Mga dapat tandaan ‘pag nagkaroon ng eczema ang bata

ni Dr. Shane Ludovice - @Sabi ni Dok | July 31, 2020

Dear Doc. Shane,

Nagkaroon ng mga rashes sa leeg hanggang sa singit ang aking 5 years old na anak. Palagi siyang umiiyak dahil makati raw ito pero pinipigilan ko siyang kamutin dahil baka lalong magsugat at lumala. Hindi ko alam kung dahil ba ito sa sabon, pero pinalitan ko na ito. Ang sabi ng pinsan ko, eczema raw ‘yun. Ano ba ‘yung ezcema at saan nakukuha? – Selma

Sagot

Ang pangunahing sintomas ng eczema ay ang panunuyo at makating balat. Mabilis itong magsugat at mapula ang paligid ng bukul-bukol na rashes.

Ang eczema ay may tatlong uri: atopic, infantile at dermatitis.

• Ang Atopic ay sanhi ng allergies sa pagkain o ibang bagay sa kapaligiran. Ito rin ay namamana. Matindi ang panunuyo ng balat, sobrang kati at mapula, at kapag kinamot ay tuluyan nang bubuka at magsusugat. Sa mga sanggol, karaniwan itong nagsisimula sa nappy area at dahan-dahang kumakalat sa buong katawan. Sa mga toddler o 2 hanggang 3 years old, nakikita ito sa likod ng tuhod (lalo’t ‘pag nagpapawis), sa mga siko, galang-galangan o pulso at sakong.

• Ang Infantile Seborrhoeic Eczema (o kilala sa tawag na cradle cap) naman ay makikitaan ng magaspang at maaligasgas na balat, na hindi gaanong makati. Naaalis ito sa pamamagitan ng paglalagay ng baby oil o olive oil at pagsuklay ng ulot at buhok ng sanggol, pagkatapos ay paghuhugas nito ng may shampoo o sabon.

• Ang Allergic Contact Dermatitis ay sanhi ng pagkairita sa mga lotion, sabong panlligo o panlaba at pagkain.

Tandaan:

• Magbasa palagi ng labels at ingredients bago kainin o gamitin ang isang produkto.

• Iwasan ang paggamit ng sabon o cream, lalo na kung may namamaga o nagsusugat nang rashes.

• Dahil sa sobrang pagkatuyo ng balat, nangangati ito. Kaya’t moisturizer at hydration ang solusyon.

• Uminom palagi ng tubig at kumain ng pagkaing sagana sa fatty acids. Ang moisturizer at tumutulong mapahupa ang pangangati at pamamaga.

• Payo ng mga doktor ang pagpapaligo sa batang may eczema, araw-araw sa maligamgam na tubig.

Hindi ito nakakahawa, ngunit tulad ng nabanggit natin, ito ay genetic. Makikitang hindi lang isa sa mga kapatid o kaanak ang mayroon nito.

Walang gamot na lubusang makakapagpagaling sa eczema, ngunit may mga paraan para maibsan ang pangangati at pagsusugat. Mahalagang kumunsulta agad sa doktor upang mabigyan ng mga topical cream at ointment para maibsan ang pangangati at pamamaga at magamot ang pagsusugat.

Minsan ay nangangailangan ng antibiotic, kung naimpeksiyon ito. May mga anti-histamines na maaaring irekomenda ang doktor para sa pangangati.

Tamang pagkonsumo ng kape para sa mga diabetic at may sakit sa puso, alamin!

ni Dr. Shane Ludovice - @Sabi ni Dok | July 30, 2020

Dear Doc. Shane,

Ako ay may diabetes at may maintenance naman ako. Sabi ng kaibigan ko, masama raw ang 3-in-1 coffee sa mga diabetic. Sa kaso ko ay nakakaapat na tasa ako sa maghapon mula almusal. Ano ang mainam gawin ‘pag ganu’n? – Jun

Sagot

Ang isang tasang kape ay may 2 calories lamang kung black coffee ito. Ibig sabihin, walang asukal at walang creamer. Ang black coffee ay mababa sa calories kaya puwede siyang inumin ng may diabetes.

Ang isyu ay kung ano ang idinaragdag sa kape kaya tumataas ang calories nito.

Halimbawa, ang isang kutsara ng mga sumusunod ay ganito karami ang calories:

Heavy whipping cream: 52 calories

Table sugar: 49 calories

Half and half (gatas): 20 calories

Fat-free milk: 5 calories

Ang coffee creamer naman ay depende sa brand, 40 hanggang 90 calories bawat dalawang kutsara. Dumadagdag ang calories, depende kung ano ang dinadagdag sa kape at kung ilang tasang kape ang iniinom bawat araw.

