Magnesium, panlaban sa diabetes, stroke at osteoporosis

ni Dr. & Atty. Erwin P. Erfe, M.D. - @Sabi ni Doc | November 11, 2021

Dear Doc Erwin,

Ako ay 32 years old at umiinom daily ng Magnesium supplements for two years na. Ito ay inirekomenda ng nutritionist para sa aking hypertension at noon ay tumataas na blood sugar. Pinag-iisipan ko kung ipagpapatuloy ko pa ang pag-inom ng Magnesium supplement. Makabubuti ba ito sa aking kalusugan? – John Joseph

Sagot

Maraming salamat sa inyong pagsulat sa Sabi ni Doc.

Ang Magnesium ay mineral na kinakailangan ng ating katawan upang ito ay maging malusog.

Ito ay itinuturing na essential na macro-mineral at ayon sa National Institutes of Health ng Amerika ito ay importante bilang cofactor sa mahigit na 300 enzyme systems na nagre-regulate ng mga biochemical reactions sa ating katawan upang makagawa ito ng protein, gumana ang ating mga muscles at nerves, maging normal ang pagtibok ng ating puso, ma-control ang ating blood glucose at ma-regulate ang ating blood pressure. Ito rin ay mahalaga upang makagawa ng energy ang katawan mula sa mga nutrients na ating kinain. Kinakailangan din ito sa maayos na pag-develop ng mga buto at paggawa ng genetic material na DNA at ganun din ng RNA.

Ayon sa mga pag-aaral ay mayroon 25-grams na Magnesium ang katawan at more than 50% nito ay nasa ating mga buto, at ang iba naman ay nasa ating soft tissues, tulad ng muscles, nerves at organs.

Sa iyong edad na 32 ay kinakailangan mo ng 420 milligrams kada araw. Sa kababaihan na tulad ng iyong edad ay kailangan nila ng 320 milligrams. Sa mga nagbubuntis at nagbi-breastfeeding ay kailangan nila mula 320 hanggang 400 milligrams ng Magnesium araw-araw. Ito ang mga Recommended Dietary Allowances (RDA) para sa Magnesium, ayon sa Office of Dietary Supplements ng National Institutes of Health ng Amerika.

Ang Magnesium ay makukuha natin mula sa mga pagkain, tulad ng gulay at karne, at makukuha rin natin sa mga inumin, tulad ng tap, mineral at bottled water. Ang madahong gulay, spinach, potato, pumpkin seeds, chia seeds, mani, almonds, kasoy, raisins, white at brown rice ay mayaman sa Magnesium. Ang chicken at beef ay mayroon din Magnesium.

Karaniwan na naa-absorb ng katawan natin ang 30 hanggang 40% ng Magnesium sa ating pagkain at inumin. Kung hindi sapat ang kinakain mo na pagkain na mayaman sa Magnesium ay kinakailangan mo uminom ng Magnesium supplement upang makamit mo ang minimum na RDA for Magnesium na 420 milligrams per day. Marahil ay ito ang dahilan kung bakit inirekomenda ng nutritionist na ikaw ay uminom ng Magnesium supplement.

Inirerekomenda rin na ang indibidwal na may chronic diarrhea, fat mal-absorption, Type 2 diabetes, alcoholic at senior citizens ay uminom ng Magnesium supplements dahil nagkukulang ang kanilang Magnesium intake o kaya ay kakaunti ang na-absorb ng kanilang katawan na Magnesium mula sa kanilang kinakain.

Ang pagkain ng mga pagkaing mayaman sa Magnesium na nabanggit natin, ayon sa mga meta analysis at prospective studies ng mga scientists ay nakababawas ng pagkakaroon ng hypertension, sakit sa puso, ischemic at hemorrhagic stroke.

Makatutulong din ang sapat na Magnesium sa pag iwas sa Type 2 diabetes at sa osteoporosis.

Napag-alaman sa mga pag-aaral na ang kakulangan sa Magnesium (Magnesium deficiency) ay maaaring magdulot ng migraine headaches. Sa pag-aaral na inilathala sa scientific journal na Current Treatment Options in Neurology noong January 2008, maaaring maiwasan ang migraine kung iinom ng Magnesium supplement 300 milligrams dalawang beses sa isang araw. Maaaring inumin ang Magnesium supplement ng nag-iisa o kasabay ng iba pang gamot sa migraine.

