Tips para maiwasan ang paghihilik

ni Dr. Shane Ludovice - @Sabi ni Dok | December 29, 2020

Dear Doc. Shane,

Halos isang dekada na kaming kasal ng aking mister at problema ko talaga ang kanyang paghilik na panira sa aking tulog. Siya ay 47 years old pa lamang, may katabaan at naninigarilyo at umiinom din ng alak pero minsan o kapag may okasyon lang. Ano ba ang dapat kong gawin para mawala o mabawasan man lang ang paghihilik nito?— Beth

Sagot

Talagang marami ang namumroblema kapag naghihilik ang katabi sa pagtulog.

Maaaring makatulong ang mga sumusunod upang mabawasan ang paghihilik:

• Matulog nang nakatagilid

• Iwasan ang paggamit ng makapal na unan dahil nababaluktot nito ang leeg kaya nahaharangan ang daanan ng hangin na nagiging dahilan nang paghihilik.

• Iwasan ang uminom ng alcohol kapag matutulog na. Pinare-relax nito ang muscles ng lalamunan kaya lumalakas ang paghihilik.

• Magbawas ng timbang dahil ang ekstrang bigat, lalo na sa bahagi ng leeg ay nagbibigay ng pressure sa lalamunan at pinakikitid ang daanan ng hangin.

Babala sa mga sumasakit ang tuhod!

ni Dr. Shane Ludovice - @Sabi ni Dok | December 28, 2020

Dear Doc. Shane,

Madalas sumasakit ang aking tuhod lalo na sa pag-akyat at pagbaba ng hagdanan, kaya pinaiinom ako ng anak ko ng glucosamine. Bata pa naman ako para makaranas ng ganito dahil 40 years old lang ako. Ano ba ang sanhi nito at ano ang puwedeng inumin bukod sa supplement? – Mocha

Sagot

Ang rayuma ay puwedeng lumabas kahit na anong edad, subalit mas madalas magsimula ito sa edad 20 hanggang 40 subalit, mas common ito sa mga babae kaysa sa mga lalaki. Ang inaatake ng rayuma ay ‘yung mga joints ( hugpungan), pati na rin ang nakapalibot na kalamnan, ugat at litid.

Ang tinatawag na Osteoarthritis (OA) ang siyang pinaka-common na arthritis at madalas na maapektuhan ay mga may edad na pasyente.

Ang Rheumatoid Arthritis naman ay mas common sa kababaihang edad 40 hanggang 60 kaysa sa kalalakihan.

Hindi tiyak ang sanhi ng rayuma, subalit sinasabing ito ay dala ng genetic defect na tumitira sa ating autoimmune system. Dahil ang rayuma ay kadalasang lumalabas matapos ang trauma, stress, menopause, operasyon at panganganak, nag-iisip tuloy ang mga mananaliksik na baka ito ay may kaugnayan sa endocrine at metabolic factors.

Kapag iginagalaw ang mga joints, sumasakit ito kaya mas nakararamdam ka ng kirot lalo na sa pag-akyat ng hagdan o paggalaw sa parteng may rayuma. Sa katagalan ang rayuma ay nagdudulot ng deformity sa bahaging apektado.

Ang gamot na ibinibigay sa may rayuma (ibuprofen, naproxen na, gold salts, chloroquine at tenoxicam) ay pawang pampakalma lamang. Ang ginagamot lamang natin ay ang sintomas ng rayuma at hindi ang sanhi nito.

Ang isang physical o occupational therapist ay makatutulong sa pasyenteng may arthritis para mapabuti nito ang kanyang mga nararamdaman, maaari ring magbigay sila ng tamang diet lalo na kung kayo ay overweight o ino-over stress ninyo ang inyong joints at tutulungan din kayong mag-decide kung ano ang uri o tamang sapatos na bibilhin lalo na kung apektado ang mga parteng iyon.

Makatutulong din para sa kirot ang paggamit ng icepacks o heating pads para ma-relax ang muscle spasm sa palibot ng apektadong joints.

Ayon sa ilang experts, mainam ang well balanced diet para sa isang pasyenteng may arthritis lalo na kung overweight ito, bawasan ang pagkain ng red meat, cream at cheese at mga matataba at matatamis na pagkain. Mainam ang Omega 3 fatty acids sa mga oily fish tulad ng sardines, herring, trout at salmon. Dagdagan din ang pagkain ng mga gulay at prutas.

Sanhi ng mabahong vaginal discharge

ni Dr. Shane Ludovice - @Sabi ni Dok | December 26, 2020

Dear Doc. Shane,

Ako ay 43 years old, may asawa at anak. Normal lang ba sa ganitong edad ang may vaginal discharge na may amoy? Kung hindi, saan ito nakukuha at ano ang lunas dito? –

Vicky

Sagot

Normal na bahagi ng reproductive system ang pagkakaroon ng vaginal discharge. Ito ang natural na paraan ng katawan upang mailabas ang mga bakterya mula sa loob ng cervix. Tumutulong ito upang mapanatiling malusog ang reproductive organ at maiwasan ang impeksiyon. May mga pagkakataong ang discharge ay nagkakaroon ng hindi kaaya-ayang amoy dahil sa mga pagbabago o hormonal changes.

Iba’ t iba ang dami ng discharge sa bawat babae. May kinalaman din ang dami nito sa kalagayan o pagbabago na nangyayari sa loob ng katawan. Ang paggamit ng birth control o contraceptive pill at pag-inom ng antibiotic ay maaaring magpaiba ng dami, kapal at maging ang amoy ng discharge. Ang pagnipis o pagkatuyo ng paligid ng ari ng babae bilang tanda ng menopause o kilala sa katawagang vaginal atrophy ay isa ring dahilan nito.

Ang mga mabangong sabon at lotion na inaakala nating magbibigay ng kasiguruhan ng pananatili ng bango ay maaari rin maging dahilan ng mabahong amoy sa paglipas ng oras. Mataas din ang alcohol content ng mga ganitong uri ng sabon kaya nakapagdudulot ito ng panunuyo at pangangati sa balat na ilan din sa mga sanhi ng mabahong discharge. Ito ang dahilan kaya ipinapayo ng mga espesyalista ang paggamit ng feminine wash o mga sabon na may sapat na antas ng PH na kailangan ng bahaging ito ng katawan.

May mga pagkakataong ang pagkakaroon ng mabahong discharge ay sanhi ng hindi magandang kalagayan ng kalusugan ng babae. Ilan dito ay ang vaginitis o ang pagkakaroon ng iritasyon o pangangati sa paligid ng ari, impeksiyon pagkatapos ng operasyon o kaya ay pelvic inflammatory disease. May mga pagkakataon naman na ang pagkakaroon ng mabahong discharge ay sanhi ng STD (Sexually Transmitted Disease). Sa ganitong pagkakataon, mahalagang alamin at hanapin hindi lamang ang dahilan kundi lalo na ang gamot sa mabahong ari.