Ina, pinatos ang pagiging kabit para makapagbayad sa utang

ni Sister Isabel del Mundo - @Mga kuwento ng buhay at pag-ibig | Pebrero 6, 2024

Dear Sister Isabel,

Bago ko simulan ang kuwento ng aking buhay, babatiin ko muna kayo ng isang mapagpalang araw.

Isa akong tindera sa palengke, at ang aking tinitinda ay mga gulay. Noong una, kumikita naman ako, pero nitong huli ay halos wala akong kitain. 

Hiwalay na ako sa aking asawa at may 2 kaming anak. Nabaon ako sa utang, at hindi ko na nababayaran ang puhunang inutang ko, maski sa bumbay ay nabaon na rin ako. Hirap na hirap na ako, at gusto ko na lamang wakasan ang aking buhay. 

Sinisingil na rin ako ng mga kapatid ko, kahit alam naman nilang wala na akong kinikita sa gulay. Hanggang sa isang araw, may nakilala akong lalaki, naawa siya sa akin, kaya tinulungan niya akong makabayad sa mga pinagkakautangan ko, ngunit sa isang kondisyon at ‘yun ay ang paglingkuran siya. 

Kaya lang, may sarili na rin siyang pamilya. Napakabait niya sa akin kaya nahulog din agad ang loob ko sa kanya. Masaya kami pag kami ay magkasama. Okey lang sa akin kahit hindi 100% ang atensyong binibigay niya sa akin. 

Nauunawaan ko na nakikihati lang ako ng pagmamahal sa tunay niyang asawa’t anak. Minsan nga ay nakokonsensya na ako dahil may sariling pamilya ang lalaking pinatulan ko. Sumagi na rin sa aking isip na putulin na ang aming relasyon, ngunit ayaw niyang pumayag. Mahal na mahal niya umano ako at ikamamatay niya kapag nawala ako sa buhay niya. Ano kaya ang marapat kong gawin? Mahal ko siya at mahal niya rin ako. Sister Isabel, putulin ko na kaya ng lubusan ang pakikipagrelasyon sa kanya?

Nawa’y mapayuhan n’yo  ko sa dapat kong gawin.

Nagpapasalamat,

Imelda ng Laguna

Sa iyo, Imelda,

Umpisa palang ay alam mo na sa iyong sarili na bawal na pag-ibig ang papasukin mo, pero ipinagpatuloy mo pa rin hanggang sa tuluyan ka tuloy nahulog. Gayunman, kasalanang mortal pa rin ang iyong pinasok. Kung sa ngayon, ayos ang ugnayan n’yo, darating at darating ang mga araw na magiging magulo ang sitwasyon at malamang sa bilangguan kayo humantong. 

Posible kayong kasuhan ng tunay niyang asawa at tiyak na hindi n’yo maiiwasang maparusahan ng hukuman. Kaya ang maipapayo ko sa iyo ay layuan mo na ang lalaking iyan bago pa mahuli ang lahat. 

Umiwas ka na hangga’t maaga pa. Tutal wala ka naman ng utang. Magbagong buhay ka na dahil may mga tumutulong naman sa katulad mong solo parent.

Hanggang dito na lang, hangad ko ang mapayapa, maligaya at masaganang pamumuhay mo sa piling ng iyong mga anak. Pagpalain ka nawa ng Diyos.

Sumasaiyo,

Sister Isabel del Mundo

Gayuma (43)

ni Maria Angela Gonzales @Kuwentong Pag-Ibig | Pebrero 5, 2024

Habang nagmamartsa si Princess palapit kay Gabriel, namamayani pa rin ang takot sa kanyang dibdib.

Feel niya, anumang sandali ay mayroong sisigaw na "itigil ang kasal". Tiyak kasi niyang hindi pa nakaka-move on sina Baninay at Glaiza. Pakiramdam niya, anumang oras ay darating ang mga ito at guguluhin ang kanyang kasal.

Ngunit, walang pa rin ang mga ‘mang-aagaw’. Ang nakikiusyoso ay ang mga showbiz reporters na nakatunog sa kanilang kasal. Hindi nila ipinagsabi ang kanilang kasal, pero mayroon pa rin talagang nakaalam. Talaga ngang may tenga ang lupa, may pakpak ang balita. 