Tandaan, huwag uminom ng Magnesium supplement na sobra sa Recommended Dietary Allowances (RDA) para sa Magnesium ayon sa Office of Dietary Supplements ng National Institutes of Health. Sa iyong edad ito ay 420 milligrams kada araw. Ang sobrang pag-inom ng Magnesium supplements ay maaaring magdulot ng pagtatae, pagsusuka at pagsakit ng tiyan. Sa pangkalahatan, ang pagkain ng mga pagkain na mayaman sa Magnesium ay hindi magdudulot ng health risk dahil sa ang sobrang Magnesium mula sa pagkain ay ini-eliminate ng ating kidneys.

Tandaan, maaaring magkaroon ng drug interaction ang Magnesium supplements sa ibang gamot, tulad ng mga gamot sa osteoporosis (oral biphosphonates), antibiotics (tetracycline, doxycycline, ciprofloxacin, at levofloxacin), diuretics (furosemide, bumetanide at hydrochlorothiazide) at mga gamot sa ulcer (esomeprazole at lansoprazole). Kinakailangan na inumin ang mga gamot na nabanggit ng hindi baba sa 2-oras bago uminom ng Magnesium supplement o 4 hanggang 6-oras pagkatapos na uminom ng Magnesium supplement.

Makabubuti kung ikaw ay kukonsulta sa iyong doktor upang malaman mo kung nararapat na patuloy na uminom ng Magnesium supplements.

Sana ay nasagot ng artikulong ito ang inyong mga katanungan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Kahalagahan ng pag-inom ng vitamins

ni Dr. & Atty. Erwin P. Erfe, M.D. - @Sabi ni Doc | November 9, 2021

Dear Doc Erwin,

Ako ay 47 years old, dating varsity athlete noong ako ay nasa kolehiyo pa at ngayon ay health buff. Mahilig ako sa long distance run, biking at mountain hiking.

Dahil sa aking physical activities ay minabuti ko na uminom ng mga health supplements, tulad ng vitamins at minerals. Paano at kailan ko dapat inumin ang mga vitamins at minerals? - Dante A.

Sagot

Maraming salamat sa inyong pagliham sa Sabi ni Doc.

Ang mga vitamins at minerals ay kailangan ng ating katawan upang ito ay maging malusog at malakas. Kung ikaw ay kumakain ng balanced diet, kasama ang iba’t ibang klase ng gulay, karne, isda at nuts ay maaring sapat na ang mga kinakain mo upang makuha ang mga kinakailangang vitamins at minerals. Ngunit kung ikaw ay vegan, vegetarian o kaya ay may special diet katulad ng keto diet ay maaring kulang ang mga vitamins at minerals na nakukuha mo sa mga pagkain. Makatutulong ang mga health supplements, tulad ng multivitamins at minerals upang mapunuan ang sustansiya na hindi maibigay ng iyong kinakain.

Dahil sa ikaw ay maraming physical activities, kinakailangan mo rin ng dagdag-pagkain upang makuha ang sapat na calories at mabigyan ng lakas ang iyong katawan.

Sa pag inom ng mga health supplements kinakailangan siguruhin natin na ito ay ma-absorb ng ating katawan at maiwasan ang mga posibleng side-effects, tulad ng pagsakit ng tiyan o pagtatae matapos uminom ng vitamins at minerals.

Ang mga vitamin supplements ay mahahati natin sa dalawang klase – ang water soluble vitamins at ang pangalawa ay ang mga fat soluble vitamins. Ang water soluble vitamins ay ang mga Vitamins B at C. Dahil sila ay natutunaw sa tubig, kinakailangan na uminom ng sapat na tubig kasama ang Vitamins B o C upang ito ay matunaw at ma-absorb ng ating katawan. Ang mga vitamins na ito ay maaaring inumin ng hindi pa kumakain.

Ang Vitamin B-12, isang uri ng Vitamin B ay mas makabubuting inumin sa umaga.

