Bilyonaryong Mafia ang Mahal Ko (12)

ni Maria Angela Gonzales @Kuwentong Pag-Ibig | Pebrero 20, 2024

Kumunot ang noo ni Via sa matapang na pagbigkas ni Nhel  Zamora.

“Kung makapagsalita ka naman, parang aalipinin mo ako nang bonggang-bongga,” natatawang sabi niya. 

Ayaw niyang isipin na may plano talaga ang binata sa kanya. Tingin naman kasi niya ay mabuting tao ito.

“Paano mo naisip iyon?” Natatawa niyang tanong sa kanyang sarili. 

“‘Yan talaga ang gusto kong gawin.”

“Ano’ng kasalanan ko?”

“May kaugnayan ka kay Pedro Pedral,” inis nitong sabi.

“Kung magsalita ka naman parang hindi lang pangungutang ni Tatay Pedro ang kasalanan niya sa’yo,” wika niya na may halong pagtataka.

Kesa na sumagot, halakhak ang ginawang tugon ng Binata. Dapat sana ay makaramdam siya ng inis dahil parang pinagtatawanan siya nito, pero nagbago ang kanyang isip. Bumuka ang bibig niya para magtanong, ngunit bigla siyang natigilan. May napansin kasi siya sa mukha nito. 

“May hawig ka kay Tatay Pedro.”

Ngunit, muli na namang tumawa ang binata. 

“Ano bang nakakatawa?”

“He is my father.”

“Ano?!” Gilalas niyang tanong.

“Kung hindi ka nakakaintindi ng Ingles puwes Tatagalugin ko, ama ko si Pedro Pedral. Kaya ako nabubuwisit sa’yo, minahal ka niya nang husto gayung ang tunay niyang anak pinabayaan lang niya.”

Napasinghap siya dahil dama niya ang matinding pagdaramdam nito. At hindi rin naman niya ito masisisi.

“Ano kaya ang mararamdaman niya kapag pinahirapan ko ang pinakamamahal niyang anak-anakan?”

Sa tanong ng binata, biglang kinabahan si Via. Paano ba naman kasi ramdam na ramdam niya galit nito. 

Itutuloy…

Bebot, pinagsabay-sabay ang 3 BF

ni Sister Isabel del Mundo - @Mga kuwento ng buhay at pag-ibig | Pebrero 19, 2024

Dear Sister Isabel,

Ang problemang isasangguni ko sa inyo ay tungkol sa akin. Hindi ako makuntento sa iisang boyfriend, kumbaga may pagka-playgirl ako. May dyowa ako sa iba’t ibang lugar. Mayroon dito sa ‘Pinas, India at United Kingdom. 

Hanggang sa dumating sa puntong gusto na akong pakasalan ng dyowa kong Pinoy. Siyempre, hindi ko tinanggihan ang proposal niya. 

Hinahanda na namin ang lahat maging ang petsa ng aming kasal ay ayos na rin, pero kinakabahan ako na baka hindi matuloy ang kasal namin kapag natuklasan niyang may boyfriend din ako sa India at U.K.

Nagkataon pang gusto rin akong pakasalan ng dalawang ito. Handa umano silang pumunta rito sa Pilipinas para maayos ang lahat. 

Ano ang gagawin ko, Sister Isabel? Gulung-gulo na ang isip ko. Nawa’y mapayuhan n’yo ako.

Nagpapasalamat,

Josephine ng Pampanga

Sa iyo, Josephine,

Kadalasan, lalaki ang pinakamaraming dyowa. Pero sa case mo, kababae mong tao, playgirl ka? Tapos ngayon natataranta ka, at hindi mo alam ang iyong gagawin? Lalo na ngayon nalaman mong seryoso at handa ka rin pala nilang pakasalan. 

Kung sino ang tinitibok ng puso mo, siya ang pakasalan mo. Kung mahal mo talaga ‘yung Pinoy mong fiancé huwag ka na mag-isip pa. Pakasalan mo na siya habang ‘yung 2 mo namang dyowa sa ibang bansa, iwasan mo na. Kung maaari i-block mo na sila tutal nasa ibang bansa naman sila para hindi ka na nila makontak. 

Huwag na huwag mo na paglalaruan ang kanilang damdamin. Sagrado at banal ang pag-ibig at hindi laruan. May karma sa mga taong mapaglaro. Minamalas ang mga taong pinaglalaruan ang damdamin ng kanyang karelasyon. Ang karma ay continuous hanggang sa kaapu-apuhan. Ganyan ang sinasapit ng mga taong mapaglaro sa pag-ibig.

Kaya bago pa mahuli ang lahat, kung gusto mong lumagay sa tahimik, magpakatino ka. 

Isa lang ang dapat mong mahalin, huwag kang gumaya sa aso't pusa na iba’t iba ang katalik. Hayop sila at hindi tao. Sana’y matauhan ka na sa sinabi ko.

Sumasaiyo,

Sister Isabel del Mundo

Bilyonaryong Mafia ang Mahal Ko (11)

ni Maria Angela Gonzales @Kuwentong Pag-Ibig | Pebrero 19, 2024

“May hindi tama,” wika ni Via sa kanyang sarili habang pinagmamasdan sina Tatay Pedro at Nhel Zamora. 

Bigla niya tuloy natanong sa kanyang sarili na, “Nasa perpektong sitwasyon na ba ako?”

“Wala!” Buong diin niyang sabi sa kanyang sarili. 

Ang dahilan kaya nagpakasal siya sa lalaking ito ay dahil bina-blackmail nito ang kanyang Tatay Pedro. 

Marahas na buntong hininga ang kanyang pinawalan. Dapat sana ay magalit siya 

sa binata pero hindi iyon ang nararamdaman niya ngayon. 

“Iba talaga ang mayaman, ‘no?” Hindi niya maiwasang itanong dito habang makasakay sila sa Montero. 

“Why?” Tanong nito habang nakatingin sa daan.

“Madali mong nakukuha ang mga bagay na gusto mo.” 

“Hindi lahat.”

“Ang dali mo nga akong nakuha.”

Marahang tawa ang pinawalan nito. “Sisihin mo ang ama mo.” 

“Hindi naman talaga siya sugarol. Nagkataon lang na hindi pa siya nakaka-recover sa pagkamatay ng nanay ko.”

“Masyado naman niyang minahal ang ina mo,” inis nitong sabi. 

Hindi napigilan ng dalaga ang mapangiti. Kapag pinag-uusapan kasi ang lovestory ng kanyang mga magulang, hindi niya maiwasan ang kiligin. 

“Paano ba naman kasi, wala raw minahal ng totoo si Tatay Pedro, kundi ang aking ina lang,” pagmamalaking sabi ng dalaga. 

“Damn!” wika nito sabay preno. Sa sobrang galit na kanyang naramdaman, hinampas pa nito ang manibela. Nanlisik ang mga mata nito habang nakatitig sa dalaga.

“Huwag mong asahan na magiging madali sa iyo ang lahat.”

Itutuloy…