Alamin: Kung paano ipinapakita ng aso ang kanilang pagmamahal

ni Jenny Rose Albason @Gulat Ka 'No?! | September 1, 2023

Bilang isang dog owner, handa nating gawin ang lahat para sa ating mga alagang aso. Katulad na laman ng pagbanggon sa umaga para lang sila ay ipasyal, pagpapatawad matapos nilang sirain ang ating paboritong tsinelas at marami pang iba.

Ang ilan ay naniniwala sa kasabihang ang mga aso ay ang isang “man’s bestfriend” pero ang tanong na gustong malaman ng lahat, mahal din kaya tayo ng ating mga alagang aso? Kung oo, paano natin ito malalaman? Simple lang, dahil sa artikulong ito malalaman na rin natin ang mga sign na mahal ka ng iyong alagang aso nang higit pa sa sarili nilang buhay. Halina’t isa-isahin na natin ‘to!

1. MASAYA SILA T’WING NAKIKITA KA. Kadalasan sa mga aso t’wing nakikita nila ang kanilang mga amo ay labis ang kanilang galak. Biruin mo ‘yun, ‘yung simpleng pagtahol at pagtalon ay isang na rin pala kung paano nila maipapakita ang kanilang pagmamahal sa iyo.

2. PAGBIBIGAY SA IYO NG REGALO. Tuwing inaabutan nila tayo ng kanilang paboritong laruan ang buong akala natin ay nais nilang makipaglaro, ngunit kadalasan, binibigay nila ito bilang isang regalo. Gusto nilang i-share ang kanilang paboritong gamit sa mga taong mahal nila.

3. GUSTO KANG MAKATABI MATULOG. Ang mga aso ay likas na alerto sa mga banta na maaaring mangyari sa ating kapaligiran. Kaya mas nais nilang tumabi sa ating pagtulog ay dahil sa tingin nila ligtas sila sa kapahamakan tuwing katabi nila tayo.

4. WALANG PAKIALAM SA HITSURA MO. Kung nilalambing ka pa rin ng iyong alagang aso kahit na mabaho ang iyong hininga sa umaga, pawis na pawis sa pag-e-ehersisyo, kahit magulo ang iyong buhok, at haggard, malamang na ito ay isang senyales na mahal talaga tayo ng ating mga alagang aso.

5. SINUSUNDAN KA. Consider yourself loved kung sa tingin mo ay hindi ka makagawa ng isang hakbang nang wala ang iyong alagang aso. Ang mga aso ay laging nakabuntot sa iyo nang higit pa sa seguridad. Mas gusto nilang makasama ka kaysa sa ibang tao.

Knows n’yo rin ba mga ka-BULGAR na ang brain activity ng mga aso ay tumataas kapag nakakarinig sila ng masasayang tunog, tulad ng mga papuri. Ang pag-aaral na ito ay nagpapakita rin kung paano binibigyang-kahulugan ng mga aso at kanilang mga amo.

Samantala, ang mga aso ay may kakayahan na makita ang mga pagbabago sa boses at kilos ng tao. Kaya naman, sa lahat ng hayop sa mundo, ang mga aso ang itinuturing nating ‘best friend’ hindi ba?

Practical money tips para sa bagong kasal

ni Jenny Rose Albason @Gulat Ka 'No?! | August 12, 2023

Kung ikaw ay bagong kasal, ikaw at ang iyong asawa ay magiging isa na lang ang aspeto sa buhay, kabilang dito ang inyong finances. Ibig sabihin, maghahati na kayong dalawa sa inyong suweldo, gastusin, ari-arian at pananagutan.

Magandang ideya rin na pag-usapan n’yo ang inyong plano pagdating sa financial bilang mag-asawa. Mas mainam kasi na pag-usapan ang mga bagay-bagay lalo na sa usaping pera dahil isa ito sa pinagmumulan ng hindi pagkakasundo.

