyang relihiyon.

Pero mas marami ang pangkaraniwan lang, nagtatanong nang simple ang mga tao na kadalasan ay tungkol lang sa kanilang personal na interes. Ayon sa mga sikohista, sila ay mga tagasunod sa lipunan, pero may babala na kapag ang kanilang personal na interes ay nasaling, nahadlangan o tinanggal ang mga bagay na kinakapitan ng kanilang personal na ligaya, sila ay magrerebelde at tiyak na babaguhin nila ang gobyernong hindi nakapagbigay ng kanilang personal na saya at ligaya.

Itutuloy

Dahilan kaya ‘di dapat matakot magtanong nang magtanong ang tao

ni Sr. Socrates Magnus II - @Karunungang Lihim| August 17, 2020

Bigyang-daan natin ang pagpapatuloy ng pagtalakay sa mga bagay na kailangang gawin ng tao, may COVID-19 pandemic man o wala.

Napakahirap hanapin ng gamot sa COVID-19, buong mundo ang naghahanap pero mukhang mailap pa rin malaman kung ano nga ba ang gamot sa sakit na ito.

Tulad ng nasabi sa nakaraang isyu, mas magandang yakapin natin ang mga salitang nagdala sa rurok ng tagumpay kay Albert Einstein na kinikilala bilang most influential man of the 20th century.

Sabi niya, “Do not be afraid to ask questions,” ito mismo ang kanyang naging guiding star na tumanglaw sa lahat ng kanyang achievements sa buhay.

Kung isasabuhay ito ng bawat isa, ang tagumpay ay maaabot at walang bagay na hindi matutuklasan kahit ang kalihim-lihimang kaalaman ay malalantad.

Sobrang sikat ang sinasabing ito ni Einstein, kaya paborito itong gamitin ng mga kabataan noon.

Sa ngayon, ito pa rin ang kinakapitan ng mga kabataan, kapag sumasagot sila sa kanilang mga magulang, parang naging lisensiya ang “Do not be afraid to ask question” ni Einstein, kaya ang mga magulang at anak ay parang laging nagbabangayan.

Sagot nang sagot ang anak na lalo namang ikinagagalit ng mga magulang. Sa biglang tingin, kung babanggitin ang sinabi ni Einstein, may punto ang kabataan. Pero kung susuriing mabuti, wala namang sinabi si Einstein na “Do be not afraid to answer,” kaya ang pagsagot sa mga magulang ay hindi naman kinukonsinte ni Einstein. Sabi niya nang malinaw ay “question” at hindi ang pagsagot-sagot o “answer”.

Tanong tayo nang tanong at habang tayo ay nagtatanong, madaragdagan ang ating kaalaman at ang mga hindi naman dapat paniwalaan, sa katatanong natin ay ating maiiwasan kaya magandang isabuhay sinasabing “Do not be afraid to ask questions.”

Ito rin ang magiging susi para makatuklas tayo ng mga bagong ideya, kaisipan, pormula at susi sa pagresolba ng ating mga suliraning kinakaharap, partikular na ang COVID-19 na nagpapahirap sa buong mundo.

Kung hindi tayo magtatanong nang magtatanong, ibig sabihin ay hindi na tayo susulong sa kaalaman, karunungan at bagong katotohanan. Ang sinumang nagsasabi na walang gamot sa COVID-19 ay tinatanggap na siya ay talo na.

Ang ganitong mga payahag ay self-defeating, procrastinating at counter productive. Kaya dapat sa mga ahensiya ng pamahalaan ay iwasan ang pagpayag sa sinasabing walang gamot sa COVID-19.

Habang naghahanap pa ng gamot, ang ganitong statement ay hindi dapat sinasabi dahil hindi pa naman tapos ang paghahanap, as in, nasa proseso pa ang mundo ng pagtuklas, kaya wala sa tamang lugar ang pagsasabi na walang gamot sa COVID-19.

Kung ipagpipilitan ng mga namamahala sa kagawaran ng kalusugan ang ganitong pahayag, sa huli, mahirap mang tanggapin, talo na tayo ng COVID-19. Ito ay dahil na rin sa pagsasabing walang gamot sa sakit na ito ay hindi lang self-defeating kundi self-destructive din, kumbaga, nagtagumpay ang COVID-19 laban sa mga tao o “Man is destroyed by COVID-19.”

