Para iwas-breakup at sumbatan sa huli… Tips para sa bagong magkarelasyon

ni Mharose Almirañez | July 7, 2022

“Sa umpisa lang ‘yan masaya,” ‘yan ang bukambibig ng karamihan sa tuwing nakakakita sila ng bagong magkarelasyon.

Pero ano nga ba ang sikreto para mapatibay ang relasyon? Paano ito mapapatagal sa kabila ng mga paparating na pagsubok? Anu-ano ang mga dapat iwasan at dapat gawin upang hindi mauwi sa hiwalayan at mapasabing, “Sa umpisa lang talaga masaya”?

Sabi nga ni Jodi Sta. Maria, “Papunta pa lang tayo sa exciting part.” Ito ‘yung stage kung saan kilig na kilig pa kayo sa isa’t isa, pero kung hindi mame-maintain ang consistency ay maaari itong mauwi sa exhausting part, hanggang tuluyan na ngang humantong sa exciting part. Ayaw mo naman sigurong mangyari ‘yan sa relasyon n’yo, ‘di ba, beshie?

Bilang concerned citizen, narito ang ilang dapat gawin ng mga bagong magkakarelasyon:

1. GIVE AND TAKE. Hindi ‘yung tanggap ka lang nang tanggap mula sa partner mo. Dapat ay marunong ka ring magbigay. Halimbawa, mag-share ka rin sa bill tuwing kumakain kayo sa labas, i-treat mo rin siya sa sine o bigyan mo rin siya ng gift. Hindi ‘yung siya lang ang gumagastos sa relasyon n’yo. Hindi lamang ito tungkol sa pera, pero dapat mong maunawaan na kapag pumasok ka sa relasyon at kung gusto mo itong tumagal ay hindi na lang ito tungkol sa sarili mo, kundi para na ito sa “inyo”. Ang mga ginagawa mo ngayon para sa kanya ay investment para sa kinabukasan n’yong dalawa. Hindi sa lahat ng oras ay makakapagbigay ang isa sa relasyon kaya dapat give and take, para na rin maiwasan ang sumbatan o bilangan sa huli.

2. COMMUNICATION. Dapat ay maging very vocal and super expressive ka sa feelings mo towards him/her. Mainam ‘yung nagpapalitan kayo ng ideas and views pagdating sa napakaraming bagay. Pag-usapan at ayusin ang tampuhan at maging open kayo sa isa’t isa. Hindi man kayo palaging magka-chat, text o call, hangga’t maaari ay ‘wag n’yong palilipasin ang araw nang hindi nasasabi sa partner mo ‘yung nangyari o mangyayari sa ‘yong maghapon. Hindi ka man makapag-update from time to time, at least ay alam niya kung nasaan ka, sino ang mga kasama mo at kung ano ang ginagawa mo upang maiwasan niya ang pag-o-overthink.

3. BUCKET LIST. Hindi man natin ma-predict ang mangyayari sa future, mainam kung mayroon kayong goals na gustong i-accomplish kada linggo, buwan o taon. Mahirap ‘yung spontaneous, go with the flow at bahala na kung saan dalhin ng mga paa ang walang direksyon n’yong relasyon. Mas okey ‘yung mayroon kayong nakaplano na lakad for the whole month. Hindi naman required na sundin as is ‘yung nasa schedule, kumbaga, ‘yun ay magiging guide lamang. Maaari kayong magsimula sa malalapit na fast food, restaurant, coffee shop, museum, park, at saka n’yo isunod ang out of town trips.