Ang bawat tao depende sa timbang, taas at aktibidad ay may kaukulang bilang ng calories na kailangan bawat araw. Kung sobra ng 500 calories ang kailangan ng katawan, puwedeng madagdagan ang timbang ng 2 pounds bawat linggo. Alam nating hindi nakakabuti ang pagdagdag ng timbang sa taong may diabetes.

Paano naman kung ang 3-in-1 coffee ay sugar free? Sa mga nakita nating 3-in-1 coffee sa supermarket, ang calories ng isang tasa ay 70-90 calories. Tandaan na ang kalahating tasa ng kanin ay 100 calories para mapagkumpara.

Puwedeng uminom ng kape kung black coffee ito dahil mababa ang calories. Ngunit ilang tasa? Puwedeng higit sa isang tasa kung walang problema sa puso. Tandaan na ang kape ay may caffeine at dahil dito, puwedeng magkaroon ng palpitations kung labis. Para sa mga may problema sa puso, magpaalam muna sa inyong doktor. Mas maigi siguro kung decaffeinated coffee na lamang ang iinumin.

Kung 3-in-1 coffee naman ang nais inumin sa umaga, kung isang beses lang naman ay okay na. Kung higit sa isang tasa, puwedeng 3-in-1 ang isang tasa at ang mga sumunod ay black coffee na lang.

Mga pagkaing dapat iwasan upang hindi tumaas ang uric acid

ni Dr. Shane Ludovice - @Sabi ni Dok | July 28, 2020

Dear Doc. Shane,

Palaging namamaga ang hinlalaki ko sa paa gawa ng aking uric acid. Ano ba ang mga pagkain na dapat kong iwasan? – Anselmo

Sagot

Ang madalas at sobrang pagkonsumo ng mga pagkain at inumin na mataas sa uric acid ay hindi makakabuti sa kalusugan ng tao. Kaya mainam na iwasan ang pagkain ng mga laman loob ng hayop na nagtataglay ng pinakamataas na level ng uric acid.

May ilang seafood na mataas sa uric acid at dapat iwasan ng mga taong nakararanas na ng side-effects nito tulad ng mga dilis, tuyo at sardinas na nasa tomato sauce, gayundin ang lobster, scallops at hipon.

Ang mga gulay naman ay may mga buto na tinatawag ding lentils o legumes ay kabilang sa mga nagdudulot ng uric acid kung madalas ang pagkonsumo ng mga ito. At kabilang sa hanay na ito ang mga nuts at beans.

Kaya mainam na ipalit sa regular diet ang mga nagtataglay ng mataas na level ng magnesium at nagtataglay ng mas mababang level ng calcium upang mapababa ang uric acid build up sa dugo ng pasyente. Ang ilang halimbawa ng pagkaing mayaman sa magnesium ay ang mais, patatas at avocado.

Kabilang ang mga pagkaing may sangkap na yeast sa dapat iwasan ng mga taong may mataas na uric acid at ilang halimbawa nito ay ang mga tinapay na may pampa-alsa, inuming dumaan sa fermentation tulad ng beer, wine at iba pang alcoholic beverages.

Maging ang mga kape na galing sa coffee beans ay pinagmumulan din ng uric acid gayundin ang oatmeal, taho at tofu na pawang galing sa mga beans.

Ang normal values ng uric acid sa dugo para sa mga babae ay mula 2.4 hanggang 6.0 miligrams per deciliter at para sa mga lalaki ay mula 3.4 hanggang 7.0 milligrams per deciliter.

Sa panahong lumagpas na sa acceptable levels ang uric acid sa dugo ay maari na itong magdulot ng problemang pangkalusugan, tulad ng gout, metabolic acidosis o ang pagbaba ng alkalinity sa dugo, lead poisoning, leukemia, toxemia o impeksiyon sa dugo at renal disease tulad ng kidney stones at kidney cysts na kapag hindi naagapan ay maaring mauwi sa kidney failure.

Karaniwan ng natutunaw ang uric acid sa dugo, dumadaloy sa kidneys at inilalabas ng katawan sa pag-ihi. Subalit kapag dumami ang accumulation ng uric acid at hindi nailabas ng katawan ay nagreresulta ito sa kondisyon na tinatawag na hyperuricemia.

Maipapayo nating ang magpatingin sa doktor at magpa-test para sa uric acid.