Dapat gawin ng 16-anyos na nabuntis ni klasmeyt

ni Sister Isabel del Mundo - @Mga kuwento ng buhay at pag-ibig | Pebrero 16, 2024

Dear Sister Isabel,

Kumusta kayo? Nawa’y nasa mabuti kayong kalagayan. Sumangguni ako dahil hindi ko na kaya ang problema ko.

16-anyos pa lang ako at nabuntis ako ng classmate ko na kasing edad ko lang din. Pakiramdam ko ay malapit na mabuking ng parents ko ang aking pagbubuntis. Kapag nalaman ito ng daddy ko, tiyak na papatayin niya ako. Siya ang klase ng tatay na sobrang higpit at paulit-ulit niya akong sinasabihan na mag-aral nang mabuti. 

Samantala, ‘yung lalaking nakabuntis sa akin ay ‘di ko na mahagilap, ‘di ko na alam ang gagawin ko. 

Sumagi rin sa isip ko na ipalaglag ang bata sa sinapupunan ko at mag-suicide, pero hindi ko ito magawa.

Tulungan n’yo ako, Sister Isabel. Ano ba ang dapat kong gawin? 

Umaasa,

Thelma ng Bataan

Sa iyo, Thelma,

Ang pinakamaganda mong gawin ay ipagtapat sa mommy mo ang kalagayan mo, sa umpisa siyempre mabibigla at magagalit siya sa iyo, pero tutulungan ka niya at uunawain.  Ihanda mo na ang sarili mo. Lakasan mo ang iyong loob, kausapin mo na ngayon ang mommy mo. Siya ang makakaunawa sa iyo ngayon, at siya na rin gagawa ng paraan para kausapin ang daddy mo. Gagawin niya ang lahat para 'di magalit nang husto ang daddy mo. 

Anuman ang pasya ng mommy mo, sundin mo na lang. Batid kong gagabayan siya ng Diyos, at sana matuto kang sumunod sa pangaral ng daddy mo. Huwag kang gumaya sa ibang kabataan ngayon na padalus-dalos.

Magsilbing aral nawa sa iyo ang sinapit mo ngayon. Hanggang dito na lang, lakip nito ang dalangin na mairaos mo ng maluwalhati ang baby mo at nawa'y maging aliw siya sa buhay ng mommy at daddy mo. Kakaibang saya ang dulot ng apo sa mga lolo't lola.

Ganyan sana ang mangyari para agad kang matanggap ng parents mo.

Sumasaiyo,

Sister Isabel del Mundo

Bilyonaryong Mafia ang Mahal Ko (8)

ni Maria Angela Gonzales @Kuwentong Pag-Ibig | Pebrero 16, 2024

“Gusto mong pakasalan kita?” Naniniguradong tanong ni Via sa lalaking hindi niya alam ang pangalan. 

“Yes,” nakangising sagot nito.

“Why?”

“Para mabayaran mo utang ng ama-amahan mo.”

Sa pagkakatitig niya sa lalaki, parang nakikita niya roon ang kanyang Tatay Pedro, ngunit ipinilig niya ang kanyang ulo. Nakatitiyak naman kasi siyang hindi ito magkaanu-ano.

“Paano ka nakakasiguro?” Tanong niya sa kanyang sarili. 

Bahagya siyang umiling dahil hindi naman niya talaga alam ang sagot, at hindi rin niya ganu’n kakilala ang kanyang Tatay Pedro. Basta ang alam niya, bigla na lamang itong dumating sa buhay nilang mag-ina noong 8-anyos siya.

“Wala ka ng ibang pagpipilian kundi sumang-ayon. Kunsabagay, maaari ko pa namang makuha ang bahay at lupa n’yo.”

“Huwag.”

“Kung ayaw mong kunin ko ang bahay n’yo bilang kabayaran sa utang ng tatay mo, magpakasal ka sa akin,” matapang nitong sabi sa nakakapangilabot na tinig.

