Alamin mula kay Señor... paraan para kumita kahit walang trabaho

ni Sr. Socrates Magnus II - @Karunungang Lihim| July 20, 2020

Bigyang-daan natin ang pagpapatuloy ng mga bagay na kailangang gawin ng tao, may COVID-19 pandemic man o wala.

Simula nang maging mundo ang mundo, hindi nawawala ang kalaban ng tao. Sinasabi ang mismong demonyo ay nanatiling sinisira ang diskarte ng tao, pero hindi lang ang diyablo ang kalaban ng tao dahil sa kanyang paligid, lalo na noong unang panahon ay nagkalat ang maninilang hayop.

Ang maninilang hayop ay ang mga hayop na pumapatay at kumakain sa tao. Kahit nga ang panahon ay kadalasang kalaban din ng tao, noon pa man ay may kidlat, kulog, bagyo, baha at iba pang kalamidad.

Ang mga karamdaman o sakit ay nasa paligid ng tao, kahit kailan ay hindi rin naman ito nawawala habang ang mundo ay mundo at ang tao ay tao. Pero ang mga ito ay hindi naging hadlang sa tao para hindi siya magpatuloy na mabuhay nang maayos at masaya sa ibabaw ng mundo.

Silipin natin ngayon ang pagbalik sa kasaysayan ng tao.

Nang nasa labas na ng paraiso nabuhay ang tao, nangyari ang dapat mangyari kung saan sa kanilang mga kamay manggagaling ang kanilang kakainin. Ito ay simpleng nagsasabi na ang tao ay nagtrabaho.

Ikaw, kailangan mo na ring magtrabaho at huwag mong isipin na ang pamamasukan sa isang kumpaya ang ibig sabhin ng magtrabaho. Alam mong mali ang ganitong pananaw, kaya bilang tao, magtrabaho ka kahit hindi sa isang kumpanya.

Ang unang ginawa ng tao nang sila ay nasa labas na ng paraiso ay ang magtanim. Sa pagtatanim, alam ng unang tao na ang isang munting buto ay magiging malaking puno. Alam din nila na ang isang tangkay ng halaman ay puwedeng maging ganap na halaman na kanilang pakikinabangan.

Kaya puwede mo ring gawin ang ganu’n dahil ang ilang tangkay ng talbos ng kamote ay puwede mo nang ibenta kapag ito ay pinatubo at kung dadamihan mo ang talbos na itinanim mo, dadami rin ang pera mo na higit sa panggastos mo sa araw-araw.

Hindi katwiran na wala kang loteng pagtataniman dahil sa dami ng lugar na puwedeng lagyan ng talbos tulad ng gilid ng kalsada. Sa haba ng kalsada, mahaba rin ang iyong magiging talbusan.

Ganundin sa gilid ng mga daluyan ng tubig o irigasyon, tingnan mo, wala namang mga tanim, hawanin mo at iyong taniman. Ang mga gilid ng mga bukirin, ilog at bakanteng lote ay puwede mo ring gamitin.

Kung may pagkakataon na magpaalam sa may-ari ng bakanteng lote, magpaalam ka na at sabihin mong magtatanim ka lang ng talbos ng kamote at mas malamang na pumayag siya. Dahil magtatanim ka lang ng talbos, huwag mong lalagyan ng kahit na ano, pahingahan, kubo o kahit ano dahil palalayasin ka ng may-ari. Ibig sabihin, maging tapat ka at talbos lang ang itatanim mo, wala nang iba pa.

Dito pa lang kung gagawin mo, magugulat ka dahil hindi ka na ang simpleng tao dahil kikilalanin ka bilang supplier ng talbos.

Kikita ka ba? Siyempre, oo!

Itutuloy

Past, dapat pagkunan ng aral para umunlad at ‘di para mabuhay sa nakaraan

ni Sr. Socrates Magnus II - @Karunungang Lihim| July 15, 2020

Bigyang-daan natin ang pagpapatuloy sa pagtalakay ng mga bagay na kailangang gawin ng tao, may COVID-19 pandemic man o wala.

Tumingin sa malayo, ito ang isang susi ng tagumpay na nagsasabing ang sinumang nakatingin sa malayo ay maaabot ang kanyang mga pangarap.

Ito ba ay nangangahulugan na bawal nang tumingin sa likuran?

Hindi naman ipinagbawal ang pagtingin sa likuran dahil may maganda ring nakukuha rito kung saan ang “likuran” ay tumutukoy sa nakaraan. Sa paglingon sa nakaraan, may makukuha rin tayong magagandang aral na gagamitin natin upang pagandahin ang hinaharap.

Kaya puwedeng-puwede rin namang lumingon sa nakaraan, pero ang layunin ay ang kumuha ng mahahalagang kaalaman para magamit sa pagpapaganda ng buhay.

Gayunman, mapanganib ang tingin nang tingin sa nakaraan dahil parang bitag ito na maaaring hindi ka na makaalis at mabubuhay na lang sa nakaraan at ‘pag nangyari ‘yun, malabo ka nang umasenso.

Kaya magandang mabanggit din natin dito ang isang kuwento mula sa sagradong aklat tungkol sa paggunaw ni God sa Sodoma at Gomora sa pamamagitan ng apoy.

