Paano mapapanatiling healthy ang isang relasyon?

ni Mabel G. Vieron - OJT @Life & Style | April 2, 2023

Ang goal mo rin ba ay magkaroon ng forever? Pero ‘ika nga nila, hindi hinahanap ang forever, pinaghihirapan ‘yan. Kailangan ito ng maraming effort at sacrifices para mag-work ang inyong pagsasama.

Narito ang ilan sa mga puwedeng gawin ng magkasintahan para magkaroon ng pangmatagalan na pagsasama:

1. MAGTIWALA KA. Importante na magkaroon kayo ng tiwala sa isa’t isa dahil ‘pag wala kayo nito at masasamang bagay lang ang maiisip mo sa iyong partner, isa rin ito sa mga dahilan kaya nasasakal ang iba. Ang kakulangan ng tiwala ay hindi nakakaganda sa pagsasama, minsan, ito pa ang nagiging dahilan kung bakit nagtatapos ang isang relasyon. Pero kung may tiwala ka sa kanya at alam mong tapat siya sayo, mas magiging komportable ka sa relasyon n’yo.
   

2. MAGING INTIMATE AT EXPRESSIVE. Iparamdam mo sa iyong partner kung gaano mo siya kamahal, puwede mo rin itong gawin sa pamamagitan ng paglalambing, emotional support, atbp. Kapag hindi ka marunong magpakita at magparamdam ng pagmamahal sa kanya, baka sa iba ‘yan maghanap. Patay tayo r’yan!
   

3. MATUTONG MAGPARAYA. Hindi puwedeng ikaw ang boss at siya naman ang iyong alipin. Kung ikaw ang palaging nagdedesisyon sa inyo, minsan ay hayaan mo rin siyang pumili para sa inyong dalawa. Kung may mga bagay na gusto kang gawin, pero ayaw niya, ‘wag mo nang pilitin. Kapag parehas kayong may control, parehas din kayong magiging kuntento.
   

4. AYUSIN ANG MGA PROBLEMA. May mga couples na kapag may hindi pagkakaintindihan ay sinusugod agad ang partner nila, habang mayroon din namang hinahayaan lang ang isyu na parang walang nangyari para iwas-gulo, ngunit ang mga ganitong scenario ay parehas lamang mali. Ang mga magkasintahan ay dapat na marunong makipag-communicate sa isa’t isa, tulad ng pakikipag-usap nang masinsinan upang maresolba ang kanilang isyu at para hindi na rin ito humaba pa. Kung medyo mainit ang sitwasyon, magpalamig muna kayong dalawa bago mag-usap, basta tandan na ‘wag niyong hayaan na hindi niyo nasosolusyonan ang pagtatalo niyo.
   

5. DAPAT PAREHO KAYONG MARUNONG HUMAWAK NG PERA. Minsan nagiging iresponsable tayo pagdating sa pera. Kung hindi ka marunong humawak ng pera, malaking problema ‘yan sa isang relasyon. Importante na pareho ang mga pananaw niyo tungkol d’yan, lalo na kung balak mo na siyang pakasalan. Kung gastador ang isa at matipid naman ang isa, asahan mo na magkakaroon ng conflict ang inyong pagsasama. Maaga pa lang ay pag-usapan n’yo na ang kani-kanyang style tungkol sa paghawak ng pera.

Importante na maging masaya at healthy ang relationship, kaya’t sundin n’yo ang mga tips na ‘yan para maging masaya ang inyong pagsasama.

Kung sa tingin niyo, ka-BULGAR, helpful ang tips na ito, puwedeng-puwede n’yo itong i-share sa Facebook o ikuwento sa inyong loved ones! Okie?

Sure ka bang keri mo, besh? 5 bagay na dapat ikonsidera bago sumabak sa LDR

ni Mharose Almirañez | November 13, 2022

Kung may “Age doesn’t matter,” mayroon ding “Distance doesn’t matter”. ‘Yan ang karaniwang motto ng magkasintahang nasa long distance relationship o LDR, kung saan komunikasyon ang nag-iisa nilang sandigan.

Sabi nga nila, kailangan mong baunin ang napakaraming trust, faithfulness, loyalty, consistency, understanding and patience sa oras na pasukin mo ang LDR. Bawal dito ‘yung mahihina ang loob at puro overthink ang alam.