Bagama’t ang household finances ay hindi romantic na usapin, isa pa rin ito sa dapat na talakayin, upang mai-plano ng mahusay kung paano mababayaran ang bills hanggang sa pagma-manage ng inyong ipon, malaking tulong din ito para sa inyong future plans.

Narito ang 5 practical money tips na maaari n’yong isaalang-alang.

1. MAS MAIGING BUMILI NG SECONDHAND ITEMS. Kapag lumipat na kayo ng bahay, totoong nakakaakit bumili ng mga brand new na gamit upang welcome rin sa inyong bagong buhay bilang mag-asawa. Gayunman, ang pagbili ng mga bagong appliances upang mag-match sa inyong bagong tahanan ay maaaring maging magastos. Unless, kung kayong dalawa ay may budget sa pagbili ng mga brand new, puwede n’yo ring i-consider ang pagkuha ng mga secondhand items. Makakatulong ito upang makatipid at mapanatili pa ring maganda ang inyong tahanan.

Bukod pa rito, ang pagbili ng secondhand ay isang mahusay na paraan upang maka-discover ng mga de-kalidad na item sa mas mababang presyo. Maaari ka ring makakita ng second hand na sofa o dining set na nasa good condition pa rin.

2. GUMAWA NG JOINT ACCOUNT. Ang pagkakaroon ng joint account lalo na sa mga gastusin sa bahay ay makakatulong upang mamonitor ang lumalabas at pumapasok sa inyong pera. Maaari n’yo rin itong gamitin bilang central fund upang bayaran ang inyong common household expenses tulad ng pagkain, renta, utility bills, atbp. Ang pag-share ng joint account ay magbibigay-daan sa inyong dalawa na maaccess ang pera sakalaing magkaroon ng emergency.

3. PAG-USAPAN KUNG SINO ANG MAGBABAYAD. Kung mayroon kayong two-income household, siguraduhing tukuyin ang inyong monthly contributions para sa bahay.

Maaari n’yo ring pag-usapan kung magkano ang ibibigay mo sa inyong joint account kada buwan, gayundin kung magkano ang inyong gagastusin, iipunin, o i-invest. May ilang mag-asawa na naka-assign kung sino ang magma-manage ng pang-araw-araw na gastusin. Ang isa ay maaaring naka-assign sa pagkain, utilities, at transportation, habang ang isa ay maaaring naka-task sa pagbibigay ng kontribusyon pagdating sa household insurance, retirement funds at investment.

4. GUMAWA NG EMERGENCY FUND. It’s never too early para mag-set up ng emergency fund, siguradong hindi mo pagsisisihan na gawin ito. Ang emergency fund ay isang reserbang pera na iyong itinabi sakaling may hindi inaasahang pangyayari, tulad ng health emergency, home repair emergency, o matanggal sa trabaho.

Kapag kinokonsidera kung magkano ang iyong monthly budget na ilalaan sa iyong emergency fund, maaari mong sundin ang tipikal na rekomendasyon, magtabi ng hindi bababa sa 6 months na living expenses. Para nagawa mo ito, kakailanganin mong magtabi ng 10% ng iyong gross income kada buwan, at kailangan mong patuloy na mag-ipon hanggang makuha mo ang halagang kailangan mo, o mas higit pa.

Kung gusto mong tiyaking regular kang naglalagay ng pera sa iyong emergency fund, maaari kang mag-set up ng isang automatic transfer sa iyong bangko o makipagpalitan sa iyong asawa na maglagay ng pera sa account kada buwan. Kung nais mong magsimulang gumawa ng emergency fund, maaari mo itong dahan-dahaning palaguin sa paglipas ng panahon, na magbibigay sa iyo ng peace of mind sakaling maka-encounter ka ng hindi inaasahang problema.

