Mga deboto, gawin ang penitensya na may pag-iingat

ni Ryan Sison @Boses | Apr. 17, 2025

May mga paniniwala tayo na matagal nang bahagi ng ating tradisyon, ngunit paglipas ng panahon, kailangan din nating tanungin ang ating mga sarili kung ang pananampalataya ba ay mas epektibo kung maaari ka namang magkasakit o masaktan? 

Sa tuwing dumarating ang Mahal na Araw, hindi na bago ang mga eksenang makikita sa lansangan – may mga nagpapapako sa krus, may mga naghahagupit ng latigo sa likod, at may mga duguang katawan na tila ba kasabay ng pagdurusa ni Kristo. Ngunit ang tanong, kailan pa naging sukatan ng pananalig ang dami ng sugat sa katawan?Sa isang panayam nitong Miyerkules, muling nanawagan ang Department of Health (DOH) sa mga deboto ngayong Semana Santa na huwag nang saktan ang sarili sa pamamagitan ng paghampas ng latigo o pagpapako. 

Ayon kay DOH Spokesperson Assistant Secretary Albert Domingo, hindi naman kailangan ang saktan ang sarili para ipakita ang pananalig, bagay na sinang-ayunan din ng ilang kaparian.Ngunit kung hindi talaga mapipigilan, pinaalalahanan ng DOH ang publiko na gumamit ng malilinis na equipment at tiyaking maayos ang paglilinis ng sugat. 

Binigyang-diin ni Domingo na ang ganitong klaseng sugat ay tinatawag na “dirty wounds” o maruruming sugat na madaling pasukan ng mikrobyo at magdulot ng impeksyon. Bukod sa alikabok sa paligid at sa lupa, maging ang mismong mga kagamitan gaya ng latigo at pako ay maaaring pagmulan ng mikrobyo.Aniya, agad hugasan ang sugat ng malinis na tubig at sabuning mabuti, mainam din ang paggamit ng antiseptic gaya ng iodine. 

Dagdag pa niya, huwag sumunod sa mga lumang pamahiin gaya ng pagtalon sa ilog o dagat para raw gumaling ang sugat, dahil maaari itong magdulot ng karagdagang impeksyon.

Karaniwan na sa mga deboto ang pagsasagawa ng penitensya tuwing Semana Santa bilang panata, pasasalamat, at paghingi ng kapatawaran. Ngunit nilinaw ng DOH na may mas ligtas at mas makabuluhang paraan para ipakita ang debosyon, gaya ng taimtim na pagdarasal at pagninilay-nilay.

Sa huli, hindi kailanman kinailangan ang dugo at latay para mapatawad o mapalapit sa Diyos. Ang pananampalataya ay hindi dapat sinusukat sa rami ng latigo sa likod kundi sa kabutihan ng puso.

Sa mga debotong magpepenitensya, saludo kami sa inyong pananampalataya at sakripisyo. Ngunit sana’y huwag nating isantabi ang kaligtasan. Gawin natin ito ng may pag-iingat -- gamitin ang malilinis na kagamitan, linisin agad ang mga sugat, at umiwas sa maaaring magdulot ng impeksyon. Tandaan, balewala ang iyong pananampalataya kung ika’y magkakasakit.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Walang disiplinang ‘kamote’ drivers, dapat sampulan

ni Ryan Sison @Boses | Apr. 16, 2025

Hindi lang gulong ang umiikot sa kalsada, pati ang problema – paulit-ulit at paikut-ikot na lang. At sa sentro ng gulong na ito, laging may isang “kamote” na driver na akala mo’y walang batas sa daan.

Sila ‘yung sumisingit kahit walang espasyo, dire-diretso kahit pula pa ang ilaw, at minsan pa’y nakakabangga. Ilang beses na tayong nagluksa dahil sa kapabayaan ng ganyang klase ng driver, ilang aksidente pa ba ang kailangang mangyari bago tayo matuto?

Kamakailan, inanunsyo ng Land Transportation Franchising and Regulatory Board (LTFRB) na magpapatupad sila ng zero tolerance policy laban sa mga “kamote “ drivers, marami ang umaasang hindi ito manatili na salita lamang. 

Ayon kay LTFRB Chairperson Teofilo Guadiz III, titibagin na nila ang mga pasaway dahil banta ito sa kaligtasan ng mamamayan.

Isa sa mga hakbang na agad nilang ipinatupad ay ang preventive suspension sa anim na unit ng isang bus company na sangkot sa aksidente sa NLEX kung saan 13 ang nasugatan.

Paliwanag ni LTFRB Spokesperson Ariel Inton, may rason kung bakit hindi buong fleet ang sinuspinde, marahil para bigyang pagkakataon ang ibang hindi sangkot, pero sapat na para ipadama ang bigat ng pananagutan.Bukod dito, iniimbestigahan na rin nila ang isang viral video ng bus na umano’y overspeeding sa La Union.

