Teaching supplies allowance ng mga guro, mas tumaas at permanente na

ni Sonny Angara @Agarang Solusyon | June 15, 2024

Dlawang linggo na ang nakararaan nang personal nating masaksihan ang paglagda at tuluyang pagsasabatas ni Pangulong Bongbong Marcos, Jr. sa Kabalikat sa Pagtuturo Act na naging daan upang maging permanente na ang teaching supplies allowance ng ating mga guro sa public schools.

Dating tinatawag na “chalk allowance”, ang pondo para sa supplies allowance ng mga guro ay magmumula sa budget ng Department of Education. Ito ay tulong pinansyal sa mga teacher para hindi na sila gumamit ng sarili nilang pera para makabili lamang ng mga gamit sa pagtuturo tulad ng papel, ballpen at chalk. Ang nakatutuwa pa rito, permanente na nga ang teaching supplies allowance, itinaas pa ito sa halagang P10,000 na matatanggap ng bawat guro sa public schools taun-taon.

Matatandaan na mula 2010 hanggang 2011, tanging P700 lamang ang inilalaan ng gobyerno para sa chalk allowance sa public school teachers.

Sa sumunod na tatlong taon, tumaas ito sa P1,000 matapos madagdagan lamang ng P300.

Mula 2015 naman hanggang 2016, tumanggap lamang sila ng tig-1,500.

Kung inyong mapapansin, nagdadagdag man ang gobyerno sa chalk allowance, kakarampot at halos hindi naman nakakatulong sa mga binabalikat na gastusin ng teachers. Punung-puno ng trabaho, katiting naman ang suweldo at allowance.

Ilang taon ding pinag-aralan ng Kongreso ang problemang ito. Kaya’t noong 2017, kagyat tayong nagdagdag ng P1,000 sa chalk allowance kaya umakyat ito sa P2,500 ng naturang taon. Muli itong dinagdagan ng P1,000 noong 2018 o kabuuang 3,500 na nanatili hanggang taong 2020.

Noong 2019, sa kauna-unahang pagkakataon ay umupo tayong chairman ng Senate Finance Committee, kung saan tayo ang duminig sa 2020 General Appropriations Act o ang pambansang budget para sa 2020.

At dahil pinangunahan nga natin ang mga pagdinig sa budget ng mga ahensya, naging malinaw kung gaano kahalaga sa ating mga guro ang kanilang chalk allowance.

Dahil dito, pagdating ng 2021, sa suporta na rin ng ating mga kapwa senador, tumaas sa P5,000 ang chalk allowance ng public school teachers hanggang sa mga sinundan nitong taon. Pero sa susunod na taon, 2025, dinoble na ang P5,000 kaya’t matatanggap na ng mga guro ang P10,000 chalk allowance na isinasaad ng bagong batas.

Bilang isa sa mga author ng Kabalikat sa Pagtuturo Act, batid natin na napakalaking tulong sa ating public school teachers na maitaas ang kanilang teaching supplies allowance. Sa pamamagitan nito, maiiwasan nang dumukot pa sila sa sariling bulsa makabili lang ng mga pangangailangan nila sa pagtuturo.

Sa totoo lang, maliit na bagay lamang ang tulong na ito kumpara sa paghihirap at sakripisyo ng ating teachers. Alam natin ito, dahil ang aking ina ay dati ring guro noong kanyang kabataan, habang ang aking yumaong ama na si dating Senate President Ed Angara ay kilala sa kanyang pangunahing adbokasiya – ang pagreporma at pagpapalakas sa edukasyon ng Pilipinas.

At sa loob ng 20 taon ng inyong lingkod bilang public servant, edukasyon din ang pangunahin nating tinutukan. Nariyan ang pagsulong natin na gawing kompulsaryo ang kindergarten para sa murang edad ay mabigyan ng basic education ang mga bata (RA 10157); ang Unified Student Financial Assistance System for Tertiary Education o UniFast, kung saan pinag-isa nito sa isang batas ang pagpapalakas, pagpapalawak, pagpapahusay at pagkakaroon ng one body all government-funded modalities sa lahat ng programang tulong pinansyal sa mga mag-aaral sa kolehiyo; ang Universal Access to Quality Tertiary Education Act o UAQTEA na nagpatupad ng libreng edukasyon sa kolehiyo, sa state colleges and universities (SUCs) sa buong bansa; ang EDCOM 2 o ang Second Congressional Commission on Education na nagsasagawa ng isang komprehensibong pagsusuri at pag-aaral sa takbo ng ating sektor ng edukasyon.

