Ginang, inggit sa kapitbahay na wa’ problema

ni Sister Isabel del Mundo - @Mga kuwento ng buhay at pag-ibig | Marso 11, 2024

Dear Sister Isabel,

Hindi ko na alam ang gagawin ko, madasalin at palasimba naman ako, pero bakit punumpuno pa rin ako ng problema? 

Mabuti pa itong kapitbahay namin laging masaya 

kahit na nagto-tongits lang maghapon kesa na magsimba.  Wala rin siyang trabaho, wala rin ginawa maghapon kundi ang tumambay at ito pa ang malupit, miyembro pa sila ng 4Ps. Kuntento na sila roon. Kung makapag-videoke  araw-araw, akala mo mayaman, pero nasa unahan ng pila kapag may ayuda.

Samantalang ako non-stop ang problemang dumarating sa akin. ‘Di pa tapos ang isa, meron na naman. Sadya kayang baliktad ang mundo? Kung sino pa ‘yung madasalin siya pa ang madaming pasanin? 

Hindi ko na iisa-isahin ang mga problema ko dahil masyado itong mahaba at magulo.

Gusto ko lang na gumaan ang kalooban ko sa pamamagitan ng mga ipapayo n’yo.

Alam kong kayo lang ang makakapagpalubag ng loob ko. Hihintayin ko ang payo n’yo.

Umaasa,

Digna ng Nueva Ecija

Sa iyo, Digna,

Sa mundong ating ginagalawan, sadyang ganyan ang buhay. Dapat mong tanggapin sa iyong kalooban ang buhay ng tao ay parang isang pelikula, tayo mismo ang mga artista na gumaganap sa entablado ng ating buhay. 

‘Ika nga sa kasabihan, “Life is what we make it.” Hindi porke pala-simba at madasalin ka, exempted ka na sa mga problema. Hindi makukuha ng dasal at pagsisimba ang pinapangarap mong tahimik na buhay at walang problemang pinapasan. Nakadepende na lang ‘yan kung paano mo haharapin ang buhay mo. Katulad na lang ng kapitbahay mo, kuntento na sa kanyang sitwasyon. 

Faith, determination and patience ang dapat mong ipatupad. Huwag mong ikumpara ang buhay mo sa ibang tao. Sa halip, taimtim kang humingi ng tulong sa Diyos.

Sumasaiyo,

Sister Isabel del Mundo

Bilyonaryong Mafia ang Mahal Ko (27)

ni Maria Angela Gonzales @Kuwentong Pag-Ibig | Marso 10, 2024

“Oo, nagseselos ako.”

Nawala ang ngiti ni Via sa kanyang labi dahil hindi niya inakala na sasabihin ni Nhel ang mga salitang iyon. 

“Ha? Bakit ka naman nagseselos?” 

“Asawa kita eh.”

“Okey,” matamlay niyang sabi. Iba kasi ang sagot na kanyang inaasahan. 

“Kaya gusto ko, akin lang ang pag-ibig mo.”

“Baka naman iba ang rason kaya ayaw mo akong i-share sa iba?”

“At ano pa ang magiging rason?” 

“Ang init na ibinibigay ko,” Nagmamalaking niyang sabi. 

Ayaw niyang ipahalata rito na naaapektuhan din siya ng kanyang sinasabi. Nag-flashback din kasi sa kanyang isipan ang mga nangyari sa kanila. Sa palagay niya tuloy ay hindi rin niya gugustuhin na makita itong may kasamang ibang babae at baka masabunutan pa niya ang babaeng makikita niyang kasama nito. 

“Tama ka riyan.”

“Mahal mo lang ako dahil sa init?” Mariing tanong nito. 

“Dapat bang mahalin kita kahit hindi ako nag-iinit?” Tanong nito sa kanya. 

Noong oras na ‘yun, ibig ni Via magpakain na lamang sa kanyang kinatatayuan. Para tuloy siyang sinampal ng mga sandaling iyon.  “Sinungaling.”

“Totoo naman.”

“Hindi totoo ‘yan. O basta lagi kitang bibigyan ng init.” Pilyang sabi niya sabay iwas ng tingin. Nakaramdam tuloy siya ng init. Pakiramdam nga niya ay inilagay siya nito sa oven. 

“Prove it!” Mapaghamong sabi nito.

Itutuloy…

Bilyonaryong Mafia ang Mahal Ko (26)

ni Maria Angela Gonzales @Kuwentong Pag-Ibig | Marso 9, 2024

Hindi makapaniwala si Nhel na magagawa niyang maging sunud-sunuran sa gusto ni Via. Isang malaking kalokohan na pumayag siyang ligawan at haranahin ito.

Nakita kasi ni Via ang gitara na nasa sulok ng kanilang silid. Kahit na marunong naman talaga kumanta si Nhel, hindi siya ang tipo ng tao na pagbibigyan anumang i-request sa kanya. Pakiwari niya tuloy ay hindi na siya makakapaghiganti.

Ngunit, maya-maya kinontra rin niya ang sinasabi ng kanyang utak, “Mas magiging masakit ang paghihiganti mo kung makukuha mo ang kanyang loob”. 

Kaya naman habang inaawit niya ang kantang may pamagat na “Ikaw lamang” ay diretso siyang nakatingin sa mga mata nito. Ibig kasi niyang makita nito ang kanyang katapatan o mas maiging sabihing kasinungalingan. Hindi naman kasi niya masasabi na totoo ang nararamdaman niya rito dahil hindi rin naman siya tunay na umiibig, para sa kanya, isang malaking kalokohan lamang iyon.

Napakaimposible kung iisipin niyang mahal niya si Via, samantalang ilang araw pa lang niya itong nakakasama. 

Napabuntong hininga siya nang maisip niyang bago sila magkita ay may paghanga na siyang naramdaman dito.

“Pagnanasa,” mariin niyang sabi sa sarili.

“Ang ganda ng boses mo, daig mo pa si Christian Bautista!”

“Hindi ko kailangan makarinig ng pangalan ng ibang lalaki,” inis niyang sabi. 

Tunay ngang nakaramdam siya ng matinding galit dahil nakuha pa nitong sabihin ang pangalan ng kanyang ex. Kahit hindi tuloy siya nakaharap sa salamin, tiyak niyang ang pula-pula ng kanyang mukha.

“Para tuloy gusto kong isipin na nagseselos ka.”

“Ba’t ako magseselos sa ex mo? Don’t tell me, hanggang ngayon may something pa rin sa inyo?”

“Hindi ko ex si Christian Bautista. Siya ang isa sa naging singer ng kinanta mo!” Nakangising sabi nito na para bang tuwang-tuwa.

Itutuloy…