5. I-UPDATE ANG ACCOUNTS. Maraming newlyweds ang lumipat ng bagong tahanan matapos ikasal. Kung mayroon ka ring ganitong arrangement, tiyaking i-notify ang iyong banks, credit card, companies, insurance companies, at investment companies na mayroon kang account na babaguhin ang iyong address o contact information.

Kailangan mo ring ipaalam sa mga intitusyong tungkol sa iyong pagpapalit ng marital status dahil ang union ay magkakaroon ng kaugnayan sa iyong legal entitlements sa mga financial assets at estates ng isa’t isa.

Pagdating sa pag-manage ng pera, nasa inyo bilang mag-asawa kung ano ang pinakamahusay na paraan ang sa tingin n’yong mas okey. Gayunman, kung naghahanap ka ng mga time-tested advice, tiyaking i-consider ang mga nabanggit na tips.

Makakatulong ito para sa inyong bagong buhay bilang mag-asawa, at makakatulong din ito para sa inyong future. Gets??

Alagang pusa, pinamanahan ng P1.3 bilyon ng amo

ni Jenny Rose Albason @Gulat Ka 'No?! | August 11, 2023

Kadalasan kapag ang isang tao ay pumanaw, iniiwan nila ang anumang ari-arian na kanilang naipon para sa kanilang mga kaanak.

Ngunit ibahin natin si Ben Rea ng U.K at ang kanyang pinakamamahal na alagang pusa na si Blackie.

Nang namatay si Ben Rea, isang milyonaryo at antique dealer noong 1988, iniwanan nito si Blackie ng £7 milyon.

Ang katumbas nito ngayon ay nagkakahalaga ng nasa £18.5 milyon o P1.3B.

Dahil sa pamanang ito ay opisyal na itinuring si Blackie bilang pinakamayamang pusa sa buong mundo, na hanggang ngayon ay wala pa ring nakakatalo.

Ang amo ni Blackie na si Ben ay kumikita ng milyones sa pamamagitan ng pagbili at pagbebenta ng mga antique, na nagbigay-daan sa kanya upang bigyan ang kanyang mga pusa ng karangyaan na sa tingin niya ay nararapat lang sa kanila.

At si Blackie, ang huling nabuhay sa 15 na pusa sa mansyon ni Ben sa Dorney, Buckinghamshire, ang nagmana ng pera.

Si Ben ay may pamilya, ngunit siya ay nabuhay nang mag-isa at tumangging kilalanin ang kanyang sariling pamilya ayon na rin sa kanyang kagustuhan.

Sa halip, karamihan sa kanyang pera ay nahati sa tatlong cat charities kasama ang kanyang habilin na alagaan ang kanyang mga alaga hanggang sa kanyang huling araw.

Pinamanahan din ni Ben ng maliit na halaga ang kanyang hardinero at mekaniko.

Hindi lamang si Blackie ang ‘mayamang’ pusa r’yan. May mga ilang sikat na pusa rin sa internet ang nagkakahalaga ng milyun-milyon, tulad ng pusa ni Taylor Swift na si Olivia Benson at internet sensation na si Grumpy Cat.

Pero technically, ang pera ni Ben ay habambuhay nang nakatali kay Blackie, samantalang ang mga charity ay hindi makatanggap ng pondo maliban na lang kung sila ay sumang-ayon na pangalagaan si Blackie.

Ilang araw bago ang malungkot na pagpanaw ni Ben, pumanaw din ang kanyang kapatid na babae at nag-iwan ng £2 milyon sa mga animal charity.

Sino ba naman ang hindi maaantig sa kuwentong ito? 'Ika nga nila “a dog is a man’s bestfriend”, pero napatunayan natin sa kuwento ni Ben na hindi lang aso ang maituturing nating bestfriend, puwede ring pusa o kung anumang uri ng hayop ang ating alaga.

Okey lang kahit hindi pera ang isukli natin sa ating mga alaga, alagaan lang natin silang mabuti at mahalin tiyak na susuklian naman nila tayo ng walang katumbas na pagmamahal at saya.