Itutuloy

Alamin mula kay Señor... kaisipan mula kay Albert Einstein na oks gamitin sa paglaban sa COVID-19

ni Sr. Socrates Magnus II - @Karunungang Lihim| August 14, 2020

Bigyang-daan natin ang pagpapatuloy sa pagtalakay ng mga bagay na kailangang gawin ng tao, may COVID-19 pandemic man o wala.

Napakahirap labanan ang COVID-19. Habang nagsisikap ang pamahalaan at ginagawa na nila ang lahat ng kanilang alam gawin, mukhang wala pa rin itong epekto dahil dumarami pa ang mga nagkakasakit.

Sa ganitong sitwasyon, hindi tayo dapat sumuko o mawalan ng pag-asa. Ang mas maganda ay magkaroon tayo ng positibong kaisipan.

Bagama’t sa ngayon ay wala pang natutuklasang gamot sa COVID-19, mali pa ring sabihin na walang gamot para rito dahil ang mas tamang sabihin ay “Hindi pa natutuklasan ang gamot.”

Dahil dito, dumako tayo sa mga dakilang manunuklas na lumabas sa mundo, mas magandang sa kanila tayo kumuha ng gabay kahit umaasta ang ahensiya ng pamahalaan sa larangan ng kalusugan na parang sila lang ang nakaaalam sa mabuti at hindi mabuti.

Ang ganitong pustura ng pamahalaan ang nakikitang dahilan kaya hindi bumubuti kundi lumalala pa ang sitwasyon kaysa sa dati, partikular ang bilang ng mga nagkakasakit.

May isang tao na nabanggit na natin na ikinukonsiderang most influential physicist of the 20th century at siya ay si Albert Einstein. Siya rin ang pinakasikat na alagad ng agham dahil sikat na sikat ang kanyang pormula na “E = mc2.”

Sa kanyang panahon, ang umiiral na batas ng agham tungkol sa Law of Gravity ay kanyang kinuwestiyon dahil may nadiskubre siyang mas tama. At habang siya ay nag-aaral sa mga batas ng pisika, nadiskubre niya ang nasabing pormula.

Kung ngayon ay ganito ang mangyayari, tiyak na si Einstein ay pagtutulungang salungatin ng umiiral na sistema, lalo na ng pamahalaan na umaasa lang naman sa ahensiya ng agham at kalusugan.

Kung bakit may pinaniniwalaang Law of Gravity, tapos may darating at sasabihing may ibang Law of Gravity, at malamang na sa kulungan pupulutin si Einstein.

Ang kanyang pormula na “E = mc2” ay hindi naman gaanong sinalungat ng mga akala ay marunong sila dahil sa Law of Gravity ni Einstein, sa huli, siya ay pinaniwalaan din ng maraming dalubhasa.

Marahil, alam na nila ang kanilang aabutin kung kokontrahin nila si Einstein kung saan sila ay mapapahiya lang.

Wala pang nakaaalam noon ng “E = mc2” kundi si Einstein lang. Ang “E” ay para sa Energy at ang “m” ay para “mass” o bagay at ang “c2” ay equal sa speed ng liwanag. Sa Ingles, ang E = mc2 ay Energy = mass times the speed of light squared.

Pero ang totoo, ang “E = mc2” ay sa mundo lang naman ng agham o siyensiya sikat dahil ang mga pangkaraniwang tao ay wala namang pakialam dito. Masyado itong teknikal para magustuhan ng maraming mamamayan, lalo na sa mundo ng social science at social media.

May isa pang sikat na kaisipan mula kay Einstein at ito ay mas sikat sa “E = mc2” at mas gustung-gusto ng mga tao at kailangang isabuhay ng mga taga-pamahalaan, namamahala sa larangan ng kalusugan at dalubhasa na naghahanap ng panlaban o gamot sa COVID-19.

Ito ay ang “Do not be afraid to ask question,” ang mga salitang ito ay mula mismo kay Einstein at dito rin siya nabubuhay. Kumbaga, isinasabuhay niya ang kanyang sinabi na “Do not be afraid to ask question.”

Ano ang kabuluhan nito para sa ating lahat, lalo na ngayong nilalabanan natin ang mahiwagang COVID-19?

Itutuloy