Kaya friends pa rin daw sila, Sharon… HIRIT NI JANICE: WALANG GALIT AT DRAMA SA PAGHIHIWALAY NAMIN NI GABBY

ni Rohn Romulo @Run Wild | February 25, 2024

Hiyang-hiya at hinding-hindi raw makakalimutan ni Janice de Belen ang paghingi ng paumanhin sa kanya noon ni Sharon Cuneta dahil kay Gabby Concepcion.

Sa latest YouTube vlog ni Snooky Serna, binalikan nga ni Janice ang paghingi ng tawad sa kanya ni Sharon on national television, ganu’n din ang pagso-sorry ni Gabby nang muli silang magkatambal sa pelikulang Rosenda nu’ng 1989.

Inamin naman ng premyadong aktres, na 'first love' niya si Gabby na nu’ng 1984 ay naging asawa naman ni Sharon, nagkaroon ng anak na si KC Concepcion at alam naman ng lahat na naghiwalay din makalipas ang ilang taon.

Sa Pick A Name game ng vlog ni Snooky, ang unang pangalan na nabunot ni Janice ay si Sharon. 

Ikinuwento pa niya na dapat daw, ang ipapangalan sa kanya ng ina nu’ng ipinagbubuntis pa lang siya ay Sharon.

"Can you imagine kung nangyari ‘yun?" natatawang tugon niya.

"Hindi ko alam kung bakit last minute, napalitan."

At dito na nga niya naikuwento na nagkaroon din sila ng isyu dahil kay Gabby. 

“Siyempre, nagkaroon kami ng konting issue because of Gabby. Nu’ng natapos na rin kami ni Gabby, parang tapos na rin ‘yun.

“Pero okay naman kami. I mean, we see each other, we’re fine, we’re okay, we have no problems.

“And I remember, si Sharon actually apologized on TV, na nahiya ako kasi parang feeling ko, sobrang liit na bagay para mag-apologize siya.

“But she did apologize. Na-appreciate ko ‘yun. Pero nahiya ako doon kasi hindi ko alam kung bakit kailangan niyang mag-apologize, wala naman iyon.

“But, you know, we’re okay. We’re okay,” pagbabalik-tanaw pa ni Janice.

Hindi rin niya makalimutan ang ginawa ni Sharon nu’ng ipinagbubuntis niya si Luigi Muhlach, ang love child nila ni Aga Muhlach.

“When I was pregnant with Luigi, siguro dahil alam nga niya nu’ng time na pregnant ako ru’n sa first ko, siyempre big deal ‘yun.

“Laman ako ng lahat ng kuwentuhan ng mga Marites nu’ng time na ‘yun, pati nu’ng church, laman ako noon.

“She was very supportive. She sent me flowers and sent me a letter. So, na-appreciate ko ‘yun,” pagbabalik-tanaw pa niya.

Kasunod niyang nabunot ay si Maricel Soriano, at agad sinabi ni Janice na nasampal din siya nang bonggang-bongga ng Diamond Star sa 1988 movie nilang Babaeng Hampaslupa kung saan gumanap silang magkapatid at naging magkaribal sa isang lalaki.

Pagbabahagi naman ni Snooky, mas malala ang sampal na inabot niya kay Marya sa Inagaw Mo Ang Lahat Sa Akin at gumulung-gulong pa sila sa isang sementeryo.

After Sharon and Maricel, si Gabby ang nabunot ni Janice.

Nilinaw naman ni Janice na maayos ang paghihiwalay nila ni Gabby at friends pa rin sila until now.

“Alam na natin ‘yan. Eh, ‘yan naman ang first love ko, ‘di ba? It’s just nice because after all those years, Gabby and I are friends," pahayag pa ng aktres.

“Minsan pagkukuwentuhan namin 'yung past, lolokohin ko pa siya, and, you know, game na game siya.

“So, wala akong galit whatsoever kay Gabby because we're friends. Okay kami, ‘yung walang drama. May closure and we're really okay."

Dagdag pa niya, "And you know, after what happened to us when we were doing Rosenda, he apologized to me. Sabi niya sa akin, ‘Whatever hurt I caused you, I wanted to say I’m sorry.’”

“Kuya Mayor” naman ang tawag niya kay Herbert Bautista, na kasabay din niyang lumaki, pero hindi raw niya naramdaman na niligawan siya ni Bistek dahil kapatid nga ang turing niya rito.