4. MATURE MINDSET. Normal lang siguro na maging clingy o pabebe sa partner mo, pero siyempre, hindi na kayo mga bata kaya dapat ay napag-uusapan n’yo na rin ang future plans. Halimbawa, target ba niyang ma-promote sa trabaho o may plano ba siyang mag-resign o mag-abroad? If ever, ano’ng business ang gusto niya? How do you see yourself five years from now? Kung ang bawat sagot niya ay palagi kang kasama sa mga plano niya, (itabi mo beshie, ako na!) aba, siyempre, he/she’s for keeps na talaga. Masarap makipagrelasyon sa taong alam ang gustong mangyari sa buhay. ‘Yung hindi lang puro pagpapa-cute sa social media ang alam. Kapag pumasok kayo sa relasyon, dapat ay you guys were dating to marry. Sapagkat kung magrerelasyon lang kayo para may matawag na dyowa, naku, salamat na lang sa lahat!

5. RESPECT. Hindi porke dyowa mo na siya ay pipilitin mo na siyang gawin o pag-usapan ang mga bagay na hindi pa siya ready. Irespeto mo ang desisyon at privacy niya. Kung sakaling magkaroon kayo ng tampuhan, ‘wag mong iha-hack ang social media accounts niya para lang makahanap ng sagot sa ipinag-o-overthink mo. Huwag mo siyang pagbubuhatan ng kamay o magbibitaw ng masasakit na salitang puwedeng makadagdag sa trauma niya before. Ikaw ang pinili niya ngayon dahil mahal ka niya. Respetuhin mo siya’t rerespetuhin ka rin niya nang sobra.

Additional tips na rin upang magtagal ang relasyon ay araw-araw mo siyang piliin. Iparamdam mo kung gaano siya kaganda/kaguwapo at palagi mo siyang iko-compliment. Iparamdam mo kung gaano mo siya kamahal at kung gaano kayo kasuwerte sa isa’t isa. Huwag n’yo ring palilipasin ang araw na hindi naaayos ang problema. Maging consistent sa pagpapakilig at huwag maging kampante porke kayo na. Huwag na huwag n’yo rin hahayaang maipon nang maipon ang maliliit na tampuhan dahil kapag naipon ‘yan at sumabog—boom!

Tandaang pagsubok ang nagpapatibay sa relasyon kaya sana’y huwag kayong sumuko agad at magkasama n’yo pa rin itong malagpasan hanggang sa huli. So, congrats, beshie! Best wishes!

Green flag is waving… Signs na nasa tamang tao ka na

ni Mharose Almirañez | June 12, 2022

Naranasan mo na bang itrato nang tama? ‘Yung tipong, kapag kasama o kausap mo ‘yung taong nagpapasaya sa ‘yo ay napakagaan ng pakiramdam at para bang hindi ka nangangambang matibag ang ginawa mong pader. Kumbaga, bibigyan ka niya ng assurance sa tuwing nagda-doubt ka. ‘Yun bang, nawawala ang lahat ng insecurities mo sa tuwing kino-compliment ka niya. Siya rin ‘yung tipong, hindi nahihiyang maging vocal sa feelings niya towards you.

Sabi nga ng Ben&Ben, “‘Di ka madedehado kung sasagutin mo lang ako… Paninindigan kita...”

Sounds in love na ba? Well, beshie, papunta pa lang tayo sa exciting part.

Alam kong nauumay ka na sa paulit-ulit na trial cards at napakaraming red flags when it comes to dating. Hindi na rin bago ‘yung ghosting issue at may dyowa pala siya. Alam ko rin ‘yung feeling na hindi ka naman waiting shed, pero tila naging tambayan ka muna ng ilan bago sila tuluyang nakarating sa kanilang tahanan. Mapapatanong ka na lang talaga ng, “Nasaan ka na ba?” tulad ni Zack Tabudlo.

Gayunman, bawat tao ay may nakatakdang kapalaran, hindi pa man sila naisisilang. Kaya sa oras na makita mo na ang mga signs na ito, sana ay huwag mo na siyang pakawalan.

1. COMPATIBLE KAYO. Bagama’t may sinasabing “Opposite attracts,” napakalaking bagay pa rin kung compatible kayo, alinman sa Astrology o Numerology. Iba ‘yung impact kapag pareho kayo ng taste sa music, hobby, interest at tila on the same ground kayo pagdating sa napakaraming bagay. Idagdag na rin ‘yung mga bagay na nadi-discover n’yo unexpectedly.

