Simbang Gabi sa Maynila, aprub na!

ni Ronalyn Seminiano Reonico | October 17, 2020

Pinayagan ni Manila Mayor Isko Moreno na magdaos ng Simbang Gabi mula Disyembre 16 ngunit 30 percent capacity lamang ang maaaring pumasok sa simbahan kada misa.

Pinag-usapan nina Moreno at Bishop Broderick Pabillo, Apostolic Administrator of Manila ang mga patakaran sa darating na Simbang Gabi at maging ng Traslacion sa susunod na taon.

Sa ngayon ay 30 percent capacity lamang ang maaaring pumasok sa simbahan kada misa at pag-aaralan pa kung maaari itong dagdagan para sa mga deboto.

Saad ni Pabillo, "Para po hindi magkasama-sama ang mga tao, bigyan kami ng pagkakataon na damihan 'yung misa. Kaya i-consider nila 'yung curfew, para magkaroon tayo ng maraming misa at hindi magkadikit-dikit ang mga tao.”

Samantala, buo ang desisyon ni Moreno na pansamantalang hindi ituloy ang Traslacion sa Enero hanggang wala pang bakuna laban sa COVID-19. Aniya, "If we have the same situation today come January, it's a no-no.”

Ilocos Norte, bukas na sa mga turista

ni Lolet Abania | October 17, 2020

Bukas na ang Ilocos Norte para sa mga turistang nagnanais na mamasyal upang makabawi sa nanghinang ekonomiya dahil sa epekto ng pandemya ng COVID-19.

Gayunman, ang mga turistang manggagaling sa mga lugar na nasa ilalim ng general community quarantine (GCQ) at modified general community quarantine (MGCQ) sa Luzon lamang ang papayagang makapasok at bumisita sa Ilocos Norte.

Kinakailangan na ang mga turista ay sumailalim sa COVID-19 swab testing nang hindi lalagpas sa 72-oras na nagnegatibo bago ang travel period.

Dapat ding makipag-ugnayan ang mga turista sa mga travel operators na binigyan ng permiso ng Department of Tourism (DOT) para sa kanilang transportasyon, accommodation at mga nais puntahang lugar.

Gayundin, kailangang ang mga turista ay naka-register sa SafePass website ng Ilocos Norte para sa posibleng contact tracing.

Ayon pa sa inilabas na report ng lokal na pamahalaan ng Ilocos Norte, may 50 slots lang araw-araw para sa mga turistang gustong mamasyal sa lugar.

Doktor, nagregalo ng cash cake sa amang magsasaka

ni Lolet Abania | October 7, 2020

Isang espesyal na regalo ang ibinigay ng doktor sa kanyang amang magsasaka na magdiriwang ng ika-63rd kaarawan.

Sa video na nai-share ng isa nang doktor na si Dr. Emil Umipig, hinihila ng kanyang ama ang magkakarugtong na perang papel mula sa birthday cake habang masayang-masaya ring tinitingnan ang bawat isa nito.

Ayon kay Umipig, matagal na niyang pangarap na mabigyang kasiyahan ang mga magulang dahil sa buong buhay ng mga ito ay puno ng pagsisikap para makatapos siya ng pag-aaral sa Medisina.

"For 30 years, dependent ako sa kanila financially. Kaya ngayon na doctor na ako at may trabaho na, ako naman ang magpapasaya sa kanila," sabi ni Umipig. "Hindi kami mayaman.

Si Mama, retired public school teacher. Si Papa, farmer. Kaya ‘yung ganitong bagay, masayang-masaya na kami. Ngayon lang ako nakakabawi sa kanila," dagdag ni Umipig.