Babala sa madalas ma-ihi!

ni Dr. Shane Ludovice - @Sabi ni Dok | April 28, 2021

Dear Doc. Shane,

Maaari ba ninyong talakayin ang tungkol sa cystitis at sintomas nito? Ako ay limang buwang buntis ngayon at sabi ng doktor ay hindi raw ito UTI, kundi cystitis. Kailangan ko raw uminom ng maraming tubig at antibiotic dahil dito. – Menggay

Sagot

Ang cystitis o bladder infection ay sanhi ng bakterya. Pinaka-common na sintomas nito ay ang madalas na pag-ihi, nakararanas ng sakit o mainit na pakiramdam tuwing iihi.

Mas common ang cystitis sa kababaihan lalo na sa panahon na sila ay buntis. Mas prone ang babae sa cystitis dahil sa mga sumusunod:

• Malapit ang urethra patungong vagina sa anus

• Maaaring pagmulan nito ang sexual intercourse

• Ang pregnancy mismo ay nakai-interfere sa pag-e-empty ng bladder

• Ang pagkaunti ng estrogen sa menopausal period ay nakapagpapanipis ng vaginal at vulvar tissues sa paligid ng urethra (atrophic vaginitis and atrophic urethritis) na maaaring mag-expose sa babae sa paulit-ulit na cystitis

Narito ang ilang sintomas ng cystitis:

• Pakiramdam na palaging naiihi. Ang madalas na pag-ihi ay posibleng maging sanhi ng hindi makontrol na pag-ihi (uncontrollable loss of urine) lalo na sa matatanda

• Lagnat

• Nakararamdam ng sakit sa itaas na bahagi ng pubic bone at minsan ay masakit din sa lower back

• Madalas na pag-ihi sa gabi (nocturia)

• Cloudy ang ihi at maaaring mayroong dugo

Maaaring mawala ang cystitis kahit walang treatment. Minsan, ang cystitis ay walang sintomas, partikular na sa matatanda at nakikita lamang sa urinalysis o pagsusuri sa ihi.

Ang cystitis ay karaniwang nagagamot sa pamamagitan ng antibiotics subalit, mahalagang magpasuri muna bago uminom ng gamot. Kung may sumasakit na parte ng urinary tract, binibigyan din ng pain reliever ang pasyente. Ang pag-inom ng tubig ay nakatutulong ding ma-prevent ang cystitis. Sa pamamagitan nito, ang urine ay nakahuhugas sa bakterya palabas ng bladder.

Worried sa dahilan ng madalas na pag-‘ehem’

ni Dr. Shane Ludovice - @Sabi ni Dok | April 25, 2021

Dear Doc. Shane,

Nakapagtataka kung bakit kahit wala naman akong sipon o ubo ay panay ang aking “ehem”? Nakaiirita lang at nakakahiya lalo na kung tahimik sa kuwarto at bigla marinig nila na nag-e-“ehem” ako. Ang iba ay napalilingon agad at nagtatakip ng kanilang bibig na para bang mahahawaan sila. Ano ba ang sanhi nito, is this an allergy? – Albert

Sagot

Marami ang maaaring nagtataka kung bakit kahit wala namang sipon ay parang may “ehem” sa ating lalamunan. Madalas, kung kailan tayo magsasalita ay saka pa tayo parang nahihirinan sa parang sipon na nakabara sa lalamunan. Kakailanganin pang i-clear ang lalamunan sa pamamagitan ng pag-“ehem”-“ehem”.

Ito ay sapagkat sadya namang nagpupundar ng mucus ang ating katawan. Sinasabing maaaring may isang litro ng mucus ang ipinupundar ng ilong at sinuses (air spaces sa mukha) sa araw-araw. Ang mucus ay napupunta sa lalamunan nang hindi namamalayan sapagkat maninipis ito.

Ang mucus sa lalamunan ay para proteksiyunan ang ating baga sa pamamagitan ng pagpapainit sa hangin na ating nilalanghap. Hinuhuli rin nito ang mga alikabok at iba pang bagay na ating nalalanghap. At dahil wala tayong malay sa nagaganap na prosesong ito, nalulunok lang natin ang mucus, kasama ang iba pang bagay na humalo rito. Ngunit, kahit malunok pa ito ay wala namang kaso. Wala itong idudulot na sakit.

Tips kung paano magagamot ang pamamanas

ni Dr. Shane Ludovice - @Sabi ni Dok | April 24, 2021

Dear Doc. Shane,

Ilang araw nang minamanas ang mga paa ng aking misis. May diabetes din siya subalit, may maintenance namang iniinom. Masama ba ito, may sakit kaya sa bato ang aking misis? Ano ba ang sanhi ng pamamanas ng mga paa ng tao? – Renzo

Sagot

Ang pamamanas ng mga paa ay maaaring sanhi ng maraming uri ng karamdaman; ang iba ay malala, ang iba naman ay hindi. Gayunman, kapag minanas ang mukha o ibang bahagi ng katawan, palatandaan ito ng malubhang karamdaman.

Kung minsan, ang mga paa ng babae ay minamanas sa huling tatlong buwan ng pagbubuntis. Kadalasang, hindi ito delikado at dahil lamang ito sa bigat ng dinadalang sanggol na dumadagan sa mga ugat na nanggagaling sa mga binti at pumipigil sa tuluyang na pagdaloy ng dugo. Gayunman, kapag minamanas din ang mukha at mga kamay, nahihilo o may problema sa paningin o kaunti ang ihi, ang babae ay maaaring may toxemia o pagkalason sa pagbubuntis. Magpatingin agad sa doktor. Kadalasan, namamanas ang mga paa ng matatandang tumatayo o umuupo nang matagal sapagkat napipigil ang mahusay na pagdaloy ng dugo. Gayunman, nagiging resulta rin ito ng sakit sa bato o puso.

Ang pamamanas ng mga paa sa mga bata ay maaaring sanhi ng anemya o malnutrisyon. Sa mga grabeng kaso, minamanas din pati ang mga kamay at mukha.

Para mabawasan ang pamamanas, gamutin ang pinagmumulan ng problemang ito. Iwasan o gumamit lamang ng kaunting asin o patis sa pagkain. Makatutulong din ang pag-inom ng tsaa.

Gawin din ang mga sumusunod:

• Huwag umupo nang nakababa ang mga paa

• Kapag umuupo, itaas ang mga paa para mabawasan ang pamamanas nito. Paulit-ulit itong gawin sa loob ng isang araw

• Matulog din nang nakataas ang mga paa