2. CONSISTENT SIYA. Hindi lang ito tungkol sa consistency ng replies and updates niya kundi consistent din siya sa pagpapakilig sa ‘yo. ‘Yung siya na ang mag-a-adjust ng schedule niya para sa ‘yo. ‘Yung ipaparamdam niyang hindi ka istorbo at para bang every day is full of surprises.

3. CURIOUS SA ‘YO. ‘Yun bang napakarami niyang tanong tungkol sa ‘yo at tungkol sa mga taong nakapaligid sa ‘yo. Interesado rin siyang malaman, maging ang future plans mo, to the point na magugulat ka na lang, na-stalk ka na pala niya sa lahat ng social media accounts mo.

4. UNDERSTANDING. ‘Yung kahit pinapakitaan mo na siya ng napakaraming red flags ay hindi pa rin siya nagsasawang unawain ka. Para bang lalo mo siyang nakikila kada araw.

5. HINDI PA-IMPRESS. Ipagpalagay nating langit siya at lupa ka, o kaya naman ay academic achiever siya at very gifted sa lahat ng aspeto— pero hinding-hindi niya ‘yun ipagyayabang sa ‘yo. Hindi niya ipagyayabang na naka-iPhone 13 128 GB siya, habang ikaw ay naka-Cherry Mobile. Hinding-hindi niya pahaharurutin ‘yung sasakyan niya sa inyong date kasi hindi siya pa-impress para lang makuha ang loob mo.

6. HINDI BITTER SA EX. Hindi siya nagkukuwento ng ka-toxic-an o puro negative tungkol sa kanyang past relationships. Hindi rin siya pa-victim o attention seeker para lang i-comfort mo siya at makuha ang iyong simpatya.

7. MAGINOO PERO MEDYO BASTOS. Mabait siya, hindi lang sa ‘yo kundi pati na rin sa waiter, security guard, janitor atbp. Inirerespeto rin niya ang iyong opinyon at paniniwala. Kapag magkasama kayo ay hindi siya panay cellphone, unless pi-picture-an ka niya o manonood kayo ng videos. Bagama’t may pagka-naughty siya ay hindi ka niya pipiliting gawin o pag-usapan ‘yung mga bagay na ayaw mo o ‘di ka komportableng pag-usapan.

8. GINAGASTUSAN KA. Hindi naman sa pagiging materialistic, ngunit sabi nga nila, ang totoong gold ay very expensive, pero good for investment kaya dapat talagang pagkagastusan. Halimbawa, magugulat ka na lang na bumili pala siya ng BULGAR, habang ‘yung iba ay palaging idinadahilan na wala silang mabilhan. Ha-ha-ha!

Mapapakanta ka na lamang talaga ng, “Something I wanted to feeeel!”

Deserve mo ‘yan, beshie!

Sa article na ito ay puro good vibes lang, kaya hindi kita tuturuang mag-play safe at maging allergic sa too good to be true. Instead, imo-motivate kita to enjoy the moment, go with the flow and live your life to the fullest. Bihira lang makatagpo ng ganyang tao, so congratulations for being treated that way. Sana all na lang talaga, ‘di ba?!

#Manifesting, sana hindi ‘to trial card.

Sure ka bang single siya? Tips para ‘di ka ma-fall sa ka-chat mo

ni Mharose Almirañez | June 9, 2022

Marupok kang maituturing kung isang “Hi” o “Slr” lang ng nang-ghost sa ‘yo 1 week ago ay mas mabilis pa sa kidlat ang reply mong “Hello. Okey lang. Kumusta?”

A friendly reminder: Hindi ka PDF file na puwedeng ma-attach basta-basta. Kaunting pakipot naman d’yan, especially girls, hindi porke trending ang pagiging marupok ay makikiuso ka na rin. Have some dignity, okie?!