Kahit sa maliit na paraan man lang tulad ng mas pinataas na teaching supplies allowance ay maipakita o maipadama natin sa mga teacher ang ating taos-pusong pasasalamat sa pagsisikap nilang malinang ang karunungan ng ating kabataan.

Pinasasalamatan natin unang-una, sa pagpasa ng batas na ito ang ating Pangulong Marcos, ang mga kapwa natin senador, partikular si Sen. Bong Revilla, chairman ng Senate Committee on Civil Service, Government Reorganization and Professional Regulation na siyang principal author at tumayong sponsor ng naturang bill sa Senado.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

‘NGP Act’, para sa mas mahusay, epektibong procurement system ng gobyerno

ni Sonny Angara @Agarang Solusyon | June 2, 2024

Sa kasalukuyan, bagaman naka-break sa sesyon ang dalawang sangay ng Kongreso (Senado at ng Kamara de Representantes), at magbabalik sa araw ng SONA ng Pangulo, tuluy-tuloy ang ating pag-aaral sa mga panukalang patuloy nating isusulong sa mga darating na araw.

At isang karangalan na bago natapos ang sesyon, isa sa mga inihain nating panukala, kung saan tayo ang pangunahing author, ang naihabol sa pagpasa ng Senado – ang New Government Procurement Act (NGPA).

Sa ngayon, lagda na lamang ng Pangulo at tuluyan na itong mapagtitibay.  

Sa ilalim ng naturang panukala (Senate Bill 2592 o ang NGPA), isusulong ang pagiging bukas ng gobyerno sa mga transaksyon, upang mas mapahusay, mas maging epektibo, accountable at sustainable sa kanilang procurement process.

Ilang buwan din nating isinailalim sa masusi at mabusising pag-aaral ang panukalang ito. Katunayan, dumaan tayo sa napakaraming pakikipag-ugnayan at konsultasyon sa stakeholders na kinabibilangan ng sangay ng Ehekutibo. At dito, kahit isa sa mga layunin natin ay makatipid ang gobyerno, sinisiguro pa rin natin na epektibo ang serbisyo.  

Pero, ano nga ba itong NGPA? Ito ang batas na hahalili o mag-aamyenda sa RA 9184 o ang Government Procurement Act na 21 taon nang umiiral. Nagsilbi itong pundasyon ng gobyerno para mapangalagaan ang public funds at maisalba mula sa anomalya. Ang nakamamangha lang, kahit napaka-istrikto na ng batas na ito, talagang may mga taong hindi takot lumabag sa batas at talagang tuloy pa rin ang katiwalian.  

Ang RA 9184 ay inisponsor ng aking yumaong ama, si dating Senate President Ed Angara noong siya ay senador pa, at talaga namang gumawa ng ingay ang batas na ito noon dahil tinagurian itong “world-class legislation” ng dating World Bank Philippine Country Director na si Joachim von Amsberg.

Sa NGPA, sakop ang lahat ng government procurement and proper market scoping, supply positioning, analysis of available procurement modalities at risk management.

Ipinakilala rin sa NGPA ang mga bagong mode of procurement tulad ng competitive dialogue; unsolicited offer with bid matching; direct acquisition; direct sales o ang tinatawag na pasabuy; direct procurement for science, technology and innovation, at ang isa sa pinakaimportanteng nilalaman nito: ang Most Economically Advantageous Responsive Bid (MEARB).

Ang MEARB ay tugon sa obserbasyon ng maraming ahensya at institusyon ng gobyerno sa mga kwestiyonableng kalidad ng mga binibiling gamit ng pamahalaan. Ito ‘yung nabanggit natin na bagaman sinisiguro nating makatitipid ang gobyerno sa pagbili ng mga kagamitan, dapat ay masiguro ring hindi madaling masira o mahinang klase ang nabili.

Isa rin sa mahahalagang nilalaman ng NGPA ang kautusang pagpapaigsi sa bidding activities. Kung dati, umaabot ng 90 days ang sistema, ngayon, dapat matapos ang proseso sa loob lamang ng 60 araw. Ang 60-day process na ito ay mag-uumpisa sa pagsisimula ng bids hanggang sa contract awarding.