Maaaring makaapekto sa pagtulog kung ito ay iinumin sa gabi. Dahil humihina ang absorption ng ating katawan ng Vitamin B-12 sa ating pagtanda, mas makakabuti na magkahiwalay na inumin ang Vitamin B-12 at Multivitamins.

Ang fat soluble vitamins katulad ng Vitamin A, D, E at K ay dapat inumin pagkatapos kumain.

Para masiguradong mas marami ang ma-absorb ay kinakailangan ng fat o taba sa kinain.

Makatutulong ang yogurt, whole fat milk, or virgin coconut oil para madaling ma-absorb ang mga fat soluble vitamins.

Kung ang water soluble vitamins ( B at C) at fat soluble vitamins (A, D, E, at K) ay magkasama sa isang tablet o capsule tulad ng mga multivitamin preparation ay mas makabubuting inumin ito pagkatapos kumain ng almusal, tanghalian o hapunan. Ang fat o taba sa kinain na pagkain ang makatutulong upang ma-absord ang mga fat soluble vitamins. Siguraduhing uminom ng sapat na dami ng tubig upang matunaw at madaling ma-absorb ang mga water soluble vitamins.

Iwasan uminom ng multivitamins at mga fat soluble vitamins (A, D, E at K) kung walang laman ang tyan sa kadahilanan na maaaring hindi matunaw at hindi ma-absorb ang mga nabanggit na fat soluble vitamins. Dahil dito ay maaaring makaramdam ng pagsakit ng tiyan o pagtatae.

Ang isang mineral na kadalasan iniinom ng mga nakatatanda ay ang Calcium supplement upang maiwasan ang sakit na osteporosis. May dalawang klaseng Calcium supplement ang maaaring inumin – ang Calcium carbonate at ang Calcium citrate. Ayon sa Cleveland Clinic, isang sikat na medical center sa bansang Amerika, mas makabubuting inumin ang Calcium carbonate matapos kumain, at ang Calcium citrate naman ay maaaring inumin ano mang oras, kahit hindi pa kumakain.

Mas makabubuti rin na inumin ang Calcium supplement ng ibang oras at hindi kasabay ang multivitamin at mineral tablet dahil maaring makabawas ang Calcium ng absorption ng ibang minerals katulad zinc magnesium, iron, at copper.

Atin ding tandaan na ang Calcium at Magnesium ay maaaring makabawas ng absorption ng mga gamot. Mas makabubuti na huwag isabay ang mga ito sa pag-inom ng antibiotics, thyroid hormones at sa mga gamot na statins.

Ang prenatal vitamins o mga bitamina para sa nagbubuntis ay mas makabubuting inumin pagkaapos kumain at may sapat na dami ng tubig upang masiguro na sila ay matutunaw at ma-absorb ng katawan. Ang Folic acid, isang bitamina na ibinibigay sa mga nagbubuntis ay maaaring inumin kahit walang laman ang tiyan kasama ang pag-inom ng sapat na tubig.

Ayon sa ilang mga siyentipiko, mas makabubuting mag-umpisang uminom ng prenatal vitamins at Folic acid tatlong buwan bago magbuntis upang masigurong may sapat na bitamina ang katawan ng ina at ng bata sa panahon ng pagbubuntis. Ang Folic acid supplement ay makatutulong upang maiwasan ang neural tube defects sa mga baby.

Sana ay nasagot ng artikulo na ito ang inyong mga katanungan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Kaalaman tungkol sa Alzheimer’s Disease at Dementia

ni Dr. & Atty. Erwin P. Erfe, M.D. - @Sabi ni Doc | November 6, 2021

Dear Doc Erwin,

Kamakailan, ang aking apo ay nagbigay ng suhestiyon na ako ay uminom araw-araw ng MCT Oil. Ito raw ay makatutulong na makaiwas sa dementia. Ginagamit ng aking apo ang MCT Oil sa kanyang keto diet. Dahil ako ay mahigit 70-anyos na ay iniisip ko na sundin ang suhestiyon ng aking apo. Makatutulong nga ba ang MCT Oil sa akin upang makaiwas sa dementia? Mabuti ba ito sa kalusugan ng may edad na, na katulad ko? – Agripina C.