Pero paano nga ba maiiwasang hindi ma-fall sa taong ka-chat mo araw at gabi?

Bilang concerned citizen, narito ang ilang tips:

1. HUWAG MAG-GOOD NIGHT. Hindi totoong may multo sa gabi, pero maraming nanggo-ghost. ‘Yung tipong, kung anu-ano na ang naging topic n’yo kagabi, pero kinabukasan ay biglang hindi ka na niya chinat. Tip no. 1, huwag kang maggu-good night para may dahilan kang mag-good morning sa kanya kinaumagahan. Take note, mag-good morning sa paraang hindi mawawala ang iyong dignidad. Halimbawa, “Sorry, hindi na kita na-reply-an kagabi. Nakatulog na ako, eh. Btw, good morning.” Proven and tested na ang ganyang strategy para mapahaba ang inyong conversation hanggang sa mga susunod pang araw.

2. HUWAG MANGULIT SA CHAT. Alam kong masaya ka sa tuwing kausap siya, pero know your place, beshie. Huwag na huwag mong sasanayin ang sarili mo na ka-chat siya kada minuto dahil super ma-a-attach ka talaga sa kanya kapag ginawa mo ‘yang hobby. Halimbawa, seen niya lang ‘yung last message mo, then after 2 hours ay seen pa rin. Tip no. 2, ‘wag na ‘wag kang magpa-flood chat sa kanya ng, “Busy ka ba?” “Uyyy, ano’ng ginagawa mo?” “Seen lang?” etc., somehow nakakakilig ‘yan, but at some point, medyo nakaka-turn off din. Better to keep it low key sa tuwing nami-miss mo siya. Instead na mangulit sa kanya sa chat box, magmaganda ka na lang sa IG stories mo. Post a selfie or something na sigurado kang mapapa-reply talaga siya sa ‘yo. Subok ko na ‘yan, beshie!

3. BAGALAN ANG PAG-REPLY. ‘Yung tipong, masaya kayong magkausap, pero biglang hindi mo muna siya re-reply-an. Kumbaga, gagawin mong ‘cliffhanging’ ‘yung conversation n’yo. Halimbawa, may interesting question siya sa iyo, ‘wag mo munang sagutin para mabaliw siya kaiisip sa isasagot mo. I’m sure, beshie, he/she’s into you na kapag kinulit ka niyan.

4. DALANGAN ANG PAG-COMPLIMENT SA KANYA. Mayroong iba na nagbabardagulan sa chat box as their word of affirmation. Iba’t iba rin naman ang trip natin. Normal lang na puriin mo siya, pero huwag na huwag mo siyang sasambahin. Mainam kung once in a blue moon niya lang marinig ‘yung compliment galing sa ‘yo. Kumbaga, out of nowhere mo siyang sinabihan ng “Mas bagay sa ‘yo ‘yung clean cut,” mga ganyan.

5. HUWAG KANG AAMIN. Sabi nga nila, nawawala ang thrill kapag nagkaaminan na. Kaya ‘wag na ‘wag mong pakakawalan ang magic word na “Gusto kita”. Ang tanong, paano kayo magle-level up kung walang maglalakas-loob na umamin? (Okey lang ‘yun para pare-pareho tayong sad. Damay-damay na ‘to. Charot!)

Napakaraming relasyon ang nagsimula sa chat, ngunit marami rin ang nagtapos dahil dito. ‘Yung akala mo, single siya kaya ine-entertain mo ang pakikipag-chat niya. ‘Yung hoping kang i-flex ka niya, ngunit kalaunan ay jowa niya ang nag-flex sa ‘yo sa social media as third party na hindi dapat tularan.

Lesson learned, tiyakin munang single ang ka-chat bago maging totally invested sa feelings. Hindi masama ang mag-play safe. Ang masama ay ‘yung mag-take ng risk sa taong hindi ka sigurado sa totoong intensyon sa ‘yo. Okie?