Napakaganda ng panukalang ito dahil isa rin sa mga layunin nito na mabigyan ng solidong suporta ang ating mga lokal na industriya, gayundin ang mga maliliit na negosyante na kadalasan ay ‘di nabibigyan ng pagkakataong makalahok sa mga bidding sa gobyerno dahil sa kawalan ng track record. Ngayon, dahil sisiguruhing makalalahok ang small businesses sa bidding, sigurado rin na makakapag-level up na sila. Suporta rin ang NGPA sa mga industriya, produkto at serbisyong Pinoy.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com

Implementing rules and regulations ng Tatak Pinoy Law, pirmado na!

ni Sonny Angara @Agarang Solusyon | May 25, 2024

Kamakailan, pinangunahan ni Trade and Industry Secretary Alfredo Pascual, kasama ang iba pang kinatawan ng mga ahensya ng gobyerno ang paglagda sa implementing rules and regulations (IRR) ng Tatak Pinoy (Proudly Filipino) Law o ang RA 11981. 

Ito ang batas na ating iniakda at inisponsor sa Senado. Nagpapasalamat naman tayo sa DTI sapagkat nakapaglabas sila ng IRR ilang buwan matapos pagtibayin ni Pangulong Marcos ang batas nitong Pebrero ng kasalukuyang taon.

Ang batas na ito, sa kabuuan ay nahulma sa tulong ng mga eksperto mula sa USAID-RESPOND (Regulatory Reform Support Program for National Development), habang ang guidelines ay nabuo sa pamamagitan ng public consultations at group discussions.

Sa mga susunod na buwan, inaasahan nating magkaroon na ng mga pormal na nominasyon para sa apat na kinatawang magmumula sa pribadong sektor na uupo sa Tatak Pinoy Council (TPC), base sa pag-appoint ng Pangulo; roadshow ng Department of Trade and Industry na magsusulong at magpapaliwanag sa mga stakeholders ng mga mahahalagang punto ng TP Law; at ang paglalabas ng TPC ng listahan ng mga produkto at serbisyong Pinoy na bibigyang prayoridad sa government procurement.

Ayon kay DTI Undersecretary Fita Aldaba, matapos ang IRR signing, binigyang kakayahan ng DTI, NEDA at ng DOF ang TP Council na makapag-isyu ng anumang guidelines, circulars at mga opinyong mahalaga para sa pagpapatupad  ng TP Law, at sa pakikipagpulong sa mga private and public sectors na kabilang sa konseho ng TPC.

Maaari na ring makapagtalaga ng working groups ang TPC tulad ng Human Resources; Infrastructure; Technology and Innovation; Investments and Sound Financial Management.

Sa napakaraming taon na nakalipas, naging masugid ang DTI sa iba’t ibang industrial initiatives and strategies na nagsimula sa Comprehensive National Industrial Strategy o CNIS mula 2012 hanggang 2016, kung saan nakabilang ang Manufacturing Resurgence Program o MRP; ang Inclusive Innovation Industrial Strategy mula 2016 hanggang 2021; at ang STI (Science, Technology and Innovation)-driven Industrial Policy noong 2022.

Sa kabila ng mga pagsisikap na ito ng DTI na mapalakas ang mga inisyatibo para sa industrialisasyon,  hindi kakayaning mag-isa ng ahensya ang mga hakbang na ito dahil hindi naman sila lang ang responsable sa pagpapalago ng ating ekonomiya.

Dapat lang talaga ay makipagtulungan sa kanila ang iba pang ahensya ng gobyerno, liban pa sa DOF, NEDA, Department of Agriculture (DA), ang Department of Information and Communications Technology (DICT), at ang Department of Budget and Management (DBM) kundi maging ang industry champions ng Pilipinas tulad ng trade associations, small and medium enterprises, entrepreneurs at maging ang sektor ng akademya. Ito ang sa tingin natin, ay ang kulang sa pagnanais nating mapalakas ang mga industriya sa bansa.

Inaayunan natin ang pahayag ni DTI Secretary Pascual habang isinasagawa ang signing ceremony na sa pagpapatupad ng batas na ito, kailangan ang “whole-of-nation” approach. Kailangan talaga ang nagkakaisang suporta sa TP Law para maabot natin ang napakagandang pangarap ng batas na ito para sa ating mga industriya.

Sa ngayon, dahil inilabas na ang rules and regulations ng TP Law, makaaasa tayo na marami sa mga layunin ng batas na ito ang magkakaroon ng realisasyon na magiging kapaki-pakinabang sa bansa at sa mamamayan.

---

May katanungan ka ba, reklamo o nais ihingi ng tulong? Sumulat sa  AGARANG SOLUSYON ni Sonny Angara, BULGAR Bldg., 538 Quezon Ave., Quezon City o mag-email sa agarangsolusyon.bulgar@gmail.com