Super proud naman si Janice sa anak nila ni John Estrada na si Kaila Estrada, na pinupuri na rin bilang baguhang aktres, lalo na sa kanyang pagganap sa Linlang na ongoing ngayon ang mas mahabang teleserye version.

"I remember, minsan napanood ko siya, sabi ko sa kanya, 'Magaling ka pala, anak?'"

Marami pang napag-usapan sina Snooky at Janice na puwedeng balik-balikan sa YouTube channel.

Samantala, malapit na rin silang mapanood sa What's Wrong with Secretary Kim? kasama ang mga bidang sina Paulo Avelino and Kim Chiu.

Ria, pakakasalan na ni Zanjoe… "PERFECTLY MATCHED" — SYLVIA

ni Rohn Romulo @Run Wild | February 24, 2024

Inaabangan namin ang magiging Instagram post ng premyadong aktres at face ng Beautederm na si Sylvia Sanchez tungkol sa engagement ng anak na si Ria Atayde at ng aktor na si Zanjoe Marudo na kanilang ini-announce nu’ng February 20.

Nag-post na nga si Sylvia ng kanyang reaction at labis-labis ang kaligayahan nito para sa anak at mapapangasawa.

“Happy ako sobra para sa iyo Potpot @ria [red heart emoji],” caption niya kasama ang video ni Ria na naka-black one piece swimsuit na umaahon sa isang beach.

Dagdag-mensahe pa niya kay Ria, “Deserve mo 'yan dahil napakabuti mong anak [red heart emoji].”

Sa kasunod na IG (Instagram) post naman ni Ibyang (Sylvia), ibinahagi niya ang photo na magkasama ang celebrity couple. 

Makikita rin ang photos na nag-video call sila ni Ria kasama si Zanjoe at kitang-kita na happy silang lahat sa magandang balita na engaged na ang magkasintahan. 

Damang-dama nga sa caption niya ang nag-uumapaw na kasiyahan, “My heart is overflowing with Joy [red heart emoji]. 

"Perfectly Matched [three ring emojis].”

Matatandaan na nag-comment ang sister ni Ria na si Gela Atayde matapos ang proposal ni Zanjoe ng, "No I'm gonna cry again. Ily both."

At sa Instagram Story ng nakababatang kapatid ni Ria, nagbilin si Gela sa brother-in-law-to-be na alagaang mabuti ang kanyang kapatid.

“Please take care of her, kuya @onlyzanjoemarudo [white heart emoji],” sey ni Gela.

Sa naging interview namin kay Sylvia sa 1st anniversary ng Beautederm Headquarters sa Angeles, Pampanga, isa sa mga naitanong namin ay kung handa na ba ang pamilya Atayde sa isa pang bonggang kasalan.

"Hindi ko alam kay Zanjoe, kay Zanjoe 'yan," sambit niya.

Dagdag pa ni Ibyang, "Nasa kanya ‘yun, wala sa akin. Hindi ko para pangunahan si Zanjoe, maghihintay ako, kung ano ang gusto nilang dalawa. 

"Sila 'yan, eh, bilang nanay o magiging mother-in-law, ayaw makialam, ayokong pasukin ang relasyon nila, bahala sila.

"Basta ito ang sasabihin ko sa inyong lahat, mahal ko si Maine (Mendoza) at mahal si Zanjoe, napakabait nilang dalawa."

At kapag naging lola na raw siya sa anak man ni Ria o ni Arjo, ang gusto niyang itawag sa kanya ng magiging apo ay 'Mommy La'.

Marami pang celebrity friends at netizens ang bumati sa engagement nina Ria at Zanjoe, na tuwang-tuwa rin dahil bagay na bagay daw ang dalawa.

Puring-puri rin si Sylvia ng mga netizens dahil nakikita raw nila ang pagiging mabait na mother-in-law nito.

Komento nila, "Kung ganito lahat ng mother-in-law, this world will be a better place [three red heart emojis]."

"Ms. Sylvia, Zanjoe is so lucky, you are such a good and loving mother-in-law, congratulations."

"Inantay ko talaga 'yung post mo Ma'm, you are such a loving and sweet mom to your kids."

"'Pag kagaya ni Ma'am Sylvia ang magiging biyenan mo, napakasuwerte mo na [heart eyes emoji]. Congratulations to the newly engaged couple."