Mula sa malayo, nakangisi si Baninay, paano ba namang hindi siya masisiyahan, eh sa sandaling magpakasal sina Gabriel at Princess, babalik na siya sa kanyang katawan at magiging maligaya na sila ni Gabriel habambuhay. 

“I do,” wika nina Gabriel at Princess. 

Doon ay nakaramdam ang dalaga ng panlalamig. Pakiramdam niya, may ipu-ipo na lumalapit sa kanya para siya'y tangayin. Hindi niya napigilan ang mapatili dahil talaga ngang umangat siya sa lupa. 

Samantalang hindi napigilan ni Princess na makaramdam ng takot. Matapos kasing maglapat ang kanilang labi ni Gabriel at ideklara ng pari na sila’y mag-asawa na ay may kakaiba siyang naramdaman. Pakiwari niya ay gusto siyang liparin ng hangin. Mabuti na lang at niyakap siya ni Gabriel kaya hindi siya natangay. 

“Princess?”

Nakangiting bigkas ni Gabriel. Ngunit ang dalaga ay nabalot ng kalungkutan. Batid niya kasing hindi na ang Princess na minahal nito ang nakikita ni Gabriel. 

“Bumalik na ang iyong hitsura,” wika nito. 

“Ano?” 

Ang mga tao sa paligid ay nagbubulungan na para bang hindi makapaniwala sa nangyari. Maski siya ay ganundin, hindi siya makapaniwala sa kanyang nakita. 

Tama nga ang sinabi ng matanda sa kanyang panaginip? Sabi kasi nito, babalik lamang ang kanyang hitsura kung mababasbasan na ang pagmamahalan nila ni Gabriel at nangyari nga iyon. Dahil mas nangibabaw ang kanilang pag-iibigan. 

Wakas.

Gayuma (42)

ni Maria Angela Gonzales @Kuwentong Pag-Ibig | Pebrero 4, 2024

Natigilan sa pag-iimpake si Princess nang biglang bumukas ang pinto ng kanyang silid. 

Dahil sa pagbabago ng kanyang hitsura, nag-stay muna siya sa kanyang condo. Hindi rin kasi niya tiyak kung gusto nga ba siyang makasama ng kanyang magulang o baka naman masyado na itong naaalibadbaran sa kanyang mukha. 

“Ano ang ibig sabihin nito?” Gulat na tanong ni Gabriel. 

Saglit lang niya ito tinapunan ng tingin at sabay impake. Mahal na mahal niya si Gabriel at hindi niya alam kung hanggang kailan ito mananatili sa kanyang puso.  

“Aalis na ako.” 

“Iiwan mo na ako?” Hindi makapaniwalang tanong ng binata. 

“Palalayain na kita, para lumigaya ka na.” 

“Paano pa ‘ko liligaya, kung tuluyan mo na kong iiwan?”

“Si Glaiza ang tunay mong mahal, hindi ba?”

“At sinong nagsabi n’yan?” Manghang tanong nito. 

“Hindi ba totoo?”

“Hindi! Wala akong ibang minahal, kundi ikaw lamang.”

'Yun ang salitang nais na marinig ni Princess, kaya naman gilalas siyang napatingin dito. 

“Pero, si Glaiza ang mahal mo, bago kita gayumahin.”

“Sorry.”

Sa winika nito, parang nilamutak ang kanyang puso.

“Hindi mo kailangan mag-sorry. Mas malaki ang kasalanan ko sa’yo.”

“Hindi tatalab ang gayuma mo, kung wala akong pagmamahal sa’yo,” mariing sabi nito sa kanya.

Ang una tuloy niyang naisip ay gigil ito sa ginawa niyang panggagayuma, pero nang ulit-ulitin niya ang sinabi ng kanyang nobyo, namilog ang kanyang mga mata at sabay sabing, “Talaga? Mahal mo ako?” 

“Yes,” sagot ng binata sabay yakap at halik sa dalaga.

Tatapusin…