Sinabi ng mga anghel kay Lot at sa kanyang pamilya na huwag titingin sa likuran habang sila ay umaalis sa bayan ginugunaw ni God.

Dagdag pa ng mga anghel, kapag lumingon likuran, magiging haliging asin sila. Hindi naniniwala ang asawa ni Lot sa babala ng mga anghel at siya ay lumingon sa likuran at naging haliging asin.

Pero bakit nga ba hindi kaiga-igaya ang tumingin sa likuran o nakaraan? Ito ay sa dahilang may isa pang pormula ng tagumpay na sa totoo lang ay sapat na kapag naunawaan ay magdadala sa tao sa kanyang magandang kinabukasan.

Ito ang palaging ipinapayo sa lahat ng gustong lumigaya at gumanda ang buhay na “move on”, na ang ibig sabihin ay hindi ang move backward o sideward, ang move on ay move forward.

Kaya sobrang linaw na ang tunay na magpapalaya sa tao sa buhay na ito ng kahirapan, dusa, pasakit at sama ng loob ay ang sinasabing “You must move forward”.

Baka magkamali ka. Muli, ang move on, bagama’t paggalaw para mabago ang kalagayan ay hindi move backward at sideward, ang “move” ay palaging paharap o forward. Ang forward ay ang hinaharap at sa iyong hinaharap, naroon at makakaharap mo nang mukhaan ang iyong mga pangarap.

Sa move backward, hindi mo mararating ang iyong pangarap, lalo na move sideward dahil ito ay nagsasabing maliligaw ka at malabo nang marating mo ang inaasam-asam mong tagumpay.

Itutuloy

Pagtingin sa harap at malayo, isang daan para may marating sa buhay

ni Sr. Socrates Magnus II - @Karunungang Lihim| July 13, 2020

Bigyang-daan natin ang pagpapatuloy ng mga bagay na kailangang gawin ng tao, may COVID-19 pandemic man o wala.

Para mabigyang-diin natin ang isa sa simpleng Law of Success, ulitin natin ang ating nabanggit sa nakaraang isyu. Ikaw ay tumingin sa malayo, gawin mong ugali ang pagtingin sa malayo, kumbaga, isabuhay mo ito.

Bakit? Dahil isang katotohanan na ang kahulugan ng “Malayo ang mararating ng tao” ay nangangahulugan na siya ay magiging matagumpay sa kanyang buhay.

Samantala, ang pagtingin sa ibaba ay nagsasabing ang taong ito ay nalulungkot dahil kahit sino ang nalulungkot, sa ayaw o sa gusto niya ay mas madalas, nakatutok ang mga mata niya sa ibaba.

Ito rin ang nangyayari sa mga bigo sa buhay kung saan tanggap nila na sila ay bigo. Minsan pa nga, ang mga bigo ay hindi lang sa ibaba nakatingin kundi hawak-hawak pa ang ulo na parang siya ay wala nang magagawang paraan para hindi mabigo.

Huwag kang susuko, ituloy mo ang laban dahil ang mga kabiguan ay pansamantala lang. Sabi nga, “Failure is temporary,” sabi rin ng marami, ang failure ay isang postponed success lang.

Kaya kahit mabigo ka, itaas mo pa rin ang leeg mo, itaas mo rin ang noo mo at ang mismong ulo ay itaas mo at sa tumingin ka sa malayo. Ito ang nagsasabing hindi ka puwedeng mapabilang sa mga suko na dahil lalaban ka pa.

Mas magandang makaugalian na ang tao ay nakatingin sa malayo. Ang totoo nga, kapag may problema, kusang napapatingin sa malayo at ang nakakagulat, hindi katagalan ay makakahanap na ng solusyon sa problema kahit gaano pa ito kabigat.

Ang pamamaraang ito ay subok na ng mga namamahala sa malalaking kumpanya. Sila na mga nakatataas at humahawak ng mabibigat na obligasyon ay sa totoo lang ay isinasabuhay ang pagtutok ng mga mata sa malayo.

Subukan mo. Sa simula, tumingin ka sa malayo at makikita mo na biglang magbabago ang iyong mundo, magiging positibo ka at sino nga ba ang hindi nakaaalam na ang isa sa susi ng success ay ang “Be positive!”

Samantala, ang mga taong sa gilid tumitingin habang nakikipaglaban sa hamon ng kapalaran ay hinuhusgahan ng mga nanonood na papatakas na, as in, tatakas na dahil ito mismo ang ibig sabihin ng tingin nang tingin sa gilid at aayaw na sa laban.

Parang mahirap paniwalaan, pero ito ay aktuwal na nangyayari sa mga labanan kung saan ang nasa gitna o referee, kapag nakitang tumitingin na sa gilid ang isa sa naglalaban, ito ay aayaw na.

Ganito rin ang katotohanan sa labanan ng cockfighting kung saan ang panabong na biglang tumingin sa gilid at hindi na tumitingin sa kalaban ay idideklarang aatras na sa laban.

Kaya muli, wala nang mas maganda pa na isabuhay ng tao ang dapat sa malayo nakatingin dahil ito mismo ay nagsasabing muli, malayo ang kanyang mararating kung saan siya ay magiging matagumpay sa kanyang buhay.

Itutuloy