"Congrats... Suwerte ng mga anak ni Madam Sylvia, ang bait n'yo po."

"Parang napakasarap maging mother-in-law ni Ms. Sylvia."

"Sana all, ganito ang mother-in-law."

Congrats again to Zanjoe and Ria!

AVEL BACUDIO, IDINEMANDA SI MAHARLIKA NG US$2 M CYBERLIBEL

ni Rohn Romulo @Run Wild | February 8, 2024

Inamin ng kilalang fashion designer na si Avel Bacudio na hiyang-hiya siya sa First Family dahil nadadamay ang mga ito sa mga alegasyon at paninira ng dati niyang matalik na kaibigan at vlogger na si Claire Contreras a.k.a. Maharlika.

Kabilang sa mga paratang na itinanggi ng kampo ni Bacudio ay ang sinasabing sinuhulan niya ng mamahaling relo si Presidential Son at Ilocos Norte Rep. Sandro Marcos para makakuha ng proyekto ng gobyerno.Itinanggi rin nila na si First Lady Liza Marcos ang dahilan kung bakit nakakuha ng Schengen at US visa ang kanilang pamilya. 

Pinabulaanan din nila ang sinasabing tumanggap daw ng kickback ang fashion designer na taga-Bicol mula sa Philippine Department of Public Works and Highways (DPWH).

Itinanggi rin ng kampo ni Bacudio ang mga pasabog na pahayag ni Maharlika sa kanyang YouTube channel na bumili kaagad ang fashion designer ng milyun-milyong halaga ng ari-arian matapos manalo si Pangulong Bongbong Marcos sa halalan.

“We categorically deny all of those allegations. And we will prove in the court of law that those are all false,” ayon kay Atty. Oliver Baclay, Jr., ang lead counsel ni Avel Bacudio.

Pareho palang sinuportahan nina Avel at Claire ang Uniteam ni Pangulong BBM at Vice-President Sara Duterte noong 2022 elections. 

Kaya nagtataka rin si Avel kung bakit ginawa ito sa kanya ni Maharlika na kilala na ngayon bilang kritiko ng administrasyong Marcos.

Kuwento ni Avel, "Nagkakilala kami sa campaign, dahil pareho kami ng sinusuportahan.

"Nagkaroon kami ng communication, tapos biglang nagbago, hindi ko alam.

"Nagkukuwentuhan kami about buhay-buhay. So, doon nga lumabas 'yun, noong bata pa ako, ang hirap ng buhay, nawawalan ng pambayad sa kuryente, parang ganu'n.

"So, 'yun ang inilalabas niya ngayon. But that's my story before, at siyempre, iba na ngayon.

"Pero hindi ko talaga alam kung saan siya nanggagaling," ani pa ni Avel Bacudio.

Dahil dito, nagsampa si Bacudio ng $2-M cyberlibel case noong Enero 24 laban kay Maharlika sa US Central District sa Los Angeles at nai-serve na ang summons simula noong isinampa ang kaso.

Ayon sa complainant, hindi sana siya magsasampa ng reklamo kasi ayaw niya ng gulo, ngunit marami ang naapektuhan sa mga batikos ng vlogger.

“Sabi nga niya, BFF, siyempre, nakakalungkot. So, sabi ng pamilya ko, sabi ng sister ko, ipagdasal na lang natin. 

"Kaya lang ngayon, may mga tao na hindi dapat kasama dito, nadadamay na kasi sila.

"'Yung First Family nga, nadadamay, eh, client ko lang sila. Kaya medyo nakakahiya naman sa kanila,” ayon pa kay Avel.

Naninindigan siya na ang kanyang relasyon sa mga Marcos ay limitado lamang sa mga ginagawa niyang pananamit, at doon nagtatapos ang kanilang koneksiyon.

Naitanong namin kay Avel kung ano ang nakukuha niyang suporta sa showbiz friends and clients niya.

"That's good question. Well, 'yung mga taong matagal ko nang kaibigan sa showbiz, kilala naman nila kung sino ako.

"So they're sending me prayers. Nakakatuwa kasi lahat halos sila, 95% sumusuporta sa akin, punumpuno, kasi ever since naman, kilala na nila ako at wala akong itinatago.

"May mga negative ring nagse-send sa akin, pero parang 1% lang sila ng 31 million."

Samantala, hinihintay naman nila ang magiging sagot ni Maharlika sa isinampa niyang kaso.