Misis, asar sa mister na immature

ni Sister Isabel del Mundo - @Mga kuwento ng buhay at pag-ibig | Pebrero 18, 2024

Dear Sister Isabel,

Ang problema ko ngayon ay tungkol sa aking asawa. Mabait at masipag naman siya, kaya lang hindi siya romantiko sa amin ng anak niya. 

Mas madami pa nga ang oras niya sa kaibigan niya. Isa rin siyang mama's boy, lumalaki na ang anak namin, ngunit wala pa rin siyang pagbabago. 

Malapit na akong mapuno, at gusto ko na siyang hiwalayan. 

Sa tuwing ino-open up ko ang aming problema, nauuwi lang ito sa pagtatalo.

Ano ang dapat kong gawin sa asawa ko? Paano ko kaya mababago ang pagiging immature niya? Limang taon ang agwat ng edad namin, 30-anyos siya habang 35-anyos naman ako.

Sana ay matulungan n'yo ko.

Nagpapasalamat,

Pauline ng Bulacan

Sa iyo, Pauline,

Nariyan na 'yan. Harapin mo ang ugali ng asawa mo, at habaan mo pa ang pasensya mo. 

Tutal ang sabi mo, mabait at masipag naman siya.  Nakukulangan ka lang sa ugali niya dahil hindi siya showy. Baka naman nakukulangan din siya sa iyo, kaya ganun? Lambingin at huwag mo siyang awayin. Habang magkatabi kayo sa kama, kausapin mo siya. Ipaunawa mo na hindi na siya bata, may pamilya na siya na nangangailangan ng kanyang atensyon at malalim na pagmamahal. 

Kulang lang din siguro siya sa pansin, baka lagi kang busy sa buong maghapon kaya hanggang ngayon ay doon siya nakikipag-bonding sa kanyang kaibigan.

Huwag mong isisi sa kanya ang lahat. Sa palagay ko ay may pagkukulang ka rin. Kapag day-off niya yayain mo rin siyang mamasyal, mag-picnic kayo, magluto ka ng paborito niyang pagkain at maglambing-lambingan naman kayo. 

Makikita mo, unti unti nang magbabago ang asawa mo. Kulang lang sa pansin iyan. Samahan mo na rin ng dasal, hilingin mo sa Diyos Ama na baguhin ang ugali ng asawa mo. Sa palagay ko, diringgin din ng Diyos ang dasal mo. 

Sumasaiyo,

Sister Isabel del Mundo

Bilyonaryong Mafia ang Mahal Ko (10)

ni Maria Angela Gonzales @Kuwentong Pag-Ibig | Pebrero 18, 2024

Hindi alam ni Pedro kung bakit siya kinabahan nang ipagtapat ni Via sa kanya na pumayag na itong pakasalan si Nhel Zamora.

Ang ex niya kasing si Alicia Zamora ang agad na pumasok sa kanyang isipan. Hindi rin niya alam kung bakit may kaba siyang naramdaman nang titigan siya ng binata. Alam niyang malaki ang pagkakautang niya rito, pero matindi ang talim ng pagkakatingin nito sa kanya, at para bang gusto siyang sakalin. Nagsakripisyo si Via para sa kanya, ang tanging mahihiling na lang niya ay mauwi sa pagmamahalan ang dalawa. Pero, talagang hindi siya mapakali.

Para tuloy gusto niyang tanungin kung kaanu-ano ng binata si Alicia, pero biglang nagbago ang kanyang isip. Marahil dahil natatakot siya sa maaaring isagot nito.

Marahas na buntong hininga ang kanyang pinawalan. Hindi niya maintindihan ang kanyang sarili. 

“We’re leaving,” buong diing sabi ni Nhel Zamora.

“Saan tayo pupunta?” Pagtatanong naman ni Via.

“Sweetheart, mag-asawa na tayo kaya dapat lang na sumama ka na sa akin.”

“Ingatan mo ang anak ko ha?”

“Sinong anak?” Kunwa'y tanong nito sa kanya. 

“Si Via.” 

“Napakasuwerte talaga ng asawa ko, mahal na mahal ka ng iyong Tatay Pedro.”

Kumunot ang kanyang noo dahil sarcasm ang naaaninag niya sa tono nito.

“Aalis na po kami,” wika naman ni Via.

“Tatay ko na rin naman kayo,” sambit nito, sabay yakap at bulong, “Hindi ka pumirma sa birth certificate ko, pero nagawa mong pirmahan ang birthday certificate ng peke n’yong anak.”

Noong una ay hindi niya maintindihan ang sinasabi nito, pero naalala na naman niya si Alicia Zamora.

Itutuloy…

Bilyonaryong Mafia ang Mahal Ko (9)

ni Maria Angela Gonzales @Kuwentong Pag-Ibig | Pebrero 17, 2024

“Hindi naman natin kailangan ikasal,”  nahagilap niyang tugon.

Para kasi sa kanya, ang kasal ay para lamang sa dalawang taong nagmamahalan. Hindi niya ito mahal at nakakatiyak siyang wala rin itong pagtinggin sa kanya.

“Mas gusto mo bang mag-angkin ako nang mang-angkin na walang pinanghahawakan?” Nanunubok na tanong ng binata. 

“Ang kasal ay para lamang sa mga taong nagmamahalan.”

Kesa na sumagot ito, halakhak ang ginawang tugon ng binata. Dapat sana ay mabuwisit ang dalaga sa pagtawa nito, pero hindi niya iyon nagawa dahil maski siya ay nasiyahan din sa pagkahalakhak ng binata, bigla niya ring napagtanto na guwapo pala ito at kamukhang-kamukha niya si Jake Cuenca. 

Sa kaisipang iyon ay ipinilig niya ang kanyang ulo. Kailangan niyang itaboy sa isipan ang ideyang guwapo ito dahil kahit na mukha pa itong artista, masamang tao pa rin ito. 

“Hindi 'yan mabuting tao!” Buong diin niyang sabi sa kanyang sarili. 

Hindi man siya tunay na anak ni Pedro Pedral, nakakasiguro naman siyang ayaw din nitong mapahamak siya.

Pero, kailangan din niyang gawin ang kanyang responsibilidad bilang anak, at iyon ay ang isalba ito sa kapahamakan na maaari nitong kaharapin. 

“Hindi na importante ang sinasabi mo.”

“Importante ang pag-ibig.”

“Pera ang importante! Kung wala kang pera 'di ka magiging maligaya.” 

“May pera ka nga, pero nananapak ka lang naman ng ibang tao. Paano ka nakakaramdam ng tuwa sa kasamaang ginagawa mo? ” Marami pa sana siyang gustong sabihin, pero nang mapatingin siya sa binata, ang talim ng tingin nito sa kanya at para bang gusto siyang tirisin.

“Pakakasalan mo ako o ipapakulong ko si Pero Pedral?” Gigil nitong tanong sa kanya.

Itutuloy…