Bilyonaryong Mafia ang Mahal Ko (66)

ni Maria Angela Gonzales @Kuwentong Pag-Ibig | Ika-22 Araw ng Abril, 2024

“Anak….?” hindi makapaniwalang sabi ni Via.

Nanlaki ang kanyang mga mata. Talagang hindi niya inaasahan na maririnig dito ang mga katagang iyon. 

“Yes,” mariing sabi ng matandang lalaki na hindi naman niya kilala. 

“So, ikaw si Dennis Jose?” Wala sa loob niyang tanong. 

Iyon kasi ang pangalan na madalas binabanggit ng kanyang ina. Pero, mula nang dumating sa buhay nila si Pedro,  hindi na ito nabanggit ng kanyang ina.  Hindi na rin naman niya hinahanap-hanap ang kuwento tungkol sa kanyang ama, dahil napunan din naman ni Pedro ang pagmamahal na hinahanap-hanap niya.  “Yes, ako nga,” wika nito. 

Unang kita pa lang niya sa matandang lalaki, may kaba na siyang naramdaman. Ngunit, ayaw niyang bigyan iyon ng anumang kulay. Isa pa, ayaw din niyang paasahin ang kanyang sarili. 

“Pero, hindi pa rin ako nakakasiguro na mag-ama tayo,” matabang niyang sabi. 

“Nakasisiguro ako.” 

Tumingin siya rito at ipinakita niya ang pagkunot ng kanyang noo. Gusto niyang magtanong, ngunit hindi niya magawa. 

“DNA test.” 

“Kumuha ka ng sample sa akin nang hindi ko namamalayan?” Hindi makapaniwalang sabi niya. 

“Kaya ba mas kakampihan mo si Nhel?” Matapang na tanong ni Jake sa kanyang ninong. 

Marahas na buntong hininga ang pinawalan ni Jake at sabay sabing, “Lahat na lang kasi ng gusto ko, inaagaw niya. At ngayon, ikaw naman ang…”

“Mag asawa na kami ni Nhel bago kita makilala,” asar niyang sabi. 

Nawala lang ang pagkaasar niya nang biglang rumehistro sa mukha niya ang mukha ng kanyang asawa. At doon niya napagtanto na miss na miss na niya ito. 

Itutuloy…

Ina, ‘di na ma-take ang ugali ng kaisa-isang anak

ni Sister Isabel del Mundo - @Mga kuwento ng buhay at pag-ibig | Ika-22 Araw ng Abril, 2024

Dear Sister Isabel,

Isa na ‘kong ina, ang pinoproblema ko ngayon ay ang kaisa-isa kong anak na ubod ng tigas ng ulo. Mula pagkabata, minulat na namin siya sa mabuting asal, ngunit nagtataka kami bakit ganito pa rin katigas ang kanyang ulo. Hindi niya sinusunod ang mga pangaral namin, gayung teenager naman na siya. Ang hilig pa niyang sumagot at sa tingin siguro niya siya ang laging tama. May alam ba kayong orasyon upang bumait ang anak ko? Nawa’y matulungan n’yo ako.

Umaasa,

Nora ng Roxas City

Sa iyo, Nora,

Ang upbringing ng isang bata ay nasa kanyang mga magulang. Kung ano ang nakikita niya sa bahay, ‘yun din ang gagayahin niya. 

Dapat kayo mismo ang magpakita ng magandang asal sa anak mo. Baka naman kasi lagi kayong nag-aaway at ‘di magkasundo ng asawa mo, ‘yun bang parang wala ng pagmamahal para sa isa't isa. 

Kayo munang mag-asawa ang dapat magpakita ng magandang halimbawa. Paano babait ‘yang anak mo kung walang nakikitang magandang asal na dapat niyang maging halimbawa? Kahit pa na maya’t mayain n’yo ang pangaralan sa kanya, hindi ‘yan babait kung lumaki siya sa bahay na hindi nakikitaan ng magandang kaugalian. Ituwid n’yo muna ang sarili n’yo at sikaping mag-family bonding upang mas lumalim ang samahan n’yo.

Mamasyal kayo, mag-picnic, mag-swimming at iba pa. Tungkol naman sa orasyon, ang pinakamabuting orasyon ay ang simpleng pagdarasal bago matulog at matuto rin kayong sabay-sabay na magsimba tuwing araw ng Linggo. Umpisahan n’yo na ito ngayon, tiyaga lang. Ganyan talaga maging isang ina. Lakip nito ang dalangin na sana mabago na ang ugali ng anak mo. Maging mabait at masunurin nawa siya habang lumalaki. 

Sumasaiyo,

Sister Isabel del Mundo

Bilyonaryong Mafia ang Mahal Ko (64)

ni Maria Angela Gonzales @Kuwentong Pag-Ibig | Ika-20 Araw ng Abril, 2024

Kahit nangangati ang kamay ni Via na damputin ang telepono at tawagan si Nhel, hindi niya pa rin ito magawa. 

May takot din kasi siyang nararamdaman. Paano kung hindi naman talaga nasisiyahan si Nhel kapag nakikita siya? Napapikit na lamang siya habang kinakagat ang kanyang labi, mas nanaisin pa niyang saktan ang kanyang sarili, dahil pakiramdam niya mas matinding sakit pa rin ang mararamdaman ng kanyang puso kapag sinabi sa kanya ni Nhel na hindi siya nito nami-miss, at wala talaga itong pag-ibig sa kanya. 

Marahas na buntong hininga ang kanyang pinawalan. Iyon kasi ang dahilan kaya hindi niya rin magawang lapitan si Nhel para ipaalam kung ano ang kanyang nararamdaman. 

Ang nais niya pa naman sana niya ay iparamdam kay Nhel kung gaano niya ito kamahal, ngunit nagdadalawang-isip siya, panigurado kasi na maaapektuhan lang ang kanilang anak kung ganito ang isasagot sa kanya ni Nhel,“I’m sorry. Kailanman hindi kita magagawang mahalin.”

Natatakot siyang masaktan, kaya tinitiis na lang din muna niyang hindi kausapin ang kanyang Tatay Pedro. Kahit ito ang kasama niya habang siya’y lumalaki, si Nhel pa rin ang kadugo nito. ‘Ika nga sa kasabihan, “Blood is thicker than water.”

“Alam mo ba ang pinakamagandang ganti kay Nhel?” Tanong sa kanya ni Jake. 

Alam niyang kaaway nito si Nhel, kaya bigla siyang kinabahan sa tanong nito. Sa halip na magtanong, kumunot ang kanyang noo. Gayunman, hinihintay pa rin niya ang sasabihin nito. 

“Iyon bang malaman niyang may relasyon tayo.” 

“No way!” Mariin niyang sabi. 

“May magagawa ka ba kung bihag kita?” Nakangising tanong ni Jake sabay halakhak na para bang walang ibang tumatakbo sa kanyang isipan kundi kasamaan. 

Itutuloy…