Bukod sa mga nabanggit, narito rin ang ilang bagay na kailangan mong ikonsidera kapag nasa long distance relationship ka:

1. LOVE LANGUAGE. Hindi naman sa pagiging negative, pero kung physical touch ang love language n’yo ay parang malabong maka-survive kayo sa LDR. Siyempre, paano n’yo mahahawakan ang isa’t isa kung sa screen lang kayo nagkikita? Mahirap namang magpaka-clingy kung limitado ang bawat galaw n’yo. But don’t worry, beshie, bukod sa physical touch ay may iba pa namang love language na puwedeng i-consider tulad ng words of affirmation, acts of service, receiving gifts and quality time.

2. INTERNET CONNECTION. Alam naman nating napakabagal ng internet sa ‘Pinas. Kahit mag-upgrade ka pa sa pinakamabilis at pinakamahal na plan ay hindi pa rin maiiwasang ma-disconnect ka sa internet. What if nasa kalagitnaan kayo ng pagtatalo at bigla kang nawalan ng internet, katapusan na rin ba ng relasyon n’yo? Siyempre, hindi mo naman puwedeng idahilan ang problema sa internet sa lahat ng oras.

3. ELEMENT OF SURPRISE. Hindi naman porke magkarelasyon na kayo ay mawawala na ‘yung element of surprise. Marapat lamang na surpresahin mo pa rin siya dahil isa ‘yun sa mga bagay na makakapagbigay ng kilig sa inyong relasyon. Halimbawa, sikreto kang uuwi sa ‘Pinas para bisitahin siya.

4. TIME DIFFERENCE. Para ito sa mga magkabilang mundo kung saan dito ay umaga at d’yan ay gabi. ‘Yung tipong, mag-aalmusal ka pa lang, pero siya ay maghahapunan na. Kumbaga, magkasalungat ang mga oras n’yo. Kaya ang tanong, kaya mo bang mapuyat sa kakahintay na mag-online siya? Nakahanda ka bang isakripisyo ‘yung mga oras na sana ay itinutulog mo, pero magdamag kang gising dahil sa mga oras na ‘yun mo lang siya puwedeng makausap?

5. HANGGANG KAILAN KAYO MAGIGING LDR? Ito ang pinakamalaking tanong na dapat n’yong masagot, sapagkat hindi kayo puwedeng mag-LDR habambuhay. Kahit pa sabihing nakasanayan n’yo na ang ganyang setup, mahirap pa rin kung wala kayong planong i-upgrade ang inyong relationship into next level. Mainam ‘yung mayroon kang pangakong pinanghahawakan. Baka kasi naghihintay ka lang pala sa wala.

“Absence makes the heart grow fonder,” ‘ika nga. Gayunman, huwag kang masyadong magpa-miss sa iyong karelasyon, dahil the more na nagpapa-miss ka ay mas marami kang nami-miss sa kanya. Ayaw mo naman sigurong ma-miss ‘yung panahong ikaw pa ang mahal niya, ‘di ba?

Alam nating challenging ang LDR, lalo na kung sa ibang bansa nakadestino ang iyong dyowa. Kaya kung gusto mo talagang mag-work ang inyong relasyon ay ikaw na ang umiwas sa temptasyon. Lumayo ka sa tukso at huwag kang magpadala sa panandaliang aliw.

As much as possible, gumawa ka ng paraan para ma-maintain ang inyong komunikasyon. Maging consistent ka sa pagpapakilig at pagiging loyal sa kanya dahil at the end of the day, relasyon n’yo ang nakasalalay rito.

Okie?

Kering-keri dahil sa socmed… Paano malalaman na single na ang isang tao?

ni Mharose Almirañez | October 21, 2022

Naaalala n’yo pa ba kung paano umingay sa social media ang isyu tungkol sa hiwalayang Carla-Tom, LJ-Paolo, Kylie-Aljur at iba pang celebrity couple? Eh ang usap-usapang hiwalay na rin sina Heart Evangelista at Chiz Escudero dahil tinanggal na ng aktres ang apelyido ng senador sa kanyang Instagram?