Wala pa raw sapat na detalye ang video, pero umaasa si Inton na makikipagtulungan ang uploader upang mapanagot ang dapat managot. 

Hindi na kasi sapat ngayon ang pagsisisi sa huli kaya kailangang may agarang aksyon.

Dagdag pa nito, tutok din ang kagawaran sa mga kolorum na sasakyan, lalo na’t delikado ang mga ito dahil hindi ininspeksyon ang mga unit at hindi rin tiyak kung may lisensya ang driver.

Mismong LTFRB na ang nagbabala na ang pagsakay sa kolorum ay delikado, at nanawagan sila na kung may impormasyon hinggil sa pugad ng mga kolorum na sasakyan ay ipagbigay-alam sa ahensya upang hindi mabiktima.

Totoong may nakikita tayong galaw, babala, at plano. Ngunit sapat ba ito para mawala ang kultura ng “kamote” driver? Ang panawagan para sa disiplina ay hindi lang dapat manggaling sa gobyerno. Tayo mismong mga pasahero, motorista, at mga driver ang may responsibilidad na sumunod at magsumbong.

At sa mga driver, ugaliin nating mag-ingat sa daan. Hindi lang preno at manibela ang hawak natin kundi pati ang buhay ng mga pasahero. Ang pagiging responsable sa kalsada ay hindi opsyon kundi obligasyon. Kaya kung ikaw ay kamote, huwag ka sa daan, du’n ka sa taniman.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Mga kandidato, manalangin at magnilay-nilay muna ngayong Holy Week

ni Ryan Sison @Boses | Apr. 15, 2025

Sa panahon ng Semana Santa, kasabay nito ang nalalapit na halalan, hindi maiwasang magsanib ang pananampalataya at pulitika sa isipan ng mga tao. 

Habang ang iba’y abala sa pagninilay-nilay at paggunita sa sakripisyo ni Kristo, ang ilan nama’y tuloy pa rin sa pangangampanya at bitbit ang mga tarpulin at pangakong paulit-ulit nang naririnig. 

Kahit abala ang mga kandidato sa pagkuha ng tiwala ng taumbayan, hindi rin dapat kalimutan ang respeto sa kultura, pananampalataya, at banal na tradisyon ng mga Pilipino. 

Sa ating bansa, kung saan ang Mahal na Araw ay panahon ng pagbubulay-bulay, makatwiran bang marinig pa rin natin ang pangalan ng mga pulitiko sa gitna ng dasal at paggunita sa pagkamatay ni Hesu-Kristo?Sa isang panayam, binigyang-diin ni Atty. Dennis Ausan, regional director ng Commission on Elections (Comelec) sa Western Visayas, mahigpit na ipinagbabawal ang pangangampanya sa Huwebes Santo at Biyernes Santo.

Ang anumang uri ng kampanya ay bawal at labag sa batas, at ituturing itong isang election offense na maaaring isampa laban sa sinumang kandidatong mapapatunayang lumabag.Pinayuhan naman ng Comelec ang publiko na maging mapagmatyag, at kung may mabatid silang lumabag sa batas ay hinihikayat silang magsampa ng reklamo.

Maaaring dumiretso sa pulisya o pinakamalapit na tanggapan ng Comelec. Ngunit paalala ng opisyal, na dapat ay may sapat at malinaw na ebidensya upang suportahan ang reklamo para umusad ito sa korte.Kaugnay nito, nagpaalala rin ang Department of Education (DepEd) Region 6 sa mga paaralan tungkol sa pag-iwas sa pamumulitika sa panahon ng moving-up at recognition ceremonies. 

Ayon kay spokesperson ng DepEd-6, hindi dapat gawing partisan activity ang mga ito. Kung hindi maiwasang dumalo ang mga kandidato, kinakailangang munang humingi ng pahintulot sa Comelec. Habang palapit nang palapit ang halalan tiniyak ng Comelec na 100% nang handa ang kanilang hanay.

Maging ang Police Regional Office (PRO) 6 ay siniguro na sapat ang puwersang ipapakalat para maayos, mapayapa, at ligtas ang eleksyon. Sa huli, mahalagang mapaalalahanan ang mga kandidato na hindi lahat ng araw ay para sa pulitika. Gawin ding manalangin at magnilay-nilay sa ganitong panahon.

Sa mga sagradong araw tulad ng Semana Santa, mas nararapat ang pagninilay kaysa sa pagkuha ng suporta. Dapat magbigay ito ng respeto sa pananampalataya, batas, at pati sa damdamin ng mga mamamayan. Hindi mahalaga kung gaano kaingay ang iyong pangalan, kundi kung paano ipinapakita ang paggalang sa tamang panahon at maayos na paraan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com