Sagot

Maraming salamat sa inyong pagliham sa Sabi ni Doc.

Maganda ang inyong katanungan dahil sa inyong edad ay may mga ilan na nagkakaroon ng dementia at ang kadalasang dahilan nito ay ang Alzheimer’s Disease. Ayon sa Mayo Clinic, mayroong 50 milyon katao sa buong mundo ang may dementia at 60% to 70% sa kanila ay may Alzheimer’s Disease.

Ang maagang sintomas ng dementia dahil sa Alzheimer’s Disease ay pagkakalimutin at nahihirapan mag-concentrate at mag-isip. Ang dating mga routine activities ay nagiging mahirap gawin. Nagkakaroon din ng behavioral changes, tulad ng depresyon, mapag-isa at hindi mapagkatulog.

Sa pag-aaral na inilathala noong April 30, 2020 sa International Journal of Molecular Sciences, isang dahilan ng pagkakaroon ng Alzheimer’s Disease ng mga nakakatanda sa atin ay ang tinatawag na “diabetes of the brain” o “Type 3 diabetes” o T3D kung saan nagkakaroon ng insulin resistance ang ating utak, kaya’t hindi nito nagagamit ang glucose bilang fuel. Dahil dito ay nagkakaroon ng inflammation at oxidative stress ang ating mga brain cells na nagiging sanhi ng pagkamatay nito at pagkakaroon ng dementia.

Ayon sa pag-aaral na nabanggit, ang ilang mga risk factors sa pagkakaroon ng Type 3 Diabetes ay ang stress, poor diet, family history at physical inactivity. Maaari rin maging dahilan ang pagkakaroon ng high blood pressure.

Sa research na inilathala noong August 2019 sa scientific journal na Nutrients sinabi ng mga siyentipiko na bukod sa glucose ay gumagamit din ang ating utak ng ketone bodies bilang fuel or source of energy at ang paggamit ng ketones ng ating utak ay patuloy bagama’t may Alzheimer’s Disease na. Dahil dito ay nakitaan ng mga doktor ng kahalagahan ang ketones at maaring makatulong ito sa pag-iwas o makatulong ito sa mga maysakit na Alzheimer’s Disease.

Kaugnay dito ay sinabi ni Dr. James Galvin sa isang artikulo na lumabas noong 2013 sa isang clinical journal na Practical Neurology na halos 24 porsiyento ang nababawas sa paggamit ng glucose ng utak sa mga indibidwal na may Alzheimer’s Disease. Ayon sa kanya, makikita ang pagbaba ng paggamit ng glucose ng mga specific na parte ng utak ilang dekada bago pa magkaroon ng sakit na Alzheimer’s Disease.

Sinabi rin ni Dr. Galvin na hanggang sa 60 porsiyento ng energy requirements ng utak ay maaaring makuha sa ketones kaya’t ang Ketone Supplementation therapy ay maaaring gamitin sa mga indibidwal na may Alzheimer’s Disease o dementia. Ang Medium Chain Triglycerides (MCT) oil at Virgin Coconut Oil (VCO) ay maaaring gamitin bilang source ng ketones.

Ang MCT Oil ay nanggagaling sa coconut or palm kernel oil. Dahil ito ay medium chain triglycerides, ito ay madaling ma-digest, ma-absorb at ma-convert to ketones sa liver (atay). Ang ketones ay nagagamit agad ng ating katawan as energy source. Ito ang dahilan kung bakit karaniwang gianagamit ng mga atleta, bodybuilders at sports enthusiasts ang MCT Oil bago mag-ehersisyo o bago lumahok sa kompetisyon.

Bukod sa mga nabanggit na gamit ng MCT Oil ay ginagamit din ito sa mga preterm infants, upang gamutin ang skin infections, at sa ketogenic diet upang bumaba ang insulin level at makatulong sa pagbaba ng timbang.

Kasama ng mga established treatment modalities, ang MCT Oil ay ginagamit din ang mga doktor sa panggagamot ng mga pasyenteng may digestive problems, may Type 1 at Type 2 diabetes, sa mga batang may autism at epilepsy na hindi napapagaling ng karaniwang gamot.

Sana ay nasagot ng artikulo na ito ang inyong mga katanungan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com