Noon, laging pinapaalala ng ina ni Via sa kanya na, huwag niya umanong papabayaan ang kanilang bahay. Tanging ito lang daw kasi ang maipapamana nito sa kanya at sa kanyang magiging apo. 

“Pag-ibig ang dahilan kaya nagpapakasal ang dalawang tao. Hindi natin mahal ang isa’t isa. Kaya bakit ako magpapakasal sa’yo?” Naghahamong tanong niya rito, at dito na nagsimulang uminit ang kanyang ulo.

“Hindi ko na kailangan pang sabihin sa’yo ang dahilan kung bakit, pero kung tatanggihan mo ang alok kong kasal, hindi naman kita pipilitin. Kaya lang mapapahamak ang ama mo.”

“Papatay ka dahil sa pera?” 

Sa halip na sagutin siya nito, halakhak na nakapangingilabot ang pinawalan ng lalaki. Pakiwari niya tuloy ay kamatayan ang sasapitin ng kanyang stepfather kapag hindi siya pumayag sa gusto nito.

“Kung sa tingin mo ganyan ako kasama, may pagpipilian ka pa ba?” Nakangisi nitong tanong sa kanya na para bang sinasabing magagawa nga nito ang kanyang hinala at hindi niya iyon hahayaan.

Ngunit, may magagawa ba siya kung buhay ng stepfather niya ang kapalit?

Itutuloy…

Bilyonaryong Mafia ang Mahal Ko (7)

ni Maria Angela Gonzales @Kuwentong Pag-Ibig | Pebrero 14, 2024

“Ano'ng pag-uusapan natin?” 

Natigilan si Via sa pagtatanong ng binata. Ang lapad kasi ng pagkakangiti nito sa kanya at para bang nagpapahiwatig na isa itong mabuting tao. 

“Mabuting tao?” Sarkastikong tanong niya sa kanyang sarili. Bigla niya kasing naalala ang dahilan kung bakit siya naroon. Kailangan niya itong komprontahin dahil bina-blackmail nito ang kanyang stepfather. 

“Babayaran ko ang utang ng tatay ko,” mariin niyang sabi pagkaraan. 

“Cash? Paalala ko lang sa iyo, anim na milyon ang utang niya.”

“Limang milyon lang, hindi ba?”

“Hangga’t hindi niya nababayaran ang kanyang inutang, tutubo ito nang tutubo.”

Kahit tuloy nag-aalala siya sa kanyang ama-amahan, biglang naningkit ang kanyang mga mata sa pagkakatingin niya rito. “Yung limang milyon nga hindi niya mabayaran, tapos dadagdagan mo pa? Para kang sira…” inis niyang sabi pero bigla siyang natigilan. 

Hindi naman kasi niya ito kilala kaya bigla siyang nag-alala na baka patulan siya nito. 

Hindi niya napigilan ang mapasinghap nang maalala niyang nasa opisina nga pala siya nito. Kung gugustuhin nitong sampalin siya ay madali lang magagawa ng binata. Paano kung bigla na lang siya nitong halayin?

Naningkit bigla ang kanyang mata nang maalala niya ang sinabi ng kanyang Tatay Pedro, na siya umano ang hinihingi nitong kabayaran. 

“Hindi ako for sale.”

“What?” 

“Sabi ng Tatay Pedro, ako raw ang hinihingi mong kabayaran.”

“That’s true.”

“Hindi ko ibinibenta ang sarili ko sa kahit na sinong lalaki. Babayaran ko lang ang utang ng tatay ko, buwan-buwan, walang tubo. Two thousand monthly.”

“At sa palagay mo kailan ka matatapos magbayad?”

Bigla siyang natigilan. Sa tingin niya kahit na pumuti na ang kanyang buhok hindi pa rin niya iyon mababayaran. 

“Pero, hindi ko gusto ibigay ang virginity ko sa’yo”

“Marry me,” buong diing sabi nito na nagpa-nganga sa kanya. 

Itutuloy…