Home remedy sa masakit at namamagang gilagid

ni Dr. Shane Ludovice - @Sabi ni Dok | January 2, 2021

Dear Doc. Shane,

Namamaga ang gilagid ko pati na rin ang pisngi sa bandang kaliwa marahil sa ngipin ko na sumasakit. Ano ang dapat kong gawin o inumin? – Gina

Sagot

Ang namamagang gilagid o stomatitis ay ang pamamaga ng mga malalambot na tisyu sa loob ng ating bibig. Ang magandang panlunas ay yelo na ibinalot sa tela, at ilagay ang yelo sa namamagang pisngi upang mabawasan ang pamamaga nito at mainam din ang pagmumog ng maligamgam na tubig na may asin. Maaari ring magmumog ng anumang mouthwash na kilala sa pagpatay ng mga mikrobyong namuo sa loob ng bibig.

Kung kumikirot pa rin, maaring uminom ng ibuprofen na nakakatulong maibsan ang pananakit ng ngipin.

Makatutulong ang mga sumusunod:

• Magmumog ng tubig na may asin, tatlong beses maghapon bago kumain

• Masahihin ng malilinis na daliri ang gilagid pagkatapos magmumog

• Magsepilyo ng ngipin pagkatapos kumain. Gumamit ng sepilyo na may malambot bristles

• Uminom ng apat na basong katas ng prutas sa buong maghapon

• Patingnan sa dentista ang namamagang gilagid

Malabong paningin, eye strain at sakit sa ulo, sintomas ng astigmatism

ni Dr. Shane Ludovice - @Sabi ni Dok | December 31, 2020

Dear Doc. Shane,

Maaari bang pakitalakay ang tungkol sa astigmatism? Ano ang sanhi nito at paano ito gagamutin? – Jas

Sagot

Ang astigmatism ay karamdaman sa mga mata na maaaring maging dahilan ng paglabo ng paningin. Kadalasan ay hindi ito seryoso at madalas na nagagamot. Ito ay nangyayari sa cornea o sa lente ng mga mata. Ang astigmatism ay maaaring kombinasyon ng nearsightedness o farsightedness. Madalas ang astigmatism ay hindi nangangailangan ng pagsasaayos ngunit, may mga kaso na nangangailangan ng karapat-dapat na aksiyon tulad ng pagsusuot ng salamin sa mata, contact lens o operasyon.

Ang mga sumusunod ay mga uri ng astigmatism:

• Myopic astigmatism. Isa o parehong principal meridians ng mga mata ay nearsighted. Kapag dalawang meridians ay nearsighted, ang mga ito ay myopic sa magkaibang antas.

• Hyperopic astigmatism. Isa o parehong principal meridians ng mga mata ay farsighted. Kapag dalawang meridians ay farsighted, ang mga ito ay hyperopic sa magkaibang antas.

• Mixed astigmatism. Isang principal meridian ay nearsighted at ang kabila ay farsighted.

Ang astigmatism ay maaari ring hatiin sa regular at iregular. Sa regular na astigmatism, ang mga principal meridians ay 90 degrees ang agwat (perpendicular sa isa’t isa). Sa iregular na astigmatism, ang principal meridian ay hindi perpendicular. Karaniwan sa mga astigmatism ay regular corneal astigmatism.

Ang iregular astigmatism ay maaaring sanhi ng mga sumusunod:

• Pinsala sa mata na nagdulot ng peklat sa cornea.

• Mula sa operasyon sa mata.

• Dahil sa keratoconus – isang sakit na nagdudulot ng unti-unting pagnipis ng cornea.

Ang mga pasyente na mayroong astigmatism ay karaniwang nakararanas ng mga sumusunod na senyales at sintomas:

• Malabo o baluktot na pagtingin

• Eye strain

• Sakit ng ulo

Kapag nakaranas ng nasabing mga sintomas, makabubuti para sa pasyente na magpa-examine sa mata para malaman kung mayroong problema sa mga mata.

Ang astigmatism ay maaaring mula sa pagiging sanggol pa lamang ngunit, maaari rin itong umusbong pagkatapos magkaroon ng pinsala sa mata, sakit o operasyon sa mga mata. Ang astigmatism ay nagiging malala dahil sa kakulangan ng ilaw kapag nagbabasa, pag-upo nang malapit sa telebisyon o kapag sulimpat ang mga mata.

Ang mga sumusunod ay maaaring magpataas sa panganib ng pagkakaroon ng astigmatism:

• Pagmana sa kondisyon.

• Operasyon sa mata na kasaysayan ng pagpepeklat o pagnipis ng cornea.

• Kasaysayan ng sobrang nearsightedness o farsightedness.

Pag-iwas:

Ang karaniwang uri ng astigmatism ay hindi maaaring maiwasan ngunit, ang insidente ng astigmatism dahil sa trauma ay maaaring maiwasan sa pamamagitan ng pagtutok ng atensiyon sa pag-iingat sa mga mata.

Dapat gawin kung nakaligtaan ang pag-inom ng contraceptive pills

ni Dr. Shane Ludovice - @Sabi ni Dok | December 30, 2020

Dear Doc. Shane,

Kapag ba nakaligtaan ang pag-take ng contraceptive pill ng isang gabi at may nangyari sa amin ng BF ko ay may posibilidad na mabuntis ako? – Mish

Sagot

Posible, pero maliit na maliit ang posibilidad. Oo, ang pagiging epektibo ng pills bilang paraan ng family planning ay nakadepende sa pagiging regular ng pag-inom nito, subalit kung isa lamang ang lumampas, inumin na lang ang pills na hindi nainom at ituloy lamang ang pag-inom ng pills kahit magdoble ito sa unang araw, ngunit kung higit sa isa ang naliban na pills, mas tumataas ang posibilidad na pumalpak ang pagsupil ng pills sa pagkabuntis ng babae.

Kung hindi pa handa sa pagbubuntis at makasigurado sa ligtas na pakikipagtalik, gumamit ng karagdagang contraceptive tulad ng condom sa unang pitong araw.

Kung hindi sigurado, magpatingin sa iyong OB-Gyne o iba pang doktor upang magabayan kung ano’ng mga hakbang na puwedeng gawin.