Ganyan kabilis kumalat ang tsismis. Palibhasa, modern era na tayo, kaya high-tech na rin ang paraan ng break up. Ito ‘yung panahon kung saan puwede nang magka-access sa ‘yong private life ang kahit sino sa pamamagitan lamang ng pang-i-stalk sa ‘yong social media profile. Mapa-showbiz o non-showbiz personality ka man, mayroon kang online friends and followers na palaging nakaantabay sa bawat update sa iyong timeline. Kaya cryptic post man ‘yan, nadi-distinguish agad ng mga ‘Marites’ na tambay sa social media ang iyong pinagdadaanan—partikular sa ‘yong love life, sa pamamagitan lamang ng mga sumusunod na signs:

1. ‘PAG NAG-DEACTIVATE KA NG ACCOUNT. ‘Yung tipong, hindi ka naman low-key person, pero bigla kang naging invisible sa social media. Let’s say, Facebook friend tayo, tapos nag-deactivate ka, rito na magsisimula ‘yung mga haka-hakang nasa healing process ka.

2. ‘PAG NAGPALIT NG ITIM NA PROFILE PICTURE. Karamihan sa naka-itim na profile picture ay mga namatayan ng kamag-anak at nasa stage ng pagluluksa. Mayroon din namang ilan na gumagamit nito upang ipaalam sa kanyang friends and followers na something bad is going on.

3. ‘PAG NAGPAIKLI NG BUHOK. Very common ito sa kababaihan. ‘Yung tipong, ipe-flex pa nila ang pagpapagupit sa kanilang ‘my day’ o Instagram stories. Ginagawa ito by showing that they’re cutting ties over someone.

4. ‘PAG IN-UPDATE MO ANG IYONG PROFILE WITHOUT ANY TRACE OF HIM/HER. Halimbawa, mula sa public status na “in a relationship” ka sa kanya, tapos bigla mo itong ini-hide sa iyong profile. Puwede ring, kapag hindi mo na siya isinama sa iyong bio.

5. ‘PAG PURO MEMES O HUGOT NA ANG TIMELINE. Kung noon ay puro tag, mention or picture n’yo ng bebe mo ang laman ng iyong timeline, ngayon ay natabunan na ‘yun ng memes and cryptic posts.

6. ‘PAG BURADO NA ANG PICTURES NIYA. Kumbaga, hindi mo na siya pini-feature sa iyong story highlights. Naka-hide na rin maging ang mga picture niya at picture n’yo sa iyong account.

7. MAY PAG-UNFOLLOW/UNFRIEND NA NAGAGANAP. Madali lamang makumpirma kung friends pa n’yo ang isa’t isa sa pamamagitan ng search box, kaya mag-ingat sa mga Marites na walang ibang ginawa kundi abangan kung kailan kayo magbe-break. Typical movement ang pag-a-unfollow sa mga artista, kaya kung sinimulan mo nang i-unfollow ang iyong karelasyon, naku, gets na nila ‘yan!

8. ‘PAG MADALAS NANG MAG-CHAT SA GC. Samantalang dati, hindi mo man lang magawang mag-seen at magbasa sa inyong group chat dahil puro ka ‘bebe time’. Pero ngayon, ang ingay-ingay mo na at ikaw na itong madalas mag-open ng topic. ‘Yung tipong, nagyayaya ka na ring gumala at mag-inom, kaya obvious na hindi ka okey.

9. ‘PAG NAGSIMULA NANG MAG-SELF LOVE. Finally, pala-post ka na ulit ng selfie, travel, food at inspirational quotes with the #Selflove. ‘Yun bang, positive outlook ka, pero para kang palaging may gustong patamaan at patunayan sa mga post mo.

10. ‘PAG NAGING ACTIVE KA NA ULIT SA DATING APP. Kung dati kang suki ng online dating, heto nga’t nagsisimula ka nang magbalik-loob. Searching for bagong trauma o rebound ang bago mong peg.

Minsan, may mga relasyong hindi pa naman talaga tapos, pero tuluyan nang natatapos dahil sa pangunguna ng mga taong nakapaligid sa inyo. ‘Yung tipong, kahit gusto mo pang ayusin ay lalo lamang nasisira dahil sa pakikisali o pakikisawsaw ng mga taong palaging may sey sa inyong relasyon.

Kaya naman sa susunod na makikipagrelasyon ka, mainam kung magpaka-low-key kayo. Huwag mong i-post ang bawat ganap sa inyong relasyon upang maging clueless sila. Hindi naman kasi porke hindi mo pine-flex sa socmed ang iyong dyowa ay hindi mo siya mahal o hindi ka proud sa kanya. Magkaiba kasi ‘yung private sa secret relationship.

Okie?